અમરેલીના રાજુલામાં SOG ની કાર્યવાહી: રહેણાંક મકાનમાંથી 5 કિલો ગાંજો ઝડપાયો, 1 ની ધરપકડ

અમરેલી જિલ્લાના રાજુલા શહેરમાં સ્પેશિયલ ઓપરેશન ગ્રુપ દ્વારા નશીલા પદાર્થોના ગેરકાયદે વેપાર સામે મોટી અને સફળ કાર્યવાહી કરવામાં આવી છે. SOG ની ટીમે બાતમીના આધારે દરોડો પાડીને એક રહેણાંક મકાનમાંથી 5 કિલોથી વધુ સુકો ગાંજો જપ્ત કર્યો છે. આ કાર્યવાહીમાં પોલીસે 1 આરોપીની ધરપકડ કરીને કુલ 2,50,650 રૂપિયાનો મુદ્દામાલ કબજે કર્યો છે.

બાતમીના આધારે બીડીકામદાર વિસ્તારમાં દરોડો

રાજ્ય પોલીસ વડા (CID ક્રાઇમ અને રેલ્વે) ના માર્ગદર્શન હેઠળ ચાલી રહેલા રાજ્યવ્યાપી નશામુક્તિ અભિયાન અંતર્ગત અમરેલી જિલ્લામાં સઘન ચેકિંગ હાથ ધરવામાં આવ્યું છે. ભાવનગર રેન્જ IG આર.વી. અસારી અને અમરેલી જિલ્લા પોલીસ અધિક્ષક સંજય ખરાતના નિર્દેશન હેઠળ અમરેલી SOG ના પોલીસ ઇન્સ્પેક્ટર બી.જી. ઈશરાણીની ટીમ રાજુલા પોલીસ સ્ટેશન વિસ્તારમાં પેટ્રોલિંગ કરી રહી હતી. આ દરમિયાન ચોક્કસ ખાનગી બાતમી મળી હતી કે, બીડીકામદાર વિસ્તારમાં આવેલા એક રહેણાંક મકાનમાં નશીલા પદાર્થનો મોટો જથ્થો છુપાવવામાં આવ્યો છે.

60 વર્ષીય વૃદ્ધના ઘરેથી લાખોનો ગાંજો જપ્ત

બાતમીના આધારે SOG ની ટીમે તાત્કાલિક તે મકાન પર દરોડો પાડ્યો હતો. ઘરની સઘન તલાશી લેતા મથુરભાઈ ધૈયાભાઈ શિયાળ (ઉંમર 60) ના મકાનમાંથી 5.003 કિલોગ્રામ સુકો ગાંજો મળી આવ્યો હતો. પોલીસે સ્થળ પરથી અંદાજિત 2,50,150 રૂપિયાની કિંમતનો ગાંજો, 1 ડિજિટલ વજન કાંટો અને ગાંજો રાખવા માટે ઉપયોગમાં લેવાયેલો કાપડનો થેલો મળીને કુલ 2,50,650 રૂપિયાનો મુદ્દામાલ જપ્ત કર્યો છે. પોલીસે આરોપી મથુરભાઈ શિયાળની ઘટનાસ્થળેથી જ ધરપકડ કરી લીધી હતી.

NDPS એક્ટ હેઠળ ગુનો દાખલ અને આગળની તપાસ

SOG દ્વારા પકડાયેલા આરોપી વિરુદ્ધ નાર્કોટિક્સ ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ હેઠળ કડક ગુનો નોંધીને વધુ કાનૂની કાર્યવાહી માટે તપાસ રાજુલા પોલીસને સોંપી છે. આટલી મોટી ઉંમરનો આરોપી આ ગાંજાનો જથ્થો ક્યાંથી લાવ્યો હતો, આ નેટવર્કમાં અન્ય કોણ સામેલ છે અને આ નશીલો પદાર્થ કોને સપ્લાય કરવાનો હતો, તે દિશામાં પોલીસે તપાસના ચક્રો ગતિમાન કર્યા છે. અમરેલી SOG ની આ કાર્યવાહીથી સ્થાનિક ડ્રગ્સ પેડલરોમાં ફફડાટ વ્યાપી ગયો છે.