અમદાવાદમાં ભક્તિનો મહામાહોલ:: જગન્નાથ મંદિરમાં નેત્રોત્સવની ભવ્ય વિધિ, કપાટ ખૂલતાં દર્શન માટે ભીડ ઉમટી, હર્ષ સંઘવીનું રથયાત્રા રૂટ પર ભવ્ય સ્વાગત

અમદાવાદના અસ્મિતા પર્વ સમાન ગણાતા ભગવાન જગન્નાથજી મંદિરની 149મી પરંપરાગત રથયાત્રાને લઈને ભક્તોમાં ભારે ઉત્સાહ જોવા મળી રહ્યો છે. દેશભરમાં જગન્નાથપુરી બાદ સૌથી વધુ આતુરતાથી જોવાતી આ રથયાત્રાના ત્રિ-દિવસીય કાર્યક્રમનો આજથી ભક્તિમય પ્રારંભ થયો છે. આજે 14 જુલાઈના રોજ વહેલી સવારથી જ મંદિરમાં વૈદિક મંત્રોચ્ચાર વચ્ચે ધાર્મિક વિધિઓ શરૂ થઈ હતી. સવારે 6:00 વાગ્યે ભગવાન જગન્નાથજી, બહેન સુભદ્રાજી અને બળદેવજીની મૂર્તિઓને ગર્ભગૃહમાં આવેલી પવિત્ર રત્નવેદી પર શાસ્ત્રોક્ત વિધિ અનુસાર પ્રતિષ્ઠિત કરવામાં આવી હતી. ત્યારબાદ સૌથી મહત્વપૂર્ણ માનાતી નેત્રોત્સવ પૂજન વિધિ શરૂ થતાં મંદિર પરિસરમાં ભક્તિ અને આસ્થાનું અનોખું વાતાવરણ સર્જાયું હતું. મંદિર પર ધ્વજારોહણ કર્યા બાદ મંદિરના કપાટ ખોલી દેવામાં આવ્યાં છે. ભગવાનના દર્શન સાથે મહા આરતી કરવામાં આવી. મોટી સંખ્યામાં શ્રદ્ધાળુઓ દર્શન માટે ઉમટી પડ્યા હતા અને મંદિર પરિસર 'જય જગન્નાથ'ના જયઘોષથી ગુંજી ઉઠ્યું હતું.

ભગવાન જગન્નાથજીની રથયાત્રાને લઈને સુરક્ષા વ્યવસ્થાની સમીક્ષા માટે યોજાયેલી ફ્લેગ માર્ચમાં રાજ્યના DGP, અમદાવાદ પોલીસ કમિશનર સહિતના ઉચ્ચ અધિકારીઓ જોડાયા હતા. ગૃહ રાજ્યમંત્રી હર્ષ સંઘવી સાથે ધારાસભ્યો અને પોલીસના ઉચ્ચ અધિકારીઓ પણ રથયાત્રા રૂટના નિરીક્ષણ દરમિયાન પગપાળા ચાલ્યા હતા. આ દરમિયાન વિવિધ વિસ્તારોમાં લોકોએ હર્ષ સંઘવીનું ફૂલવર્ષા કરીને ઉષ્માભર્યું સ્વાગત કર્યું હતું. જમાલપુર મંદિર ખાતે 100 ફૂટના રાષ્ટ્રધ્વજ સાથે હિંદુ-મુસ્લિમ એકતાનો સંદેશ આપતા ફૂલોની વર્ષા કરીને ગૃહ રાજ્યમંત્રીનું સ્વાગત કરવામાં આવ્યું હતું. સમગ્ર કાર્યક્રમ દરમિયાન કોમી એકતા અને શાંતિપૂર્ણ માહોલનો સંદેશ જોવા મળ્યો હતો.

