સુરત: નળ સે જલ... હવે સીધું રસ્તા પર! વેસુમાં પાઇપલાઇન તૂટતાં લાખો લીટર પાણીનો વેડફાટ

સુરત મહાનગરપાલિકાની હાઇડ્રોલિક વિભાગની બેદરકારીની વધુ એક ઘટના સામે આવી છે. શહેરના પોશ ગણાતા વેસુ વિસ્તારમાં આવેલા મહારાણા પ્રતાપ રોડ પર અચાનક પીવાના પાણીની મુખ્ય લાઈન તૂટી જતાં લાખો લીટર શુદ્ધ પાણી રસ્તા પર વહી ગયું હતું. આ ઘટનાને કારણે આખો રોડ પાણી-પાણી થઈ ગયો હતો અને વાહનચાલકો તેમજ સ્થાનિક રહીશોને ભારે હાલાકીનો સામનો કરવો પડ્યો હતો. પાલિકાની એક પછી એક સામે આવી રહેલી આવી બેદરકારીઓને કારણે જનતામાં વહીવટી તંત્ર સામે ભારે રોષ જોવા મળી રહ્યો છે.

મળતી માહિતી મુજબ, વેસુના વ્યસ્ત એવા મહારાણા પ્રતાપ રોડ પરથી પસાર થતી પાણીની પાઈપલાઈનમાં અચાનક મોટું ભંગાણ પડ્યું હતું. પાઈપલાઈન તૂટવાના કારણે જોતજોતામાં હજારો ગેલન પાણી ફુવારાની જેમ રોડ પર વહેવા લાગ્યું હતું. પાણીનો પ્રવાહ એટલો તેજ હતો કે જોતજોતામાં આખો માર્ગ જળબંબોળ થઈ ગયો હતો. રોડ પર પાણી ભરાઈ જવાના કારણે વાહનચાલકો અટવાઈ પડ્યા હતા અને રસ્તા પર ટ્રાફિક જામની સ્થિતિ સર્જાઈ હતી

ઘટનાની જાણ થતાં જ લાંબો સમય વીતી ગયા બાદ સુરત મહાનગરપાલિકાના હાઇડ્રોલિક વિભાગના અધિકારીઓ અને ટેકનિકલ ટીમ ઘટનાસ્થળે દોડી આવી હતી. પાણીના તેજ પ્રવાહને રોકવા અને કોઈ અકસ્માત ન સર્જાય તે માટે તાત્કાલિક ધોરણે રસ્તા પર બેરિકેડ્સ ગોઠવી દેવામાં આવ્યા હતા અને વાહનોની અવરજવર ડાયવર્ટ કરવામાં આવી હતી. હાલમાં એસએમસીની ટીમ દ્વારા પાઈપલાઈનનું સમારકામ કરવાની કામગીરી હાથ ધરવામાં આવી છે.

સ્થાનિક રહીશોના જણાવ્યા અનુસાર, સુરત મહાનગરપાલિકા દર વર્ષે પ્રી-મોન્સૂન કામગીરી અને મેઇન્ટેનન્સના નામે કરોડો રૂપિયાનો ખર્ચ કરે છે, છતાં ચોમાસાની શરૂઆત થતાં જ ક્યાંક રસ્તાઓ ધોવાઈ જાય છે, ક્યાંક પાળા તૂટે છે તો ક્યાંક આવી રીતે મુખ્ય લાઈનો લીક થઈ જાય છે. એકતરફ શહેરના કેટલાક વિસ્તારોમાં પૂરતું પાણી મળતું નથી, ત્યારે બીજી તરફ તંત્રની બેદરકારીને કારણે આ પ્રકારે લાખો લીટર શુદ્ધ પાણી રસ્તાઓ પર વેડફાઈ રહ્યું છે.