જામનગરના સિક્કામાં ત્રિપલ તલાક આપનાર સામે ગુનો નોંધાયો: પોલીસ મથકની બહાર જ પતિએ પત્નીને ત્રણ વાર 'તલાક' કહેતા ગુનો દાખલ

જામનગર જિલ્લાના સિક્કા પોલીસ મથકમાં ત્રિપલ તલાકનો એક ચોંકાવનારો મામલો સામે આવ્યો છે. અહીં એક પરિણીતાની ફરિયાદના આધારે પોલીસે તેના પતિ સામે મુસ્લિમ મહિલા અધિનિયમ, 2019 ની કલમ 4 હેઠળ ગુનો નોંધ્યો છે. સમાધાન માટે બોલાવાયેલા પતિએ પોલીસ મથકની બહાર જ પત્નીને ત્રણ વખત 'તલાક' ઉચ્ચારીને સંબંધ તોડી નાખતા ભારે ચકચાર મચી જવા પામી છે.

લગ્નના 3 વર્ષ બાદ શરૂ થયો ત્રાસ, પતિને અન્ય યુવતી સાથે હતો પ્રેમસંબંધ 

પોલીસ ફરિયાદમાં જણાવ્યા અનુસાર, સિક્કા ખાતે રહેતી હીનાબેનના લગ્ન વર્ષ 2020 માં સલાયાના રહેવાસી હસન હમીદ ભાયા સાથે મુસ્લિમ રીતિ-રિવાજ મુજબ થયા હતા. લગ્નના શરૂઆતના 3 વર્ષ સુધી તેમનું દામ્પત્ય જીવન ખૂબ જ સારી રીતે ચાલ્યું હતું. જોકે, ત્યારબાદ પતિએ નાની-નાની બાબતોમાં ઝઘડા કરી ગાળો બોલવાની અને મારપીટ કરવાની શરૂઆત કરી દીધી હતી. બીજી પુત્રીના જન્મ બાદ પતિના વર્તનમાં વધુ ફેરફાર આવ્યો હતો. ફરિયાદ મુજબ, પતિને અન્ય એક યુવતી સાથે પ્રેમસંબંધ બંધાયો હતો અને તે તેની સાથે લગ્ન કરવા માંગતો હોવાથી પત્ની પર શારીરિક અને માનસિક અત્યાચાર વધારી દીધા હતા.

પિયરમાં રહેતી પત્ની સાથે સમાધાનના પ્રયાસો રહ્યા નિષ્ફળ 

પતિના સતત ત્રાસથી કંટાળીને અને બાદમાં પતિ ઘર છોડીને ચાલ્યો જતાં, ફરિયાદી મહિલા છેલ્લા 4 મહિનાથી પોતાની બંને પુત્રીઓ સાથે પિયર સિક્કામાં રહે છે. અગાઉ બંને પક્ષના પરિવારજનો દ્વારા ભેગા મળીને સમાધાન કરવાના અનેક પ્રયાસો પણ કરવામાં આવ્યા હતા, પરંતુ તેમાં કોઈ સફળતા મળી ન હતી.

પોલીસ મથક બહાર જ ઉચ્ચાર્યા ત્રિપલ તલાક 

દરમિયાન, સિક્કા પોલીસ મથકમાં કરવામાં આવેલી એક અરજી સંદર્ભે બંને પક્ષોને વાતચીત અને નિવારણ માટે બોલાવવામાં આવ્યા હતા. આ સમયે પોલીસ મથકની બહાર જ પતિ હસન હમીદે ઉશ્કેરાઈ જઈને જાહેરમાં પોતાની પત્નીને ત્રણ વખત 'તલાક' ઉચ્ચારીને તલાક આપી દીધા હોવાનો ગંભીર આક્ષેપ ફરિયાદમાં કરવામાં આવ્યો છે. આ સમગ્ર ઘટનાક્રમ બાદ પરિણીતાએ હિંમત દાખવીને પતિ વિરુદ્ધ કાયદેસરની પોલીસ ફરિયાદ નોંધાવી હતી. સિક્કા પોલીસે ફરિયાદના આધારે મુસ્લિમ મહિલા અધિનિયમ હેઠળ ગુનો નોંધી આરોપી પતિની ધરપકડ કરવા માટે ચક્રો ગતિમાન કર્યા છે. આગામી સમયમાં પોલીસ દ્વારા આ મામલે સાક્ષીઓના નિવેદનો અને વધુ સઘન તપાસ હાથ ધરવામાં આવશે.