અમદાવાદ :: સુવર્ણ શણગારમાં જગન્નાથજીના દિવ્ય દર્શન, જમાલપુર મંદિરે ભક્તોનો મહાસાગર ઉમટ્યો

અમદાવાદના જમાલપુર ખાતે આવેલા જગન્નાથજીના નીજ મંદિરમાં આજે ભક્તિ અને દિવ્યતાનો એક અદભૂત અને અલૌકિક સંગમ જોવા મળ્યો હતો. અષાઢી બીજના પાવન પર્વ પૂર્વે ભગવાન જગન્નાથજી, બલભદ્રજી અને સુભદ્રાજીને પરંપરાગત ‘સોનાવેશ’ એટલે કે સુવર્ણ પોશાક ધારણ કરાવવામાં આવ્યો હતો. વર્ષમાં માત્ર 1 જ વાર જોવા મળતા પ્રભુના આ ભવ્ય સ્વરૂપને નિહાળવા માટે વહેલી સવારથી જ મંદિર પરિસરમાં ભક્તોનું ઘોડાપૂર ઉમટી પડ્યું હતું. સમગ્ર વાતાવરણ ‘જય જગન્નાથ’ના નારાથી ગુંજી ઉઠ્યું હતું અને શ્રદ્ધાળુઓ પ્રભુના દિવ્ય તેજને નિહાળીને ધન્યતા અનુભવી રહ્યા હતા. ભગવાનના આ વિશિષ્ટ શણગાર પૂર્વે મંદિરમાં તમામ ધાર્મિક વિધિઓ ખૂબ જ વિધાનપૂર્વક સંપન્ન કરવામાં આવી હતી. કડક સુરક્ષા વ્યવસ્થા વચ્ચે કરોડો રૂપિયાના મૂલ્યના સુવર્ણ આભૂષણોને નીજ મંદિરમાં લાવવામાં આવ્યા હતા. મંદિરના પૂજારીઓ અને ભૂદેવો દ્વારા શાસ્ત્રોક્ત અને વૈદિક મંત્રોચ્ચાર સાથે આ તમામ અલંકારોનું વિશેષ પૂજન કરવામાં આવ્યું હતું. શુદ્ધિકરણની આ પવિત્ર વિધિ બાદ ગર્ભગૃહમાં ભગવાન માટે ખાસ તૈયાર કરવામાં આવેલા રેશમી પીળા વાઘા લાવવામાં આવ્યા હતા અને તાદ્રશ્ય રીતે પ્રભુને આ આભૂષણો અને વાઘા ધારણ કરાવવામાં આવ્યા હતા.

ઐશ્વર્ય અને ભક્તિનો અનોખો સમન્વય

ભગવાન જગન્નાથજીનો આ સોનાવેશ તેમના અખૂટ દિવ્ય વૈભવ અને ઐશ્વર્યનું પ્રતીક માનવામાં આવે છે. સુવર્ણ મુગટ, ભારેખમ હાર, બાજુબંધ અને ચમકતા કુંડળથી સજ્જ નાથનું આ સ્વરૂપ અત્યંત દેદીપ્યમાન અને આકર્ષક લાગી રહ્યું હતું. વર્ષમાં એક જ વાર પ્રાપ્ત થતા આ દુર્લભ દર્શનનો લ્હાવો લેવા માટે રાજ્યભરમાંથી લાખોની સંખ્યામાં શ્રદ્ધાળુઓ ઉમટી પડ્યા હતા. મંદિર પ્રશાસન દ્વારા ભક્તોની આ ભારે ભીડને ધ્યાનમાં રાખીને દર્શન માટે અત્યંત સુચારુ અને સુરક્ષિત વ્યવસ્થાઓ ગોઠવવામાં આવી હતી, જેથી દરેક શ્રદ્ધાળુ શાંતિપૂર્ણ રીતે ભગવાનના આ દિવ્ય સ્વરૂપના દર્શન કરી શકે. આ અલૌકિક દ્રશ્યને નિહાળતી વખતે ભક્તોના ચહેરા પર એક અલગ જ પ્રકારનો આનંદ અને સંતોષ જોવા મળતો હતો. આ શણગાર માત્ર સોનાના ઘરેણાં નથી, પરંતુ તે ભક્તોની અખૂટ શ્રદ્ધા અને સમર્પણની પરાકાષ્ઠા છે. આ પવિત્ર દ્રશ્ય જોઈને એવું લાગતું હતું કે જાણે સાક્ષાત્ પ્રભુ વૈકુંઠમાંથી પધારીને ભક્તોને આશીર્વાદ આપી રહ્યા છે.

