International: 'આ કોઈ શોક્યની લડાઈ નથી': ભારત, ચીન અને અમેરિકા સાથેના સંબંધો પર બાંગ્લાદેશનું મોટું નિવેદન, ચીની કંપનીએ શરૂ કર્યું CEIZનું નિર્માણ

બાંગ્લાદેશના વિદેશ મંત્રી ડૉ. ખલીલુર રહેમાને સ્પષ્ટ કર્યું છે કે એક દેશ સાથે સંબંધો સુધરવાનો અર્થ એ નથી કે બીજા દેશ સાથેના સંબંધો વણસી રહ્યા છે. ભારત, ચીન અને અમેરિકા સાથેના સંબંધો પર નિવેદન આપતાં તેમણે કહ્યું કે આ કોઈ "શોક્ય (સૌતન) જેવી લડાઈ નથી." ડૉ. રહેમાનની આ ટિપ્પણી ભારતમાં અમેરિકાના રાજદૂત સર્ગિયો ગોરની બાંગ્લાદેશ મુલાકાત દરમિયાન આવી છે. બાંગ્લાદેશે સ્પષ્ટ કર્યું છે કે ચીન સાથેના સંબંધો મજબૂત કરવાથી ભારત કે અમેરિકા સાથેના તેના સંબંધોને કોઈ નુકસાન નહીં પહોંચે.

સંબંધો એ કોઈ 'ઝીરો-સમ ગેમ' નથી

અમેરિકી રાજદૂત સર્ગિયો ગોરની આ મુલાકાતનો મુખ્ય હેતુ અમેરિકા-બાંગ્લાદેશ વ્યૂહાત્મક સહયોગને વધુ મજબૂત કરવાનો છે. ગોરની આ મુલાકાત બાંગ્લાદેશના વડાપ્રધાનની બેઇજિંગ યાત્રા બાદ થઈ રહી છે.

ઢાકામાં પત્રકારો સાથે વાતચીતમાં ડૉ. ખલીલુર રહેમાને જણાવ્યું હતું કે, "કોઈપણ દેશ સાથેના અમારા સંબંધો બીજા દેશ સાથેના સંબંધો માટે 'ઝીરો-સમ ગેમ' (એકની જીત, બીજાની હાર) નથી. અમે ક્યારેય એક દેશ સાથે સંબંધો બનાવવા માટે બીજા દેશ સાથેના સંબંધોને નુકસાન પહોંચાડીશું નહીં. દરેક દેશ સાથે અમે અમારા હિતોને સુરક્ષિત રાખીશું."

'સંબંધો હિતો પર આધારિત છે'

ડૉ. રહેમાને વધુમાં ઉમેર્યું કે બાંગ્લાદેશના વડાપ્રધાનની ચીન મુલાકાત સફળ રહી હતી અને જો તેઓ ભવિષ્યમાં ભારતની મુલાકાત લેશે તો તે પણ "ખૂબ જ સારી યાત્રા" રહેશે. તેમણે કહ્યું, "સર્ગિયો ગોર અમને મળવા આવ્યા છે અને મેં સેક્રેટરી રૂબિયો સાથે પણ મુલાકાત કરી છે. બાંગ્લાદેશના સંબંધો માત્ર એક દેશ પૂરતા સીમિત નથી. આ પહેલી પત્ની અને બીજી પત્ની વચ્ચેની લડાઈ નથી. આ સંબંધો પરસ્પર હિતો પર આધારિત છે અને જ્યાં અમારા હિતો હશે અમે ત્યાં જઈશું."

બાંગ્લાદેશમાં ચીનનું મોટું આર્થિક અને ઔદ્યોગિક રોકાણ

અમેરિકી રાજદૂતની આ મુલાકાત એવા સમયે થઈ રહી છે જ્યારે ચટગાંવમાં ચીની આર્થિક અને ઔદ્યોગિક ક્ષેત્ર (CEIZ) નું નિર્માણ કાર્ય શરૂ થઈ રહ્યું છે. એક દાયકાથી વધુ સમયના આયોજન બાદ સાકાર થયેલો આ પ્રોજેક્ટ બાંગ્લાદેશમાં ચીનનો પ્રથમ રાષ્ટ્રીય સ્તરનો ઇન્ડસ્ટ્રિયલ પાર્ક છે.

આ પ્રોજેક્ટનું કામકાજ 'ચાઇના રોડ એન્ડ બ્રિજ કોર્પોરેશન' (CRBC) સંભાળી રહી છે. CRBC એ ચીનની એક અગ્રણી સરકારી કંપની છે જે વૈશ્વિક સ્તરે મોટા પાયે ઈન્ફ્રાસ્ટ્રક્ચર નિર્માણ કરે છે અને ચીનના 'બેલ્ટ એન્ડ રોડ ઈનિશિયેટિવ' (BRI) માં એક મહત્વપૂર્ણ ભાગીદાર છે.