અમદાવાદ: 60.68 કરોડના ખર્ચે નિર્મિત 188 આધુનિક સરકારી આવાસોનું અમિત શાહ કરશે ઇ-લોકાર્પણ

કેન્દ્રીય ગૃહ અને સહકાર મંત્રી અમિત શાહ આગામી 12 જુલાઈના રોજ અમદાવાદમાં રાજ્ય સરકારના માર્ગ અને મકાન વિભાગ દ્વારા 60.68 કરોડ રૂપિયાના ખર્ચે તૈયાર કરાયેલા 188 આધુનિક સરકારી આવાસોનું ઇ-લોકાર્પણ કરશે. આ પ્રોજેક્ટથી વર્ગ-1 થી 3 ના સરકારી અધિકારીઓ અને કર્મચારીઓને પરિવાર સાથે રહેવા માટે આધુનિક રહેઠાણની ઉત્તમ સુવિધા પ્રાપ્ત થશે.

60.68 કરોડના ખર્ચે 4 મલ્ટીસ્ટોરીડ ટાવર તૈયાર 

રાજ્ય સરકારના વિવિધ વર્ગના કર્મચારીઓને તેમના ફરજના સ્થળે જ ઉચ્ચ ગુણવત્તાયુક્ત અને તમામ આધુનિક સગવડતાઓ ધરાવતા રહેઠાણો મળી રહે તેવા અભિગમ સાથે આ પ્રોજેક્ટ હાથ ધરાયો હતો. કુલ 60.68 કરોડ રૂપિયાના ખર્ચે 4 મલ્ટીસ્ટોરીડ ટાવરોનું નિર્માણ કરવામાં આવ્યું છે. આવાસની ફાળવણીથી વર્ગ-1 ના 40, વર્ગ-2 ના 104 અને વર્ગ-3 ના 44 મળીને કુલ 188 અધિકારીઓ અને કર્મચારીઓના પરિવારોને સીધો લાભ મળશે.

શહેરના વિવિધ વિસ્તારોમાં 4 કેટેગરીના આવાસોનું નિર્માણ 

માર્ગ અને મકાન વિભાગ દ્વારા અમદાવાદના અલગ-અલગ વિસ્તારોમાં કર્મચારીઓના વર્ગ મુજબ આવાસો બનાવાયા છે. જેમાં 40 E-કેટેગરી, 52 D1-કેટેગરી, 52 C-કેટેગરી અને 44 B-કેટેગરીના આવાસોનો સમાવેશ થાય છે.

E અને D1 કેટેગરી

શાહીબાગ વિસ્તારમાં બનેલા 'E' કેટેગરીના રેસિડેન્સી ટાવરમાં ડ્રોઈંગ રૂમ, સ્પેસિયસ કિચન, ઓફિસ રૂમ, માસ્ટર બેડરૂમ અને બગીચા સહિતની લક્ઝુરિયસ સુવિધાઓ અપાઈ છે. આ ઉપરાંત શહેરના શૈક્ષણિક વિસ્તાર એલ.ડી.સી.ઇ. સુંદરમ કોલોની ખાતે 'D1' કેટેગરીના ટાવર તૈયાર કરાયા છે.

C અને B કેટેગરી

શાહીબાગ પોલીસ સ્ટેડિયમ સામે ગ્રાઉન્ડ પ્લસ 13 માળના  'C' કેટેગરીના અને મધ્યમાં આવેલી ફોટોલીથો પ્રેસ કોલોની ખાતે ગ્રાઉન્ડ પ્લસ 11 માળના 'B' કેટેગરીના ટાવરનું નિર્માણ પૂર્ણ કરી લોકાર્પણ માટે તૈયાર કરી દેવામાં આવ્યું છે.

કર્મચારીઓના જીવનધોરણમાં થશે નોંધપાત્ર સુધારો 

12 જુલાઈના રોજ યોજાનારા આ ભવ્ય ઇ-લોકાર્પણ કાર્યક્રમમાં મુખ્યમંત્રી તેમજ રાજ્ય સરકારના પદાધિકારીઓ, માર્ગ અને મકાન વિભાગના વરિષ્ઠ અધિકારીઓ અને મોટી સંખ્યામાં નાગરિકો ઉપસ્થિત રહેશે. આવાસ યોજનાનો આ પ્રોજેક્ટ સરકારી કર્મચારીઓના જીવનધોરણને વધુ સુદૃઢ બનાવવામાં એક મહત્વપૂર્ણ કદમ સાબિત થશે.