પાપનો ઘડો ફૂટ્યો!: અંબાજી મંદિરમાં દાન ચોરીનું મોટું કૌભાંડ, અન્ય મોટા માથાઓની સંડોવણીની આશંકા, વિડિયો વાઇરલ

ગુજરાતના સુપ્રસિદ્ધ યાત્રાધામ અને શક્તિપીઠ અંબાજી મંદિરમાંથી એક અત્યંત ચોંકાવનારો કિસ્સો પ્રકાશમાં આવ્યો છે. અંબાજી મંદિરમાં ભક્તો દ્વારા શ્રદ્ધાપૂર્વક ચડાવવામાં આવતા દાનની ગણતરી દરમિયાન ચોરી થતી હોવાનો એક લાઈવ વીડિયો સોશિયલ મીડિયા પર વાયરલ થતાં ભક્તોમાં ભારે આક્રોશ ફેલાયો છે. અયોધ્યાના રામ મંદિર જેવી જ આ ચોરીની ઘટના સામે આવ્યા બાદ સોશિયલ મીડિયા પર પણ આ બાબત ચર્ચાનો વિષય બની છે.

CCTV ફૂટેજમાં ભયાનક ખુલાસો: 3 કર્મચારીઓ સસ્પેન્ડ

મળતી માહિતી મુજબ, મંદિરના ભંડારામાં ભક્તો દ્વારા અર્પણ કરવામાં આવેલી રોકડ રકમની ગણતરી ચાલી રહી હતી ત્યારે નોટોના બંડલ સેરવી લેવાનો આ ખેલ ખેલાયો હતો. મંદિરના વહીવટી તંત્ર દ્વારા સીસીટીવી ફૂટેજની ચકાસણી કરવામાં આવતા આ સમગ્ર ચોરીનો ભયાનક ખુલાસો થયો હતો. જેમાં આઉટસોર્સ એજન્સીના કર્મચારીઓ રોકડ રૂપિયા પગ નીચે દબાવીને ચોરી કરતા કેમેરામાં રંગેહાથ ઝડપાયા હતા. આ ગંભીર બાબતને ધ્યાને રાખીને મંદિર વહીવટી તંત્ર દ્વારા તાત્કાલિક પગલાં ભરી ૩ આરોપીઓની ધરપકડ કરવામાં આવી છે અને તેમને તાત્કાલિક અસરથી નોકરીમાંથી હાંકી કાઢવામાં આવ્યા છે. હાલ પોલીસ આ સમગ્ર કૌભાંડની અત્યંત ગંભીરતાથી તપાસ ચલાવી રહી છે.

એપ્રિલ મહિનાથી ચાલતો હતો ચોરીનો આ ખેલ?

પોલીસ અને વહીવટી તંત્રની પ્રાથમિક તપાસમાં વધુ એક મોટો અને આંચકાજનક ખુલાસો થયો છે. પકડાયેલા આરોપીઓ આ ચોરી પહેલીવાર નહોતા કરી રહ્યા. વહીવટી તંત્ર દ્વારા અગાઉના એટલે કે ગત એપ્રિલ મહિનાના સીસીટીવી ફૂટેજ ફરીથી તપાસવામાં આવતા, તેમાં પણ આ જ આરોપીઓ દાનના નાણાં પર હાથફેરો કરતા સ્પષ્ટપણે કેમેરામાં કેદ થયેલા જોવા મળ્યા હતા. આ પરથી સાબિત થાય છે કે મંદિરમાં ચોરીનો આ સિલસિલો છેલ્લા ઘણા સમયથી ચાલી રહ્યો હતો.

અત્યાર સુધી કેટલા લાખ કે કરોડની થઈ ઉઠાંતરી?

આ ઘટના સામે આવ્યા બાદ હવે સૌથી મોટો સવાલ એ ઊભો થઈ રહ્યો છે કે, આ આરોપીઓ ભૂતકાળમાં કેટલી વાર દાનની રકમ ચોરી ચૂક્યા છે? અત્યાર સુધીમાં ભક્તોની આસ્થાના કેટલા લાખ કે કરોડ રૂપિયાની ઉઠાંતરી કરવામાં આવી છે તે અંગે સત્તાવાર આંકડો મેળવવો જરૂરી બન્યો છે. આ ઉપરાંત, આ કાળા કારોબારમાં માત્ર આ ત્રણ નાના કર્મચારીઓ જ સામેલ છે કે પછી મંદિરના અન્ય કોઈ મોટા માથાઓની પણ સંડોવણી છે, તે હાલ પોલીસ માટે તપાસનો મોટો વિષય બન્યો છે.

ભક્તોમાં ભારે રોષ: કડક સજાની માંગ

આ અતિ પવિત્ર યાત્રાધામમાં બનેલી ઘટનાથી દેશ-વિદેશના કરોડો ભક્તોની આસ્થાને ઊંડો આઘાત લાગ્યો છે. લોકોમાં એવી ઉગ્ર માંગ ઉઠી રહી છે કે, ભક્તોની આસ્થા અને પરસેવાની કમાણીના દાન સાથે ખિલવાડ કરનારા આવા અસામાજિક તત્વો સામે કાયદાનું કડક વલણ અપનાવવામાં આવે અને તેમને એવી સખત સજા કરવામાં આવે જેથી ભવિષ્યમાં કોઈ આવું કૃત્ય કરવાની હિંમત ન કરી શકે. વહીવટી તંત્રએ પણ ભવિષ્યમાં આવી ઘટનાઓ ન બને તે માટે દાન ગણતરીની પ્રક્રિયા વધુ પારદર્શક અને ચુસ્ત બનાવવાની ખાતરી આપી છે.