વડોદરા: MS યુનિવર્સિટી ફરી લોહીયાળ બની, સાયન્સ ફેકલ્ટીમાં ABVP અને NSUI વચ્ચે પથ્થરમારો!

વડોદરાની વૈશ્વિક ખ્યાતિ ધરાવતી મહારાજા સયાજીરાવ યુનિવર્સિટી ફરી એકવાર વિદ્યાર્થી સંગઠનોની અંદરોઅંદરની લડાઈ અને ગુંડાગર્દીના કારણે ચર્ચામાં આવી છે. યુનિવર્સિટીની સાયન્સ ફેકલ્ટીમાં આવેલી જિઓલોજી ડિપાર્ટમેન્ટ પાસે સામાન્ય બાબતમાં શરૂ થયેલી બોલાચાલીએ જોતજોતામાં ઉગ્ર સ્વરૂપ ધારણ કરી લીધું હતું. નેશનલ સ્ટુડન્ટ્સ યુનિયન ઓફ ઈન્ડિયા અને અખિલ ભારતીય વિદ્યાર્થી પરિષદના વિદ્યાર્થી જૂથો વચ્ચે સામસામે પથ્થરમારો અને મારામારી થતાં સમગ્ર કેમ્પસમાં ભયનો માહોલ ફેલાઈ ગયો હતો. આ હિંસક અથડામણમાં બે વિદ્યાર્થીઓ ગંભીર રીતે ઘાયલ થયા છે.

મળતી માહિતી અનુસાર, સાયન્સ ફેકલ્ટીના જિઓલોજી વિભાગ નજીક બંને સંગઠનોના કાર્યકરો કોઈ મુદ્દે સામસામે આવી ગયા હતા. સામાન્ય દલીલો ચાલી રહી હતી તે દરમિયાન અચાનક ઉશ્કેરાઈ ગયેલા NSUIના કાર્યકરોએ ABVPના એક સક્રિય કાર્યકરને જોરદાર લાફો મારી દીધો હતો. જાહેરમાં તમાચો મારી દેવાની આ ઘટના બાદ મામલો અત્યંત બિચક્યો હતો. બંને પક્ષના વિદ્યાર્થી નેતાઓ અને સમર્થકો મોટી સંખ્યામાં ત્યાં એકઠા થઈ ગયા હતા અને વાત કાબૂ બહાર જતી રહી હતી.

શિક્ષણના ધામ ગણાતી યુનિવર્સિટીમાં વિદ્યાર્થી નેતાઓની ખુલ્લેઆમ ગુંડાગર્દી જોવા મળી હતી. લાફાવાળીની ઘટના બાદ બંને જૂથો વચ્ચે પહેલા લાકડીઓ અને લાતોથી મારામારી થઈ હતી, અને ત્યારબાદ મામલો વધુ હિંસક બન્યો હતો. ઉશ્કેરાયેલા વિદ્યાર્થીઓએ કેમ્પસમાં એકબીજા પર છૂટા પથ્થરો ફેંકવાનું શરૂ કરી દીધું હતું. ભરબપોરે શૈક્ષણિક વાતાવરણ વચ્ચે અચાનક થયેલા આ પથ્થરમારાને કારણે સામાન્ય વિદ્યાર્થીઓ અને યુનિવર્સિટીનો સ્ટાફ જીવ બચાવવા માટે આમતેમ દોડતો જોવા મળ્યો હતો. થોડી જ વારમાં આખો વિસ્તાર રણમેદાનમાં ફેરવાઈ ગયો હતો.

એમ. એસ. યુનિવર્સિટીમાં અવારનવાર જૂથ અથડામણ અને મારામારીની ઘટનાઓ સામે આવતી રહે છે. લાખો રૂપિયાનો ખર્ચ કરવા છતાં કેમ્પસની સુરક્ષા વ્યવસ્થા આ પ્રકારના તત્વોને રોકવામાં નિષ્ફળ સાબિત થઈ રહી છે. ધોળા દિવસે પથ્થરોથી થયેલી આ મારામારીએ યુનિવર્સિટીની સિક્યુરિટી એજન્સીની પોલ ખોલી નાખી છે. સામાન્ય વિદ્યાર્થીઓના વાલીઓમાં પણ પોતાના સંતાનોની સુરક્ષાને લઈને ભારે ચિંતા વ્યાપી ગઈ છે. હાલમાં ઘટનાસ્થળે પોલીસ કાફલો તૈનાત કરી દેવામાં આવ્યો છે અને સીસીટીવી ફૂટેજના આધારે તોફાની તત્વોની ઓળખ કરવાની તજવીજ હાથ ધરવામાં આવી છે.