સુરતમાં ચોંકાવનારી ઘટના:: ન્યાય અપાવનાર વકીલ જ બન્યો આરોપી, સગીર પર દુષ્કર્મ કેસમાં સચીન GIDC પોલીસે ઝડપી પાડ્યો

સુરતમાં કાયદાની રક્ષા કરનાર એક વકીલ સામે જ ગંભીર આરોપો સામે આવ્યા છે. સચીન GIDC પોલીસે પોતાના જ અસીલની 13 વર્ષ 6 માસની સગીરા દીકરી પર દુષ્કર્મ આચરવાના આરોપસર વકીલ પ્રણયરાજ ગોવિંદભાઈ રણવીરને ગણતરીના કલાકોમાં ઝડપી પાડ્યો છે. આરોપી સામે ભારતીય ન્યાય સંહિતા (BNS) અને પોક્સો (POCSO) એક્ટ હેઠળ ગંભીર ગુનો નોંધવામાં આવ્યો છે.

ન્યાય અપાવનાર વકીલ પર જ વિશ્વાસઘાતનો આરોપ

મળતી માહિતી મુજબ, સગીરા અગાઉ અપહરણ અને દુષ્કર્મના કેસનો ભોગ બની હતી. આ કેસમાં પરિવારને ન્યાય અપાવવા માટે વકીલ પ્રણયરાજ રણવીરને કાયદાકીય કાર્યવાહી માટે રાખવામાં આવ્યા હતા. જોકે, આ જ વકીલે વિશ્વાસનો ભંગ કરી સગીરાને પોતાની હવસનો શિકાર બનાવી હોવાનો આરોપ છે.

ઘરકામની લાલચ આપી સગીરાને લઈ ગયો

પોલીસના જણાવ્યા મુજબ, આરોપી વકીલે સગીરાના પરિવારનો સંપર્ક કરીને તેને ઘરકામ માટે નોકરી પર રાખવાની વાત કરી હતી. પરિવારને વિશ્વાસમાં લઈને સગીરાને પોતાના સાથે લઈ ગયો હતો. આરોપીએ અગાઉના કેસમાં નુકસાન કરવાની ધમકી આપી સગીરાના પરિવાર પર દબાણ બનાવ્યું હોવાનો પણ આરોપ છે. આરોપી સગીરાને પોતાની કારમાં ડિંડોલી વિસ્તારમાં આવેલા પોતાના રહેણાંક મકાન ખાતે લઈ ગયો હતો. જ્યાં તેણે સગીરા સાથે બળજબરીપૂર્વક દુષ્કર્મ આચર્યું હોવાનો આરોપ છે. એટલું જ નહીં, ઘટનાનો વીડિયો ઉતાર્યો હોવાની પણ પોલીસ ફરિયાદમાં વિગતો સામે આવી છે.

સચીન GIDC પોલીસે તાત્કાલિક કાર્યવાહી કરી આરોપીને ઝડપી પાડ્યો

સગીરાના પરિવાર દ્વારા સચીન GIDC પોલીસ સ્ટેશનમાં ફરિયાદ નોંધાવવામાં આવતા પોલીસે મામલાની ગંભીરતા ધ્યાનમાં લઈને તાત્કાલિક કાર્યવાહી શરૂ કરી હતી. પોલીસે ટેકનિકલ અને અન્ય પુરાવાના આધારે આરોપી પ્રણયરાજ ગોવિંદભાઈ રણવીર (ઉં.વ. 43, વ્યવસાયે વકીલ, રહે. ડિંડોલી, સુરત)ની ધરપકડ કરી હતી. પોલીસે આરોપીનો મોબાઈલ ફોન, કાર સહિતના મહત્વના પુરાવા કબજે કર્યા છે અને સમગ્ર મામલે વધુ તપાસ હાથ ધરી છે.

ACPનું નિવેદન: આરોપીને કડકમાં કડક સજા અપાવવા પ્રયાસ

સુરત પોલીસના ACP સુનિલ તરડેએ જણાવ્યું હતું કે, તારીખ 13/07/2024ના રોજ સચીન GIDC પોલીસ સ્ટેશનમાં ફરિયાદ નોંધાવવામાં આવી હતી. ફરિયાદમાં જણાવાયું હતું કે સગીરા અગાઉના દુષ્કર્મ કેસમાં પીડિતા હતી અને તે કેસમાં કાર્યવાહી માટે વકીલ પ્રણયરાજ રણવીરને નિમવામાં આવ્યા હતા.

ACPએ જણાવ્યું કે, આરોપીએ સગીરાના પરિવારને વિશ્વાસમાં લઈને તેને ઘરકામના બહાને પોતાની પાસે બોલાવી હતી અને ત્યારબાદ દુષ્કર્મ આચર્યું હતું. ફરિયાદ મળતા જ પોલીસે તાત્કાલિક ગુનો નોંધી આરોપીની ધરપકડ કરી છે. હાલ આરોપીને કોર્ટમાં રજૂ કરી પોલીસ કસ્ટડી રિમાન્ડની માંગણી કરવામાં આવશે.  પોલીસ દ્વારા સમગ્ર મામલે ટેકનિકલ પુરાવા, મૌખિક પુરાવા અને અન્ય જરૂરી પુરાવા એકત્રિત કરવામાં આવી રહ્યા છે. પોલીસનું કહેવું છે કે આરોપીને કાયદાની જોગવાઈ મુજબ કડકમાં કડક સજા થાય તે માટે તમામ જરૂરી કાર્યવાહી કરવામાં આવશે.