પ્રેમ, દગો અને દર્દનાક હત્યા:: રિક્ષાચાલકના પ્રેમમાં પાગલ પત્નીએ પતિને મોતને ઘાટ ઉતારી લાશના ટુકડા કર્યા

મંગેતર કેતનને લોહાગઢ કિલ્લા પરથી ધક્કો મારી મોતને ઘાટ ઉતારનારી સિયાના લવ, દગા અને મર્ડરના કાવતરાની સહી હજુ સુકાઈ નથી, ત્યાં જ નવી મુંબઈમાંથી ક્રૂરતાની તમામ હદો પાર કરતી વધુ એક સનસનાટીભરી મર્ડર મિસ્ટ્રી સામે આવી છે. નવી મુંબઈના એરોલી વિસ્તારમાં એક પરિણીત મહિલા ઓટો રિક્ષા ચાલકના પ્રેમમાં એટલી આંધળી બની ગઈ કે તેણે પોતાના બે બાળકોના પિતા અને પતિની નિર્મમ હત્યા કરી નાખી. એટલું જ નહીં, પુરાવાનો નાશ કરવા માટે લાશના ત્રણ ટુકડા કરી જંગલમાં ફેંકી દીધા હતા. આ ખોફનાક ગુનાને અંજામ આપ્યા બાદ આરોપીઓ 11 મહિના સુધી કાયદાની પકડથી દૂર રહ્યા, પરંતુ આખરે એક નાની ભૂલના કારણે પાપ છાપરે ચડીને પોકાર્યું છે.

અનૈતિક સંબંધો અને હત્યાનું ષડયંત્ર

પોલીસ તપાસમાંથી મળતી વિગતો અનુસાર, મુખ્ય આરોપી મહિલા સુનિતા તેના પતિ બલિરામ સૂર્યનાથ કુશવાહ અને બે બાળકો સાથે એરોલીના યાદવ નગરમાં રહેતી હતી. આ દરમિયાન સુનિતા ધણસોલી વિસ્તારમાં રહેતા ઓટો રિક્ષા ચાલક રાહુલ દશરથ પ્રજાપતિના સંપર્કમાં આવી હતી અને બંને વચ્ચે પ્રેમ સંબંધ બંધાયો હતો. બલિરામને જ્યારે પોતાની પત્નીના આ આડા સંબંધોની જાણ થઈ, ત્યારે તેણે આ બાબતે સુનિતાનો સખત વિરોધ કર્યો હતો. પતિનો આ વિરોધ જ તેના માટે કાળ સાબિત થયો. સુનિતાએ પોતાના પ્રેમી રાહુલ સાથે મળીને બલિરામને હંમેશા માટે રસ્તામાંથી હટાવવાનું ભયાનક ષડયંત્ર રચી નાખ્યું.

ગાઢ નિંદ્રામાં હત્યા અને લાશના ત્રણ ટુકડા

હત્યાના કાવતરાને અંજામ આપવા માટે સુનિતાએ અગાઉથી આયોજન કરીને પોતાના બંને બાળકોને બે દિવસ માટે તેમની માસીના ઘરે મોકલી દીધા હતા. 9 ઓગસ્ટ 2025ની રાત્રે જ્યારે બલિરામ ઘરમાં ગાઢ નિંદ્રામાં સૂઈ રહ્યો હતો, ત્યારે સુનિતા અને તેનો પ્રેમી રાહુલ ઘરમાં દાખલ થયા હતા. બંનેએ ભેગા મળીને પહેલા બલિરામનું ગળું દબાવી દીધું અને ત્યારબાદ ધારદાર હથિયારના ઘા ઝીંકી તેનો જીવ લઈ લીધો હતો.

આ રીતે ફૂટ્યો 11 મહિના જૂનો ભાંડો

આ બિભત્સ હત્યાકાંડને અંજામ આપ્યા બાદ સુનિતાએ યાદવ નગરનું પોતાનું મકાન અન્ય વ્યક્તિને ભાડે આપી દીધું હતું અને પોતે બાળકોને લઈને પ્રેમી રાહુલ સાથે ધણસોલીમાં રહેવા જતી રહી હતી. હત્યાના આશરે 8 મહિના બાદ જ્યારે બલિરામના ભાઈ વતનથી તેને મળવા માટે નવી મુંબઈ આવ્યા, ત્યારે સુનિતાએ જૂઠું બોલીને વાર્તા ઘડી કાઢી કે બલિરામ તેની સાથે ઝઘડો કરીને ઘર છોડીને ક્યાંક ચાલ્યો ગયો છે. જો કે, ભાઈને સુનિતાની વાતો પર શંકા ગઈ હતી. રબાલે એમઆઈડીસી પોલીસે પત્ની સુનિતા અને તેના પ્રેમી ઓટોચાલક રાહુલ પ્રજાપતિ વિરૂદ્ધ મર્ડર અને પુરાવાનો નાશ કરવા સહિતની ગંભીર કલમો હેઠળ ગુનો નોંધી બંનેની ધરપકડ કરી લીધી છે અને આગળની કાયદેસરની કાર્યવાહી હાથ ધરી છે.