અમદાવાદ: અમદાવાદ: સ્કૂલની સામાન્ય બોલાચાલી બાદ ક્રિકેટ મેદાનમાં હિંસા, દંડા-બેલ્ટથી હુમલો કરનાર ઝડપાયા

અમદાવાદના વસ્ત્રાલ વિસ્તારમાં આવેલું એક ક્રિકેટનું મેદાન ગઈકાલે સાંજે અચાનક રણમેદાનમાં ફેરવાઈ ગયું હતું. સામાન્ય શાળાકીય બોલાચાલી અને યુનિફોર્મ પર પાણી ઉડવા જેવી નજીવી બાબતનું મનદુઃખ એટલી હદે વધી ગયું કે, આઠ શખ્સોના ટોળાએ મેદાનમાં હાજર યુવકો પર જીવલેણ હુમલો કરી દીધો હતો. આ ઘટનામાં 19 વર્ષીય પ્રિયંશ હરીશ કુશવાહ નામના યુવકને પગમાં ગંભીર ફ્રેક્ચર જેવી ઈજાઓ પહોંચતા તેને સારવાર માટે હોસ્પિટલમાં ખસેડવામાં આવ્યો છે. આ સમગ્ર મામલે રામોલ પોલીસે ત્વરિત કાર્યવાહી કરીને મુખ્ય આરોપીઓની ધરપકડ કરી કાયદાકીય પ્રક્રિયા હાથ ધરી છે.

ગ્રાઉન્ડ પર આતંક અને ગાડી ચઢાવવાનો પ્રયાસ

ફરિયાદ અનુસાર, ઘટનાના દિવસે ફરિયાદી પ્રિયંશ અને તેના મિત્રો વસ્ત્રાલમાં ગોપી ડેરી પાસે આવેલા ક્રિકેટના મેદાનમાં રમી રહ્યા હતા. તે સમયે અક્ષય પંચાલ અને ક્રિષ્ના નામના શખ્સોએ સાતથી આઠ અજાણ્યા માણસો સાથે મળીને ત્યાં આવીને હુમલો કર્યો હતો. હુમલાખોરોએ લાકડીઓ, કમરના બેલ્ટ અને ક્રિકેટની સ્ટીકનો ઉપયોગ કરીને પ્રિયંશ તથા તેના મિત્રોને માર માર્યો હતો. સ્થિતિ એટલી હદે વણસી હતી કે આરોપીઓએ મેદાનમાં પૂરઝડપે કાર દોડાવીને ફરિયાદી પર કાર ચઢાવી દેવાનો પણ પ્રયાસ કર્યો હતો, જેનાથી આસપાસના લોકોમાં ભારે ફફડાટ ફેલાઈ ગયો હતો.

પોલીસની તપાસ અને ખુલાસા

વિ.ડી.મોરી, Piએ જણાવ્યું હતું કે ઘટનાની જાણ થતા જ રામોલ પોલીસ સ્ટેશનનાનો સ્ટાફ તાત્કાલિક ઘટનાસ્થળે પહોંચી ગયો હતો. પોલીસ તપાસમાં બહાર આવ્યું છે કે આ હુમલાખોરોમાં સામેલ વિશેષ ઉર્ફે ગામુ અને શિવા સંજય સુમરા (બંને 19 વર્ષના) મુખ્ય આરોપીઓ છે, જેમની પોલીસે ધરપકડ કરી છે. આ સિવાય અન્ય 3 સગીરો પણ આ ગુનામાં સંડોવાયેલા હોવાનું સામે આવતા તેમને જુવેનાઇલ જસ્ટિસ બોર્ડ સમક્ષ રજૂ કરવામાં આવ્યા છે. પોલીસની પૂછપરછમાં એવું પણ જાણવા મળ્યું કે, આરોપી ગામુ જે કાર લઈને ઘટનાસ્થળે આવ્યો હતો, તે વાસ્તવમાં જે ગેરેજમાં તે કામ કરે છે ત્યાં રિપેરિંગ માટે આવી હતી.

સ્કૂલની સામાન્ય તકરારનો ખૌફનાક અંત

આ સમગ્ર મામલે પોલીસે વિવિધ કલમો હેઠળ ગુનો નોંધીને કાયદેસરની કાર્યવાહી શરૂ કરી છે. પ્રાથમિક તપાસમાં એવું સ્પષ્ટ થયું છે કે આરોપીઓ અને ફરિયાદી એક જ શાળામાં અભ્યાસ કરે છે અને ભૂતકાળમાં સ્કૂલના ગણવેશ પર પાણી ઉડવા જેવી સામાન્ય ઘટનાઓ પરથી તેમની વચ્ચે તકરાર થઈ હતી. આ જૂની અદાવત રાખીને જ આરોપીઓએ આયોજનબદ્ધ રીતે ક્રિકેટના મેદાનમાં આવીને આ હુમલો કર્યો હતો. પોલીસ હાલ બાકીના ફરાર આરોપીઓની શોધખોળ કરી રહી છે.