પૂર્વ કચ્છમાં 'નો ડ્રગ્સ' ઝુંબેશ: રાપરમાંથી કેતામીન ડ્રગ્સ સાથે એક ઝડપાયો, સપ્લાય નેટવર્કના બે આરોપી ફરાર

પૂર્વ કચ્છમાં નશાના કાળા કારોબાર સામે ચલાવવામાં આવી રહેલા NO DRUGS IN EAST KUTCHH CAMPAIGN અંતર્ગત રાપર પોલીસને એક મોટી સફળતા હાથ લાગી છે. શહેરના બજાર વિસ્તારમાંથી પોલીસે પ્રતિબંધિત કેતામીન ડ્રગ્સ સાથે એક યુવકની ધરપકડ કરી છે. આ મામલે સપ્લાય નેટવર્કમાં સંડોવાયેલા ગાંધીધામ અને અંજારના બે શખ્સો વોન્ટેડ જાહેર કરાયા છે.

બાતમીના આધારે બજારમાં ઘેરાબંધી

જિલ્લામાં ગેરકાયદેસર માદક પદાર્થોની હેરફેર નાબૂદ કરવાના વિશેષ અભિયાન હેઠળ પોલીસ સતત વોચ રાખી રહી હતી. આ દરમિયાન પોલીસને ચોક્કસ બાતમી મળી હતી કે અયોધ્યાપુરી વિસ્તારમાં રહેતો તુષાર હિતેશભાઈ સોની નામનો શખ્સ ડ્રગ્સ સાથે ફરી રહ્યો છે. બાતમીના આધારે પોલીસ ઇન્સ્પેક્ટર આર. એલ. ખટાણાના નેતૃત્વમાં એક ટીમે રાપર બજારમાં ભુતીયા કોઠા નજીક આવેલી રતનેશ્વર જવેલર્સ પાસે ઘેરાબંધી કરી હતી અને શંકાસ્પદ યુવકને ઝડપી પાડ્યો હતો.

55,120 રૂપિયાનો મુદ્દામાલ જપ્ત

પોલીસે યુવકની સઘન તલાશી લેતા તેની પાસેથી અંદાજે 5.120 ગ્રામ કેતામીન નામનું પ્રતિબંધિત ડ્રગ્સ મળી આવ્યું હતું. આ ડ્રગ્સ અને એક આઇફોન મોબાઇલ મળીને પોલીસે કુલ 55,120 રૂપિયાનો મુદ્દામાલ જપ્ત કર્યો છે. યુવકની અટકાયત કરીને તાત્કાલિક પૂછપરછ હાથ ધરવામાં આવી હતી.

ગાંધીધામ અને અંજાર સુધી જોડાયેલા છે નેટવર્કના તાર

પકડાયેલા આરોપી તુષાર સોનીની પ્રાથમિક પૂછપરછમાં ડ્રગ્સ સપ્લાય અંગે ચોંકાવનારી વિગતો સામે આવી હતી. ડ્રગ્સ પહોંચાડવામાં ગાંધીધામના ઇમરાન રાયમા અને અંજારના સમીર ઇમતીયાજ રાયમાની સંડોવણી ખુલતા પોલીસે બંનેને ફરાર સપ્લાયર તરીકે ગુનામાં દર્શાવ્યા છે. આ બંને ફરાર આરોપીઓને ઝડપી પાડવા પોલીસની અલગ-અલગ ટીમો કામે લગાડવામાં આવી છે.

NDPS એક્ટ હેઠળ ગુનો નોંધાયો

આ સમગ્ર પ્રકરણમાં રાપર પોલીસ સ્ટેશનમાં ત્રણેય આરોપીઓ વિરુદ્ધ NDPS એક્ટની કલમ 8(C), 22(A) અને 29 હેઠળ ગુનો દાખલ કરવામાં આવ્યો છે. પૂર્વ કચ્છ પોલીસે સ્પષ્ટ કર્યું છે કે જિલ્લામાં નશાના વેપાર સામે ઝીરો ટોલરન્સની નીતિ અપનાવવામાં આવી છે. હવે પકડાયેલો આ ડ્રગ્સનો જથ્થો ક્યાંથી આવ્યો, તેનો ઉપયોગ કોના સુધી પહોંચવાનો હતો અને તેની પાછળ કોઈ મોટું નેટવર્ક કામ કરી રહ્યું છે કે કેમ, તે દિશામાં પોલીસે તપાસનો ધમધમાટ વધુ તેજ કર્યો છે.