અમદાવાદ: શંકા ન જાય એટલે 'એમડી ડ્રગ્સ' ની બનાવી ચોકલેટ! MD ડ્રગ્સ અને ગાંજો વેચતી મહિલા ઝડપાઈ

અમદાવાદ શહેરમાં નશીલા પદાર્થોના ગેરકાયદેસર વેપાર અને દૂષણને સંપૂર્ણપણે નાબૂદ કરવા માટે મિશન મોડ પર કામ કરી રહેલી અમદાવાદ શહેર પોલીસને એક મોટી સફળતા મળી છે. શહેરના ઝોન-5 પોલીસ અને ગોમતીપુર પોલીસ સ્ટેશનની સંયુક્ત ટીમે એક સંયુક્ત ઓપરેશન હાથ ધરીને ડ્રગ્સ માફિયાઓ સામે કડક કાર્યવાહી કરી છે. આ કાર્યવાહી દરમિયાન ચોકલેટના સ્વરૂપમાં છુપાવીને વેચવામાં આવી રહેલા હાનિકારક એમડી ડ્રગ્સ અને ગાંજાનો મોટો જથ્થો ઝડપી પાડવામાં આવ્યો છે.

ઝોન-5 અને ગોમતીપુર પોલીસની ટીમને ચોક્કસ બાતમી મળી હતી કે ગોમતીપુર વિસ્તારમાં નશીલા પદાર્થોનું મોટા પાયે વેચાણ થઈ રહ્યું છે. પોલીસે સંયુક્ત રીતે દરોડો પાડતા ડ્રગ્સ વેચવાની એક ચોંકાવનારી પદ્ધતિ સામે આવી હતી. આરોપીઓ દ્વારા એમડી ડ્રગ્સને સામાન્ય ચોકલેટ જેવા સ્વરૂપમાં તૈયાર કરવામાં આવતું હતું અને ત્યારબાદ તેને આકર્ષક ચોકલેટ રેપરમાં પેક કરવામાં આવતું હતું. આ કીમિયો એટલા માટે અપનાવવામાં આવ્યો હતો જેથી પોલીસ અથવા અન્ય કોઈ નાગરિકને આ બાબતે સરળતાથી શંકા ન જાય અને ડ્રગ્સની હેરાફેરી તેમજ વેચાણ આસાનીથી થઈ શકે.

આ ગેરકાયદેસર ડ્રગ્સના વેપાર મામલે પોલીસે સ્થળ પરથી એક મહિલા આરોપીની ધરપકડ કરી છે. પકડાયેલી મહિલાનું નામ સીમાબેન છે, જે સૂરજ ઉર્ફે ટકલો રામકિશન દિવાકરની પત્ની છે. પોલીસે આરોપી મહિલા વિરુદ્ધ નાર્કોટિક ડ્રગ્સ એન્ડ સાયકોટ્રોપિક સબસ્ટન્સ એક્ટની વિવિધ કલમો હેઠળ ગુનો નોંધીને તેની સત્તાવાર અટકાયત કરી છે. પ્રાથમિક પૂછપરછમાં ડ્રગ્સને ચોકલેટના કવરમાં વેચવાનું મોટું રેકેટ હોવાનું સામે આવ્યું છે. ગોમતીપુર પોલીસ અને ઝોન-૫ ની ટીમ દ્વારા હવે આ કેસમાં ઊંડાણપૂર્વક તપાસ શરૂ કરવામાં આવી છે.

આ ડ્રગ્સનો જથ્થો ક્યાંથી લાવવામાં આવ્યો હતો, આ નેટવર્કમાં અન્ય કયા સ્થાનિક કે બહારના પેડલરો સામેલ છે અને આ નશીલા પદાર્થો કોને સપ્લાય કરવાના હતા, તે તમામ દિશાઓમાં પોલીસની અલગ-અલગ ટીમો તપાસ ચલાવી રહી છે. આગામી દિવસોમાં આ કેસમાં વધુ ધરપકડ અને ખુલાસા થવાની સંભાવના છે. અમદાવાદ શહેર પોલીસ નાગરિકોને અપીલ કરે છે કે જો આપના વિસ્તારમાં કોઈ આવી શંકાસ્પદ કે નશીલા પદાર્થોના વેચાણની પ્રવૃત્તિ થતી જોવા મળે, તો તુરંત જ પોલીસનો સંપર્ક કરવો. માહિતી આપનારની ઓળખ ગુપ્ત રાખવામાં આવશે.