ખંભાળિયા: ભાણવડમાં પાણીના ટાંકામાં ખાબક્યો મહાકાય આખલો, કલાકોની જહેમત બાદ જીવ બચાવાયો

ખંભાળિયા અને દેવભૂમિ દ્વારકા જિલ્લાના ભાણવડ તાલુકા પંચાયત સામે આવેલા રહેણાક વિસ્તારમાં આજે એક ચોંકાવનારો અને વિલક્ષણ અકસ્માત સર્જાયો હતો. અહીં બનેલી એક ઘટનામાં પાણીના ભોં-ટાકાના માત્ર 2/2 ફૂટના અત્યંત સાંકડા ઢાંકણા (મોં) માંથી એક મહાકાય આખલો અચાનક અંદર ખાબક્યો હતો. ટાંકાનું મોં અત્યંત સાંકડું અને આખલો ખૂબ જ કદાવર હોવાના કારણે તેને ઈજા પહોંચાડ્યા વિના બહાર કાઢવો સ્થાનિક લોકો માટે તદ્દન અશક્ય લાગતો હતો.

આ ઘટના અંગે આસપાસના રહીશો દ્વારા તાત્કાલિક સ્થાનિક જીવદયા સંસ્થા 'એનિમલ લવર્સ ચેરિટેબલ ટ્રસ્ટ'ને જાણ કરવામાં આવી હતી. ઘટનાની ગંભીરતા સમજીને ટ્રસ્ટના અગ્રણી અશોકભાઈ ભટ્ટ તેમની રેસ્કયૂ ટીમ અને નગરપાલિકાના જેસીબી મશીન સાથે મિનિટોમાં જ ઘટનાસ્થળે દોડી આવ્યા હતા. ટાંકાની અંદર ફસાયેલા આખલાને હેમખેમ બહાર કાઢવા માટે અશોકભાઈ ભટ્ટ અને તેમની ટીમે ભારે કોઠાસૂઝ વાપરી હતી. જેસીબી મશીન અને મજબૂત દોરડાની મદદ વડે કલાકોની ભારે જહેમત અને કટોકટીપૂર્ણ મથામણ બાદ, આ કદાવર આખલાને ટાંકામાંથી સુરક્ષિત અને જીવતો બહાર કાઢી લેવામાં સફળતા મળી હતી.

મહાકાય ધણખૂટને ટાંકામાંથી બહાર કાઢતાની સાથે જ એનિમલ લવર્સની ટીમ દ્વારા કોઈ પણ પ્રકારનો વિલંબ કર્યા વિના સ્થળ પર જ તેની પ્રાથમિક સારવાર  કરવામાં આવી હતી. સદનસીબે આખલાને કોઈ ગંભીર ઈજા ન થઈ હોવાથી સારવાર બાદ તેને ત્યાં જ સુરક્ષિત રીતે મુક્ત કરવામાં આવ્યો હતો. ધોળા દિવસે બનેલી આ ઘટના અને સમયસૂચકતા વાપરીને અબોલ જીવનો જીવ બચાવવા માટે હાથ ધરાયેલા આ સફળ રેસ્કયૂ ઓપરેશન બદલ ભાણવડના સ્થાનિક નગરજનોએ અશોકભાઈ ભટ્ટ અને તેમની સમગ્ર ટીમની કામગીરીની મુક્ત કંઠે પ્રશંસા કરી હતી.