ભાવનગરમાં એમ્બરગ્રીસ રેકેટનો પર્દાફાશ: 9.40 કરોડના મુદ્દામાલ સાથે કુલ 8 આરોપીઓ ઝડપાયા

ભાવનગર જિલ્લામાં વ્હેલ માછલીની ઉલ્ટી એટલે કે અત્યંત કીમતી ગણાતા 'એમ્બરગ્રીસ' ના ગેરકાયદે વેચાણના મોટા નેટવર્કનો સ્ટેટ મોનિટરિંગ સેલ અને વન વિભાગ દ્વારા પર્દાફાશ કરવામાં આવ્યો છે. અગાઉ પકડાયેલા 4.30 કરોડના મુદ્દામાલ બાદ સઘન તપાસમાં વધુ 5.10 કરોડનું એમ્બરગ્રીસ મળી આવતા આ કેસમાં કુલ 9.40 કરોડના જથ્થા સાથે 8 શખ્સોની ધરપકડ કરવામાં આવી છે.

સ્ટેટ મોનિટરિંગ સેલનો બુધેલ ગામે દરોડો 

પ્રાપ્ત માહિતી અનુસાર, સ્ટેટ મોનિટરિંગ સેલ (SMC) ગાંધીનગરની ટીમ ભાવનગર જિલ્લામાં પેટ્રોલિંગમાં હતી. તે દરમિયાન મળેલી ચોક્કસ બાતમીના આધારે ભાવનગર તાલુકાના બુધેલ ગામની સ્કાય બ્લુ સોસાયટી પાસે આવેલા પડતર ખાર વિસ્તારમાં દરોડો પાડવામાં આવ્યો હતો. આ સ્થળેથી એમ્બરગ્રીસનું વેચાણ કરવાની ફિરાકમાં રહેલા 4 શખ્સોને 4.306 કિલોગ્રામ એમ્બરગ્રીસ સાથે રંગેહાથ ઝડપી લેવાયા હતા. આંતરરાષ્ટ્રીય બજારમાં આ જથ્થાની કિંમત આશરે 4.30 કરોડ રૂપિયા થવા જાય છે. પ્રાથમિક કાર્યવાહી બાદ SMC દ્વારા આ મુદ્દામાલ અને આરોપીઓને વન વિભાગને સોંપવામાં આવ્યા હતા.

વન વિભાગની તપાસમાં વધુ 5.10 કરોડનો જથ્થો મળ્યો 

વન વિભાગે વન્યપ્રાણી સંરક્ષણ અધિનિયમ-1972 ની વિવિધ કલમો હેઠળ ગુનો નોંધીને તપાસનો ધમધમાટ શરૂ કર્યો હતો. પકડાયેલા ચાર આરોપીઓની કડક પૂછપરછ દરમિયાન આ નેટવર્કમાં અન્ય શખ્સો પણ સામેલ હોવાના ચોંકાવનારા ખુલાસા થયા હતા. વન વિભાગની ટીમે મૂળ સુધી પહોંચીને વધુ 5.10 કરોડની કિંમતનો એમ્બરગ્રીસનો જથ્થો શોધી કાઢ્યો હતો અને આ ગુનામાં સંડોવાયેલા અન્ય 4 આરોપીઓની પણ અટકાયત કરી લીધી હતી.

પકડાયેલા 8 આરોપીઓની યાદી 

આ સમગ્ર ઓપરેશનમાં કુલ 8 આરોપીઓ ઝડપાયા છે. જેમાં ઇમરાન રહીમભાઈ પરમાર, સાજીદખાન અયુબખાન પઠાણ, ફેજાન તાલીબભાઈ મધરા, શબિરશા ફારુકશા સૈયદ, અભિષેક ઉપેન્દ્રભાઈ રાઠોડ, ભરત કાનાભાઈ વારીયા, રાહુલ પાંચાભાઈ સોલંકી અને વિશાલ સુરેશભાઈ ડાભીનો સમાવેશ થાય છે. આ તમામ શખ્સો ભાવનગર અને આસપાસના વિસ્તારોના રહેવાસી છે.

વન વિભાગ દ્વારા તમામ 8 આરોપીઓને નામદાર કોર્ટ સમક્ષ રજૂ કરવામાં આવ્યા હતા, જ્યાં કોર્ટે તમામના રિમાન્ડ મંજૂર કર્યા છે. હાલ વન વિભાગની ભાવનગર રેન્જ દ્વારા આ કરોડો રૂપિયાના એમ્બરગ્રીસ નેટવર્કના મુખ્ય સૂત્રધારો કોણ છે, આ જથ્થો ક્યાંથી લાવવામાં આવ્યો હતો અને આંતરરાષ્ટ્રીય સ્તરે કોને વેચવાનો હતો, તે દિશામાં સઘન પૂછપરછ અને તપાસ ચલાવવામાં આવી રહી છે.