મુનીરની સિક્રેટ ડીલ અને ઈરાને સાઉદી અરેબિયા પર હુમલા રોક્યા, પાકિસ્તાની આર્મી ચીફે અમેરિકાને દગો આપ્યો

અમેરિકા-ઈઝરાયેલ અને ઈરાન વચ્ચે ચાલી રહેલા સંઘર્ષ દરમિયાન પાકિસ્તાનના આર્મી ચીફ અસીમ મુનીરની ભૂમિકાને લઈને એક સળગતો ખુલાસો થયો છે. એક રિપોર્ટ અનુસાર, અસીમ મુનીરે સાઉદી અરેબિયાને ઈરાનના હુમલાઓથી બચાવવામાં મહત્વની ભૂમિકા ભજવી હતી. મુનીરે ઈરાન અને સાઉદી અરેબિયા વચ્ચે એક ગુપ્ત કરાર કરાવ્યો હતો, જેના હેઠળ તેહરાને સાઉદી અરેબિયા સામેના પોતાના હુમલા બંધ કરી દીધા હતા.

મુનીરે મધ્યસ્થતા કરીને કરાવ્યો કરાર

'ટાઇમ્સ ઓફ ઇઝરાયેલ'ના રિપોર્ટ અનુસાર, મુનીરની મધ્યસ્થતામાં આ કરાર માર્ચના અંતમાં થયો હતો, જ્યારે ઈરાન સામે અમેરિકા અને ઈઝરાયેલનું યુદ્ધ તેના શરૂઆતના અઠવાડિયામાં હતું. મુનીરે ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC)ના વડા અહમદ વાહિદી સાથે ઓઇલ ટ્રાન્સપોર્ટના એક જોઈન્ટ વેંચરનો ઉપયોગ કરીને આ કરાર કરાવ્યો હતો.

મિડલ ઈસ્ટના ત્રણ અધિકારીઓએ જણાવ્યું કે યુદ્ધના પહેલા મહિનામાં ઈરાને અન્ય ખાડી દેશોની સાથે સાઉદી અરેબિયા પર પણ અનેક હુમલા કર્યા હતા. પરંતુ આ કરાર પર હસ્તાક્ષર થયા બાદ સાઉદી અરેબિયા પર થતા હુમલા લગભગ બંધ થઈ ગયા હતા.

ઓઇલ જોઈન્ટ વેંચરથી કરી સિક્રેટ ડીલ

સાઉદી અરેબિયા સાથે સમજૂતી કરવા માટે મુનીરે તેહરાન સામે તે જોઈન્ટ વેંચર ચાલુ રાખવાનો પ્રસ્તાવ મૂક્યો હતો, જેના હેઠળ ઈરાન પર આંતરરાષ્ટ્રીય પ્રતિબંધો હોવા છતાં ગુપચુપ રીતે પાકિસ્તાનને ક્રૂડ ઓઇલ પહોંચાડવામાં આવી રહ્યું છે.

આ માટે IRGC ચીફ અહમદ વાહિદી અને પાકિસ્તાની આર્મી ચીફ અસીમ મુનીર સાથે સંકળાયેલી કંપનીનો ઉપયોગ કરવામાં આવી રહ્યો છે. ઈરાન સામે અમેરિકાના આર્થિક પ્રતિબંધો અને નાકાબંધી દરમિયાન ઈરાનને આ ડીલથી મોટો ફાયદો થયો છે.

ટ્રમ્પ સાથે રમત રમી ગયા મુનીર!

સૌથી રસપ્રદ વાત એ છે કે પાકિસ્તાન ઈરાન પાસેથી આ ઓઇલ એવા સમયે ખરીદી રહ્યું હતું, જ્યારે અમેરિકાએ ઈરાન સામે અત્યંત કડક વલણ અપનાવ્યું હતું અને તેના ઓઇલ નિકાસને રોકવા માટે દરિયાઈ નાકાબંધી કરી હતી. એટલે કે એક તરફ અસીમ મુનીર તત્કાલીન અમેરિકી રાષ્ટ્રપતિ ડોનાલ્ડ ટ્રમ્પના વિશ્વાસુ બની રહ્યા હતા અને બીજી તરફ તેમના કટ્ટર દુશ્મન ઈરાનને આર્થિક ફાયદો પહોંચાડી રહ્યા હતા.

આ કરાર બાદ ત્રણ મહિનાથી વધુ સમય સુધી ઈરાન તરફથી સાઉદી અરેબિયા પર કોઈ હુમલો કરવામાં આવ્યો નહોતો. જોકે, તાજેતરમાં તેહરાને ખાડી દેશ પર એક મિસાઈલ છોડી હતી. રિપોર્ટ મુજબ, હુમલાના તુરંત બાદ મુનીરે વાહિદીને ચેતવણી આપી હતી કે આ પ્રકારના વલણથી તેમના જોઈન્ટ વેંચર પર ખતરો મંડરાઈ શકે છે, ત્યારબાદ સાઉદી અરેબિયા પર ફરી કોઈ મિસાઈલ છોડવામાં આવી નથી.