અમદાવાદ: "અહીં કેક નહીં કપાઈ" કહીને ત્રણ શખ્સો તૂટી પડ્યા! ન્યુ રાણીપમાં મિત્રનો બર્થડે ઉજવવા ગયેલા દેવ બહાદુર પર ચપ્પુના ઘા ઝીંકાયા

અમદાવાદ શહેરના ન્યુ રાણીપ વિસ્તારમાં ગઈકાલે સાંજે મિત્રના જન્મદિવસે કેક કાપવા જેવી અત્યંત નજીવી બાબતે ઉશ્કેરાઈને ત્રણ સ્થાનિક શખ્સોએ એક 17 વર્ષીય સગીર પર ચપ્પુ અને લાકડી વડે જીવલેણ હુમલો કર્યો હોવાની સનસનાટીભરી ઘટના સામે આવી છે. આ હુમલામાં ગંભીર રીતે ઘવાયેલા સગીરને હાલ સોલા સિવિલ હોસ્પિટલના આઈસીયુ વોર્ડમાં સારવાર હેઠળ રાખવામાં આવ્યો છે. સાબરમતી પોલીસે આ મામલે ગુનો નોંધીને ત્વરિત કાર્યવાહી કરતા બે મુખ્ય આરોપીઓની ધરપકડ કરી લીધી છે.

પોલીસ ફરિયાદમાંથી મળતી વિગતો અનુસાર, રાણીપની દરબારગઢની ચાલીમાં રહેતો 17 વર્ષીય સગીર દેવ બહાદુર ૧૨ જુલાઈના રોજ સાંજના સમયે તેના મિત્ર અનિલ રાવલના જન્મદિવસે કેક કાપવા માટે અન્ય ચાર મિત્રો સાથે ન્યુ રાણીપ ઉમીયા તળાવ પાસે ગયો હતો. રાત્રિના સમયે તેઓ જ્યારે કેક કાપી રહ્યા હતા, ત્યારે ત્યાં રહેતા યશ, આકાશ અને અંકિત નામના ત્રણ શખ્સો ત્યાં ધસી આવ્યા હતા અને તેમણે "અહીં કેક નહીં કાપવાની" તેમ કહી ગાળાગાળી શરૂ કરી હતી. દેવે ઝઘડો ન કરવા વિનંતી કરી હોવા છતાં ત્રણેય આરોપીઓ એકદમ ઉશ્કેરાઈ ગયા હતા અને સગીરને ગડદાપાટુનો માર મારવા લાગ્યા હતા.

હુમલાથી બચવા માટે દેવ અને તેના મિત્રો ત્યાંથી ભાગ્યા હતા, પરંતુ આરોપીઓએ તેમનો પીછો ચાલુ રાખ્યો હતો. આનંદ ટેનામેન્ટ પાસે પહોંચતા જ ત્રણેય આરોપીઓએ સગીર દેવને ઘેરી લીધો હતો. આ દરમિયાન આકાશ વાઘેલા નામના શખ્સે પોતાની પાસે રહેલા ચપ્પુ વડે દેવની પીઠ પર અને ડાબી આંખની ઉપરના ભાગે જીવલેણ ઘા ઝીંકી દીધા હતા, જ્યારે અંકિત નામના શખ્સે લાકડી વડે તેને આડેધડ ફટકાર્યો હતો. લોહીલુહાણ હાલતમાં સગીરે પોતાના પિતા જય બહાદુરને ફોન કરતાં પરિવારજનો અને પડોશીઓ તાત્કાલિક દોડી આવ્યા હતા અને ૧૦૮ એમ્બ્યુલન્સ મારફતે તેને સોલા સિવિલ હોસ્પિટલ ખસેડ્યો હતો. આ ધમાલમાં સગીરનો મોબાઈલ પણ ખોવાઈ ગયો હતો.

આ મામલે સગીરના પિતાની ફરિયાદના આધારે સાબરમતી પોલીસે હુમલાખોરો વિરુદ્ધ હત્યાના પ્રયાસ સહિતની ગંભીર કલમો હેઠળ ગુનો નોંધ્યો હતો. સાબરમતી પોલીસ સ્ટેશનના પીઆઈ યુવરાજસિંહ વાઘેલાએ સત્તાવાર માહિતી આપતા જણાવ્યું હતું કે, "ઘટનાની ગંભીરતાને ધ્યાને રાખીને પોલીસે અલગ-અલગ ટીમો બનાવીને ગણતરીના કલાકોમાં જ આ ગુનામાં સામેલ બે આરોપીઓની ધરપકડ કરી લીધી છે. ફેંકી દીધેલા હથિયારો કબજે કરવા અને અન્ય ત્રીજા આરોપીને ઝડપી પાડવા માટે આગળની કાયદેસરની તપાસ અને કાર્યવાહી સઘન રીતે ચાલુ છે."