145-માંજલપુર વિધાનસભા પેટાચૂંટણી: 7 ઉમેદવારોએ 15 ફોર્મ ભર્યા, 30 જુલાઈએ યોજાશે મતદાન

ભારતના ચૂંટણી પંચ દ્વારા જાહેર કરાયેલા કાર્યક્રમ મુજબ, ગુજરાતની 145-માંજલપુર વિધાનસભા બેઠકની આગામી પેટાચૂંટણી માટે ઉમેદવારી પત્રો ભરવાની પ્રક્રિયા પૂર્ણ થઈ ગઈ છે. અંતિમ દિવસ 13 જુલાઈ 2026 સુધીમાં વિવિધ પક્ષો અને અપક્ષ મળીને કુલ 7 ઉમેદવારો તરફથી 15 જેટલા ફોર્મ ચૂંટણી અધિકારીને સુપરત કરવામાં આવ્યા છે. હવે 30 જુલાઈએ આ બેઠક માટે મતદાન યોજાશે.

ચૂંટણીનો કાર્યક્રમ અને મહત્વની તારીખો 

માંજલપુર વિધાનસભાના ચૂંટણી અધિકારી દ્વારા ગત 6 જુલાઈના રોજ ઉમેદવારી પત્ર ભરવા અંગેની સત્તાવાર નોટિસ પ્રસિદ્ધ કરવામાં આવી હતી. નિયત કાર્યક્રમ અનુસાર 13 જુલાઈ 2026 ઉમેદવારી પત્રો ભરવાનો છેલ્લો દિવસ હતો. ભરાયેલા ફોર્મની ચકાસણી 14 જુલાઈના રોજ કરવામાં આવશે, જ્યારે ઉમેદવારી પરત ખેંચવા ઈચ્છતા ઉમેદવારો 16 જુલાઈ સુધી પોતાનું નામ પાછું ખેંચી શકશે.

મેદાનમાં ઉતરેલા ઉમેદવારોની યાદી 

માંજલપુર બેઠક માટે મુખ્ય રાજકીય પક્ષો અને અપક્ષ ઉમેદવારોએ પોતાની દાવેદારી નોંધાવી છે. 13 જુલાઈ સુધીમાં 7 ઉમેદવારોએ ફોર્મ ભર્યા છે. જેમાં સત્યેન્દ્રભાઈ પટેલ (ભારતીય જનતા પાર્ટી), પરેશભાઈ બ્રહ્મભટ્ટ (ભારતીય જનતા પાર્ટી), રત્નસાગર રાજરાજેશ્વર ધુળાભાઈ (ભારતીય જનતા પાર્ટી), ભીખાભાઈ રબારી (ઈન્ડિયન નેશનલ કોંગ્રેસ), ધર્મેશભાઈ પટેલ (ઈન્ડિયન નેશનલ કોંગ્રેસ), દિનેશ રમાકાંત વ્યાસ (રાઈટ ટુ રીકોલ પાર્ટી), રાઠોડ પરેશ વિનોદકુમાર (અપક્ષ) છે. 

સોગંદનામાની વિગતો 24 કલાકમાં ઓનલાઈન જોઈ શકાશે 

ભારતના ચૂંટણી પંચની કડક સૂચના અનુસાર, દરેક ઉમેદવારે પોતાના ફોર્મ સાથે સોગંદનામું (એફિડેવિટ- ફોર્મ-26) રજૂ કરવું ફરજિયાત છે. પારદર્શિતા જાળવવાના ભાગરૂપે, ઉમેદવારો દ્વારા રજૂ કરવામાં આવતા આ સોગંદનામા 24 કલાકની અંદર મુખ્ય નિર્વાચન અધિકારી (ગુજરાત) ની સત્તાવાર વેબસાઈટ પર અપલોડ કરવામાં આવશે. નાગરિકો આ તમામ વિગતો https://ceo.gujarat.gov.in/Home/Affidavits-of-Candidates લિંક પર જઈને ઓનલાઈન જોઈ અને ચકાસી શકશે.

16 જુલાઈના રોજ ફોર્મ પાછા ખેંચવાની મુદત પૂર્ણ થયા બાદ માંજલપુર વિધાનસભા બેઠક પર કેટલા ઉમેદવારો વચ્ચે સીધી ટક્કર થશે તેનું અંતિમ ચિત્ર સ્પષ્ટ થશે. ત્યારબાદ 30 જુલાઈએ શાંતિપૂર્ણ અને ન્યાયી રીતે મતદાન યોજવા માટે વહીવટી તંત્ર દ્વારા અંતિમ તબક્કાની તૈયારીઓ હાથ ધરવામાં આવશે.