રાજકોટમાં કોંગ્રેસના રાષ્ટ્રીય પ્રવક્તા: ચૌધરીની ગર્જના, રામ મંદિરમાં 40 દિવસમાં 70 વાર ચોરી થઈ'!

ઓલ ઈન્ડિયા કોંગ્રેસ કમિટીના રાષ્ટ્રીય પ્રવક્તા રીતુ ચૌધરીએ રાજકોટની મુલાકાત દરમિયાન અયોધ્યા રામ મંદિરમાં થયેલી ચોરીના મુદ્દે ભાજપ અને ઉત્તર પ્રદેશ સરકાર પર આકરા પ્રહારો કર્યા છે. તેમણે આક્ષેપ કર્યો છે કે દેશના કરોડો રામભક્તોના દાન પર સત્તાધીશો ખાનગી ધનની જેમ બેફામ લૂંટ ચલાવી રહ્યા છે અને માત્ર 40 દિવસમાં 70 વાર થયેલી આ ચોરીની તપાસમાં માનીતા અધિકારીઓને SIT સોંપીને સમગ્ર મામલા પર પડદો પાડવાનો પ્રયાસ થઈ રહ્યો છે.

જનતાના દાનને ખાનગી ધન સમજી બેફામ લૂંટ ચલાવાઈ

કોંગ્રેસના રાષ્ટ્રીય પ્રવક્તા રીતુ ચૌધરીએ જણાવ્યું હતું કે, દેશની કરોડો જનતાએ ભગવાન શ્રી રામના ભવ્ય મંદિરના નિર્માણ માટે પોતાની અતૂટ શ્રદ્ધા અને આસ્થા સાથે ₹૧૧ થી લઈને લાખો રૂપિયા સુધીનું યથાશક્તિ દાન આપ્યું છે. દેશના ગરીબ અને સામાન્ય નાગરિકોએ પણ પોતાની પરસેવાની કમાણી રામ મંદિરના ચરણોમાં અર્પણ કરી છે. પરંતુ અત્યારે સત્તા પર બેઠેલા લોકો આ જનતાના દાનને પોતાનું વ્યક્તિગત અને ખાનગી ધન સમજીને બેઠા છે અને પ્રભુના મંદિરમાં બેફામ લૂંટ ચલાવી રહ્યા છે.

કોઈ બહારનો ચોર નથી આવ્યો, ચોકીદારે જ ચોરી કરી છે

રામ મંદિરમાં થયેલી ચોરી અંગે તીખા કટાક્ષ કરતા રીતુ ચૌધરીએ ઉમેર્યું કે, "રામ મંદિરમાં ચોરી કરવા માટે બહારથી કોઈ ચોર નથી આવ્યો. જેમને મંદિરની અને લોકોના દાનની સુરક્ષા કરવાની જવાબદારી સોંપવામાં આવી હતી, તે ચોકીદાર દ્વારા જ આ ચોરી કરવામાં આવી છે." તેમણે આક્ષેપ કર્યો હતો કે ઇતિહાસમાં મહંમદ ગઝનવીએ જેટલી લૂંટ ચલાવી હતી, તેના કરતાં પણ વધુ ક્રૂરતાપૂર્વક માત્ર 40 દિવસમાં 70 વાર મંદિરમાં ચોરી કરવામાં આવી છે, જે અત્યંત આઘાતજનક અને શરમજનક બાબત છે.

તપાસના નામે નાટક: માનીતા અધિકારીઓને SIT ની કમાન

આ કૌભાંડ અને ચોરીની તપાસ અંગે ઉત્તર પ્રદેશ સરકારને આડે હાથ લેતા કોંગ્રેસ પ્રવક્તાએ જણાવ્યું કે, આટલી મોટી ચોરી બહાર આવ્યા પછી પણ સરકાર તટસ્થ તપાસ કરવાના મૂડમાં નથી. આ સમગ્ર મામલા પર પડદો પાડવા અને સત્ય છુપાવવા માટે શાસક પક્ષના માનીતા અધિકારીઓને જ આ સ્પેશિયલ ઇન્વેસ્ટિગેશન ટીમની કમાન સોંપી દેવામાં આવી છે. આનાથી સ્પષ્ટ થાય છે કે સરકાર પોતાના મળતિયાઓને બચાવવાનો પ્રયાસ કરી રહી છે. ચૌધરીએ છેલ્લે જણાવ્યું કે, કોંગ્રેસ પક્ષ દેશના કરોડો રામભક્તોની આસ્થા અને તેમના દાનના એક-એક રૂપિયાનો હિસાબ માંગે છે અને આ મામલે સુપ્રીમ કોર્ટની દેખરેખ હેઠળ નિષ્પક્ષ તપાસ થાય તેવી માંગ કરે છે.