રથયાત્રાની પૂર્વતૈયારીઓ

આજના આ ભવ્ય સોનાવેશના દર્શન એ આવતીકાલે નીકળનારી ઐતિહાસિક રથયાત્રાની પૂર્વતૈયારીઓનો જ એક હિસ્સો છે. ભગવાન આજે તેમના આ ભવ્ય સ્વરૂપે બિરાજમાન થઈને ભક્તોને દર્શન આપી રહ્યા છે અને આવતીકાલે તેઓ નગરચર્યાએ નીકળીને ભક્તોના આંગણે પધારશે. રથયાત્રાને લઈને સુરક્ષાની તમામ તૈયારીઓ પૂર્ણ કરી લેવામાં આવી છે અને શહેર પોલીસ તથા વહીવટીતંત્ર દ્વારા કડક બંદોબસ્ત ગોઠવવામાં આવ્યો છે. જમાલપુર મંદિર પરિસર આજે ભક્તિમય વાતાવરણથી તરબતર બની ગયું હતું અને દરેક ભક્તના હૃદયમાં ભગવાન જગન્નાથજી પ્રત્યેની અપાર શ્રદ્ધા સ્પષ્ટપણે વર્તાતી હતી. વર્ષમાં એક વાર થતા આ સુવર્ણ દર્શનનો લ્હાવો લેનારા ભક્તો માટે આજનો દિવસ જીવનભરનું સંભારણું બની ગયો છે. આવતીકાલે નીકળનારી રથયાત્રામાં લાખોની સંખ્યામાં શ્રદ્ધાળુઓ જોડાય તેવી પૂરેપૂરી સંભાવના છે અને પ્રભુ જગન્નાથજીના આશીર્વાદ પ્રાપ્ત કરવા માટે ભક્તો અત્યારથી જ આતુરતાપૂર્વક રાહ જોઈ રહ્યા છે.

આ તકે અમદાવાદના મેયર મેયર હિતેશ બારોટએ જણાવ્યું હતું કે અમદાવાદમાં ભગવાન જગન્નાથની 149મી રથયાત્રાની પૂર્વ સંધ્યાએ અને ગુજરાતના માનનીય મુખ્યમંત્રીના જન્મદિવસ નિમિત્તે વિવિધ લોકકલ્યાણના કાર્યક્રમોનું આયોજન કરવામાં આવ્યું હતું. આ પાવન પ્રસંગે જગન્નાથ મંદિરે દર્શન કરી મુખ્યમંત્રીના દીર્ઘાયુ અને તેઓ લાંબા સમય સુધી ગુજરાતની સેવા કરતા રહે તેવી પ્રાર્થના કરવામાં આવી હતી. રથયાત્રાની પૂર્વ સંધ્યાએ મંદિરની તૈયારીઓની સમીક્ષાના ભાગરૂપે મુલાકાત લેવામાં આવી હતી, જ્યાં સાંજે મુખ્યમંત્રી આવીને આવતીકાલની પરંપરાગત પહિંદ વિધિ કરાવશે, જ્યારે કેન્દ્રીય ગૃહમંત્રી સવારે મંગળા આરતીમાં હાજરી આપશે. અમદાવાદ મહાનગરમાં નીકળનારી આ રથયાત્રા દરમિયાન તમામ નગરજનો શાંતિપૂર્ણ માહોલમાં ભગવાન જગન્નાથના દર્શનનો લાભ લઈ શકે તેવી મંગલ કામના પણ વ્યક્ત કરવામાં આવી હતી.