કોમી એકતાની મિસાલ: રથયાત્રા પૂર્વે મુસ્લિમ આગેવાનો જગન્નાથ મંદિર પહોંચ્યા, મહંત દિલીપદાસજી મહારાજને સીદી સૈયદની જાળીની પ્રતિકૃતિ ભેટ આપી

અમદાવાદના ઐતિહાસિક અને આસ્થાના કેન્દ્ર સમાન જમાલપુર સ્થિત ભગવાન જગન્નાથ મંદિર ખાતેથી આગામી સમયમાં નીકળનારી 149મી ભવ્ય રથયાત્રા પૂર્વે આજે કોમી એકતા અને પરસ્પર ભાઈચારાનો એક સુંદર અને અનોખો સંદેશો જોવા મળ્યો હતો. રથયાત્રાના ભવ્ય પ્રસ્થાન પૂર્વે વર્ષોની પરંપરાને જીવંત રાખતા મુસ્લિમ સમુદાયના અગ્રણી આગેવાનોએ જગન્નાથ મંદિરની મુલાકાત લીધી હતી અને મંદિરના મહંત દિલીપદાસજી મહારાજ સાથે આત્મીય શુભેચ્છા મુલાકાત યોજી હતી.

આ પ્રસંગે હાજર રહેલા મુસ્લિમ સમાજના પ્રતિષ્ઠિત આગેવાનોએ જગન્નાથ મંદિરના મહંત ભાવભીનું અભિવાદન કર્યું હતું. આગેવાનો દ્વારા મહંતશ્રીને એક વિશેષ મોમેન્ટો તેમજ અમદાવાદના ઐતિહાસિક વારસા સમાન વિખ્યાત 'સીદી સૈયદની જાળી'ની સુંદર પ્રતિકૃતિ ભેટ સ્વરૂપે અર્પણ કરવામાં આવી હતી. આ ભેટ અમદાવાદની ધર્મનિરપેક્ષ સંસ્કૃતિ અને વર્ષો જૂની ભાઈચારાની પરંપરાનું પ્રતીક બની રહી હતી. મહંત દિલીપદાસજી મહારાજે પણ મંદિરે પધારેલા તમામ મુસ્લિમ મહેમાનોનું ઉષ્માભર્યું સ્વાગત કર્યું હતું.

તેમણે કોમી એકતાની આ પવિત્ર પરંપરાને બિરદાવતા મંદિરે પધારેલા તમામ પ્રતિષ્ઠિત અગ્રણીઓ અને ભગિનીઓને આદરપૂર્વક રેશમી ખેસ પહેરાવીને સન્માનિત કર્યા હતા. મહંતએ આ પ્રસંગે જણાવ્યું હતું કે, આપણો વર્ષો જૂનો પરસ્પર સૌહાર્દ અને ભાઈચારો જ આપણી સાચી શક્તિ છે. રથયાત્રા હંમેશાં સૌને સાથે મળીને ચાલવાનો અને એકતાનો દિવ્ય સંદેશ આપે છે. આ શુભેચ્છા મુલાકાત દરમિયાન જાણીતા રાજકીય આગેવાન સાબિરભાઈ કાબલીવાલા, ઈકબાલ શેખ સહિત મુસ્લિમ સમાજના અનેક અગ્રણીઓ, બુદ્ધિજીવીઓ તેમજ મોટી સંખ્યામાં મહિલાઓ પણ વિશેષ રૂપે ઉપસ્થિત રહી હતી.

તમામ ઉપસ્થિતોએ એકબીજાને રથયાત્રાની શુભકામનાઓ પાઠવી હતી અને શહેરની શાંતિ, સુખાકારી અને પ્રગતિ માટે પ્રાર્થના કરી હતી. રથયાત્રા પૂર્વે યોજાયેલી આ મુલાકાતે ફરી એકવાર સાબિત કર્યું છે કે અમદાવાદની ગંગા-જમના સંસ્કૃતિ આજે પણ એટલી જ મજબૂત અને અતૂટ છે. આ પ્રસંગ સમગ્ર ગુજરાતમાં કોમી એકતા અને શાંતિના એક સુખદ સંદેશા તરીકે પ્રસર્યો છે.