ક્રાઈમ એન્ડ જસ્ટિસ: અમદાવાદની એલ.જી. હોસ્પિટલમાં થયેલી હત્યાનો હિસાબ, સીટી સેશન્સ કોર્ટે નરાધમોને ફટકારી આજીવન કારાવાસની સજા

અમદાવાદ શહેરની એલ.જી. હોસ્પિટલ પરિસરમાં વર્ષ 2019માં બનેલા અને સમગ્ર રાજ્યમાં ભારે ચકચાર જગાવનારા ચકચારી હત્યાકાંડ મામલે અમદાવાદ સીટી સેશન્સ કોર્ટે આજે એક મહત્વપૂર્ણ અને ઐતિહાસિક ચુકાદો આપ્યો છે. કોર્ટે હોસ્પિટલ જેવા સંવેદનશીલ જાહેર સ્થળ પર કાયદો અને વ્યવસ્થાના ધજાગરા ઉડાવીને જૂની અદાવતમાં એક યુવકની કરપીણ હત્યા કરનાર કુલ 6 આરોપીઓને દોષિત જાહેર કરી આજીવન કેદની સજા ફટકારી છે. કેસની વિગત અનુસાર, વર્ષ 2019માં રામોલ વિસ્તારમાં બે જૂથો વચ્ચે મોટો ઝઘડો થયો હતો. આ અથડામણમાં રમીઝ નામનો એક યુવક ગંભીર રીતે ઘાયલ થતાં તેને તાત્કાલિક સારવાર માટે મણિનગર સ્થિત એલ.જી. હોસ્પિટલમાં દાખલ કરવામાં આવ્યો હતો, જ્યાં ટૂંકી સારવાર બાદ તેનું મોત નીપજ્યું હતું.

બીજી તરફ, આ જ ઝઘડામાં સામા પક્ષના અમીર શેખ નામના યુવકને પણ ઇજાઓ થઈ હોવાથી તેને પણ સારવાર અર્થે એલ.જી. હોસ્પિટલ ખાતે લાવવામાં આવ્યો હતો. રમીઝના મોતના સમાચાર મળતાં જ તેના સાગરીતો અને ઉશ્કેરાયેલા ટોળાએ હોસ્પિટલને બાનમાં લીધી હતી. આરોપીઓએ કાયદાનો સહેજ પણ ડર રાખ્યા વિના, ઘાતક હથિયારો સાથે હોસ્પિટલની અંદર જ અમીર શેખ પર તૂટી પડ્યા હતા અને તબીબી સ્ટાફ તેમજ હાજર પોલીસ કર્મચારીઓની સામે જ તેની ઘાતકી હત્યા કરી નાખી હતી. આ હુમલાને રોકવા વચ્ચે પડેલા હોસ્પિટલના સ્ટાફ અને ફરજ પરના પોલીસ કર્મચારીઓને પણ ગંભીર ઇજાઓ પહોંચી હતી.

આ મામલે મણિનગર પોલીસ મથકે કુલ 16 જેટલા આરોપીઓ સામે હત્યા, રાયોટિંગ અને સરકારી કર્મચારી પર હુમલો કરવા સહિતની ગંભીર કલમો હેઠળ ગુનો નોંધવામાં આવ્યો હતો. આ કેસ અમદાવાદ સીટી સેશન્સ કોર્ટમાં ચાલી જતાં, સરકારી વકીલ દ્વારા ધારદાર દલીલો અને નક્કર પુરાવા રજૂ કરવામાં આવ્યા હતા, કેસની ગંભીરતાને ધ્યાને રાખીને કુલ 48 મહત્વના સાહેદો (સાક્ષીઓ) ની જુબાની નોંધી હતી અને ૪૮ જેટલા વૈજ્ઞાનિક તથા દસ્તાવેજી પુરાવાઓ તપાસ્યા હતા. આ તમામ પુરાવાઓના આધારે ગુનો સાબિત થતાં કોર્ટે મુખ્ય ૬ આરોપીઓને આજીવન કેદની કડક સજા ફટકારી છે.