અમદાવાદ: ચાંદખેડાની હોટલમાં પ્રેમી પંખીડાની આત્મહત્યા, કોઈ સુસાઇડ નોટ ન મળતા રહસ્ય ઘેરાયું

અમદાવાદના ચાંદખેડા વિસ્તારમાંથી એક અત્યંત કરુણ અને ચોંકાવનારી ઘટના સામે આવી છે. અહીં આવેલ વિસત સર્કલ નજીકની એક હોટલના રૂમમાં પ્રેમી પંખીડાએ ગળે ફાંસો ખાઈને સામુહિક આત્મહત્યા કરી લીધી છે. હોટલના રૂમમાં પંખા સાથે રસી વડે લટકેલી હાલતમાં બંનેના મૃતદેહ મળી આવતા સમગ્ર વિસ્તારમાં ચકચાર મચી ગઈ છે. ઘટનાની જાણ થતાં જ સ્થાનિક પોલીસનો કાફલો ઘટનાસ્થળે દોડી ગયો હતો અને આગળની કાયદેસરની કાર્યવાહી હાથ ધરી છે.

પંખા સાથે રસી વડે લટકેલી હાલતમાં મળ્યા મૃતદેહ

મળતી માહિતી મુજબ, ચાંદખેડાના વિસત સર્કલ પાસે આવેલી હોટલમાં આ યુવક અને યુવતીએ રૂમ ભાડે રાખ્યો હતો. રૂમનો દરવાજો લાંબા સમય સુધી ન ખુલતા અને અંદરથી કોઈ પ્રતિભાવ ન મળતા હોટલ સ્ટાફને શંકા ગઈ હતી. જેથી હોટલ સંચાલકો દ્વારા આ અંગે તુરંત પોલીસને જાણ કરવામાં આવી હતી. પોલીસે ઘટનાસ્થળે પહોંચીને દરવાજો ખોલાવતા અંદરનું દ્રશ્ય જોઈને સૌ સ્તબ્ધ થઈ ગયા હતા. હોટલના રૂમમાં પ્રેમી પંખીડાઓ રસી વડે ગળે ફાંસો ખાઈને પંખે લટકેલી હાલતમાં મળી આવ્યા હતા.

બંને મૃતક પંચમહાલના રહેવાસી, ઉંમર 20 થી 21 વર્ષ

પોલીસની પ્રાથમિક તપાસમાં મૃતક યુવક અને યુવતીની ઓળખના મહત્વના પુરાવા મળ્યા છે. મળતી માહિતી પ્રમાણે, મૃતક છોકરીની ઉંમર આશરે 20 વર્ષ અને છોકરાની ઉંમર આશરે 21 વર્ષ જણાઈ આવેલ છે. આ બંને પ્રેમી પંખીડાઓ પંચમહાલ જિલ્લાના સંતરામપુરના રહેવાસી હોવાનું પ્રાથમિક તપાસમાં જાણવા મળ્યું છે. બંને પોતાના ઘરેથી કોઈને કહ્યા વગર અમદાવાદ આવ્યા હોવાની આશંકા સેવાઈ રહી છે.

કોઈ સુસાઇડ નોટ મળી નથી: આત્મહત્યાનું કારણ અકબંધ

પોલીસે ઘટનાસ્થળેથી બંનેના મૃતદેહોને નીચે ઉતારીને હોસ્પિટલ ખસેડવાની તજવીજ હાથ ધરી હતી. વરિષ્ઠ પોલીસ અધિકારીઓ અને એફએસએલ (FSL)ની ટીમે ઘટનાસ્થળે પહોંચીને ઊંડાણપૂર્વક તપાસ શરૂ કરી છે. જો કે, સર્ચ ઓપરેશન દરમિયાન પ્રેમી પંખીડાઓ પાસેથી હાલ કોઈ સુસાઇડ નોટ કે એવું અન્ય કોઈ લખાણ મળી આવ્યું નથી. સુસાઇડ નોટ ન મળવાને કારણે આ બંને હોટલ સુધી કેમ આવ્યા અને તેમણે કયા સંજોગોમાં કે કયા ડરના કારણે આટલું મોટું અને અંતિમ પગલું ભર્યું, તેનું ચોક્કસ કારણ હજુ સુધી જાણી શકાયું નથી.

ચાંદખેડા પોલીસ દ્વારા વધુ તપાસ શરૂ

ચાંદખેડા પોલીસ સ્ટેશનના અધિકારીઓએ જણાવ્યું છે કે, ઘટનાની જાણ થતા જ પોલીસ ટીમ તાત્કાલિક હોટલ પર પહોંચી ગઈ હતી. પોલીસે બંને મૃતકોના પંચમહાલ ખાતે રહેતા પરિવારજનોનો સંપર્ક સાધવા માટે ચક્રો ગતિમાન કર્યા છે. હોટલના સીસીટીવી ફૂટેજ અને રજિસ્ટરમાં કરવામાં આવેલી એન્ટ્રીની પણ બારીકાઈથી તપાસ કરવામાં આવી રહી છે કે તેઓ ક્યારે હોટલમાં આવ્યા હતા અને તેમની સાથે અન્ય કોઈ વ્યક્તિ હાજર હતી કે નહીં.