અમદાવાદ :: બાકરોલ સર્કલ પાસે ટ્રક-આઇશર વચ્ચે ભીષણ અકસ્માત, ચાલકનું ઘટનાસ્થળે મોત

કોણે જાણ્યું હતું કે આજે સવારની સામાન્ય શરૂઆત કોઈના જીવનનો અંતિમ દિવસ બની રહેશે? અમદાવાદના સરખેજ-ધોળકા રોડ પર સર્જાયેલા એક ગોઝારા અકસ્માતે આ પરિવારે એક નિર્દોષ વ્યક્તિને કાયમ માટે ગુમાવી દીધો છે. સવારના 7:30 વાગ્યાના સુમારે બાકરોલ સર્કલથી થોડે દૂર ધોળકા તરફ જતા માર્ગ પર એક લોડેડ ટ્રક અને ઈંટો ભરેલા આઈશર વચ્ચે ધડાકાભેર ટક્કર થઈ હતી. આ અકસ્માત એટલો ભયાનક હતો કે ઈંટ ભરેલા આઈશરના ચાલકનું ઘટનાસ્થળે જ કમકમાટીભર્યું મૃત્યુ નીપજ્યું હતું. ઘટનાની જાણ થતા જ આસપાસના લોકો દોડી આવ્યા હતા અને તાત્કાલિક પોલીસને જાણ કરી હતી. પોલીસ કાફલો ઘટનાસ્થળે પહોંચ્યો તે સમયે મૃતકની સ્થિતિ જોઈને સૌ કોઈ હચમચી ગયા હતા. વાહનોની ટક્કર એટલી જોરદાર હતી કે મૃતદેહ આઈશરના કેબિનમાં ફસાઈ ગયો હતો. અંતે ફાયર વિભાગની ટીમને બોલાવવી પડી હતી અને ભારે જહેમત બાદ ગેસ કટર વડે વાહનના પતરા કાપીને મૃતદેહને બહાર કાઢવાની ફરજ પડી હતી. આ અકસ્માતમાં ટ્રક ચાલકને પણ પગના ભાગે ગંભીર ઈજાઓ પહોંચી છે, જેને તાત્કાલિક સારવાર અર્થે હોસ્પિટલ ખસેડવામાં આવ્યો હતો.

અપૂર્ણ રોડ અને તંત્રની ઘોર બેદરકારી

આ દુર્ઘટના પાછળ સ્થાનિકો તંત્રની કામગીરી પર ગંભીર સવાલો ઉઠાવી રહ્યા છે. છેલ્લા કેટલાક વર્ષોથી આ રોડનું નિર્માણ કાર્ય ચાલી રહ્યું છે, જેમાં બાકરોલ સર્કલથી ધોળકા તરફ જતા માર્ગ પર અંદાજે 50 થી 100 મીટરનો રોડ લાંબા સમયથી અધૂરો હતો જે હવે બનાવવામાં આવી રહ્યો છે. આ કામગીરીને કારણે અંદાજે 1 કિલોમીટર સુધીનો માર્ગ વન-વે કરી દેવામાં આવ્યો છે, જે આ અકસ્માતનું મુખ્ય કારણ માનવામાં આવે છે. સૌથી મોટી ચિંતાની વાત એ છે કે, 8 કિલોમીટરથી વધુ લાંબા આ નવા બનેલા રોડ પર ક્યાંય પણ સાઈન બોર્ડ લગાવવામાં આવ્યા નથી. વાહનચાલકોને રોડની સ્થિતિ કે વળાંક વિશે કોઈ અગાઉથી ચેતવણી મળતી નથી, જેના કારણે અકસ્માતોનું જોખમ વધી રહ્યું છે. સ્થાનિક રહીશોનું કહેવું છે કે તંત્રની આ આંધળી ગતિ અને સુવિધાના અભાવે નિર્દોષ લોકોએ જીવ ગુમાવવાનો વારો આવ્યો છે.

ગામના સરપંચની તંત્ર સામે લાલ આંખ

કાસીન્દ્રા ગામના સરપંચે આ મામલે તંત્રની કામગીરી સામે ભારે રોષ વ્યક્ત કર્યો છે. તેમણે જણાવ્યું હતું કે, રોડ એન્ડ બિલ્ડિંગ વિભાગ દ્વારા બાકરોલથી ધોળકા સુધી ફોર લેન આરસીસી રોડ તો બનાવી દેવાયો છે, પરંતુ સુરક્ષાના કોઈ જ માપદંડો પાળવામાં આવ્યા નથી. બાકરોલથી ભાત ગામ સુધીના માર્ગ પર માત્ર વિસલપુર ગામ પાસે જ બંને તરફ બંપ લગાવવામાં આવ્યા છે, જ્યારે કાસીન્દ્રા અને અન્ય મહત્વના પોઈન્ટ પર તંત્ર સદંતર નિષ્ક્રિય રહ્યું છે. ખાસ કરીને આગળ ડીવીપી સ્કૂલ આવેલી છે જ્યાં હજારો વિદ્યાર્થીઓ અને વાલીઓ સતત અવરજવર કરતા હોય છે, છતાં ત્યાં કોઈ જ ગતિ અવરોધક (બંપ) મૂકવામાં આવ્યા નથી. આ ઉપરાંત નાના છાપરા પાસે આવેલા પાર્શ્વનાથ જૈન દેરાસર જેવા ધાર્મિક અને ભીડભાડ વાળા વિસ્તારોમાં પણ સુરક્ષા વ્યવસ્થા શૂન્ય છે.

તંત્રના અધિકારીઓને વારંવાર રજૂઆતો કરવા છતાં કોઈ જ કાર્યવાહી કરવામાં આવતી નથી. વાહનચાલકો આ નવા રોડ પર બેફામ ગતિએ વાહનો હંકારી રહ્યા છે, જેના કારણે કોઈપણ સમયે અન્ય કોઈ મોટો અકસ્માત સર્જાઈ શકે તેવી ભીતિ સેવાઈ રહી છે. હવે કાસીન્દ્રાના સરપંચે સ્પષ્ટ શબ્દોમાં ચેતવણી આપી છે કે જો વહીવટી તંત્ર દ્વારા વહેલી તકે સાઈન બોર્ડ કે બંપ મૂકવામાં નહીં આવે, તો પંચાયત પોતાના મર્યાદિત બજેટમાંથી જાતે જ પ્લાસ્ટિકના બંપ લગાવીને ગ્રામજનો અને રાહદારીઓની સુરક્ષા સુનિશ્ચિત કરશે. તંત્રની આ નિષ્ક્રિયતા અને બેદરકારીને કારણે આજે એક પરિવારે પોતાનો મોભી ગુમાવ્યો છે, પરંતુ જો હવે પણ કડક પગલાં નહીં લેવાય તો આગામી સમયમાં વધુ જાનહાનિ થવાની શક્યતા નકારી શકાય તેમ નથી.