ધાર્મિક વિધિઓ સાથે મહાનુભાવોની હાજરી
નેત્રોત્સવ પૂજન વિધિને લઈને અનેક આગેવાનો અને મહાનુભાવો પણ જગન્નાથ મંદિરે પહોંચ્યા હતા. ગુજરાતના નાયબ મુખ્યમંત્રી અને પૂર્વ નાયબ મુખ્યમંત્રી નીતિન પટેલ ખાસ કરીને નેત્રોત્સવ પૂજન વિધિનો લાભ લેવા મંદિરે પહોંચ્યા હતા. તેમણે ભગવાનના દર્શન કરી રાજ્યની સુખ-સમૃદ્ધિ અને સર્વજન કલ્યાણ માટે પ્રાર્થના કરી હતી. બીજી તરફ રાજ્યના ગૃહમંત્રી હર્ષ સંઘવી પણ જગન્નાથ મંદિરે પહોંચ્યા હતા, જ્યાં તેમણે વિશેષ પૂજા-અર્ચના કરી હતી. મંદિરમાં ચાલી રહેલી વૈદિક વિધિઓ દરમિયાન તેઓ સંતો અને મંદિરના મહંતો સાથે પણ મુલાકાત કરી હતી. ધાર્મિક કાર્યક્રમ પૂર્ણ થયા બાદ તેઓ રથયાત્રાની સુરક્ષા વ્યવસ્થાની સમીક્ષા કરવા માટે અધિકારીઓ સાથે ચર્ચા કરશે.

ધ્વજારોહણ બાદ રૂટનું નિરિક્ષણ અને કડક સુરક્ષા વ્યવસ્થા
નેત્રોત્સવ પૂજન બાદ મંદિરમાં ધ્વજારોહણ અને ભવ્ય મહાઆરતી કરવામાં આવી. ત્યારબાદ બપોરે 11:00 વાગ્યે દેશના વિવિધ ભાગોમાંથી આવેલા સાધુ-સંતો માટે મહાપ્રસાદ અને વસ્ત્રદાનનો કાર્યક્રમ યોજાશે. બીજી તરફ ગૃહમંત્રી હર્ષ સંઘવી  પોલીસકર્મીઓના વિશાળ બંદોબસ્ત વચ્ચે રથયાત્રાના સમગ્ર રૂટનું ચાલીને નિરિક્ષણ કરશે અને સુરક્ષા વ્યવસ્થાનો તાગ મેળવશે. હાલમાં મંદિર પરિસરમાં પોલીસ કમિશનર અનુપમસિંહ ગહલોત, ઇન્ટેલિજન્સ બ્યુરોના વડા અશોક કુમાર યાદવ, સેક્ટર-1ના જેસીપી નીરજ બડગુજર સહિતના ઉચ્ચ પોલીસ અધિકારીઓ હાજર રહી તમામ વ્યવસ્થાઓ પર સતત નજર રાખી રહ્યા છે. મંદિર પ્રશાસન અને પોલીસ તંત્ર દ્વારા આ વર્ષે રથયાત્રા શાંતિપૂર્ણ, સુવ્યવસ્થિત અને ભવ્ય રીતે યોજાય તે માટે દરેક સ્તરે તૈયારીઓ પૂર્ણ કરી દેવામાં આવી છે.

16 જુલાઈએ નીકળશે ભવ્ય 149મી રથયાત્રા
ત્રણ દિવસીય ધાર્મિક કાર્યક્રમોની પૂર્ણાહુતિ બાદ મુખ્ય ઉત્સવ એટલે કે અષાઢી બીજના પવિત્ર દિવસે 16 જુલાઈ, ગુરુવારે સવારે 7:00 વાગ્યે ભગવાન જગન્નાથજી, બહેન સુભદ્રાજી અને બળદેવજીના રથો પરંપરાગત નગરચર્યાએ નીકળશે. લાખો શ્રદ્ધાળુઓ આ ઐતિહાસિક રથયાત્રાના સાક્ષી બનશે. શહેરભરમાં ધાર્મિક ઉત્સાહ સાથે સુરક્ષા, સ્વચ્છતા અને ટ્રાફિક વ્યવસ્થાને લઈને પણ તંત્ર દ્વારા વિશેષ આયોજન કરવામાં આવ્યું છે. આ વર્ષે પણ અમદાવાદની રથયાત્રા ભક્તિ, પરંપરા અને સાંસ્કૃતિક ગૌરવનો ભવ્ય ઉત્સવ બની રહે તેવી સૌ કોઈમાં અપેક્ષા જોવા મળી રહી છે.