સુરત: ચૂંટણી ટાણે 10 આંટા મારતા, હવે મોઢું બતાવતા નથી! કાપોદ્રામાં પીવાના પાણીની અછત વચ્ચે મહિલા કોર્પોરેટર અને સ્થાનિકો વચ્ચે તુતુ-મૈમૈ

સુરત શહેરમાં તાજેતરમાં પડેલા ભારે વરસાદ અને ખાડી પૂરના કારણે અનેક વિસ્તારો જળબંબોળ થયા બાદ હવે વહીવટી તંત્ર અને સ્થાનિક લોકપ્રતિનિધિઓ સામે જનતાનો આક્રોશ ચરમસીમાએ પહોંચ્યો છે. પૂરના પાણી ઓસર્યા બાદ પણ નાગરિકોને પ્રાથમિક સુવિધાઓ મેળવવામાં ભારે હાલાકી ભોગવવી પડી રહી છે, જેના કારણે સ્થાનિકોમાં ભારે રોષ જોવા મળી રહ્યો છે. આવી જ એક ઘટના ગત 12 જુલાઈની રાત્રે કાપોદ્રા વિસ્તારમાં સામે આવી હતી, જ્યાં પીવાના પાણીની ગંભીર સમસ્યાને લઈને લોકોનો ગુસ્સો ફાટી નીકળ્યો હતો.

પ્રાપ્ત વિગતો અનુસાર, કાપોદ્રા વિસ્તારની વિવિધ સોસાયટીઓમાં પૂરની સ્થિતિ બાદ પીવાના શુદ્ધ પાણીની તીવ્ર અછત સર્જાઇ હતી. સ્થાનિક લોકો કલાકો સુધી પાણીની રાહ જોઈને બેઠા હતા. આ ગંભીર પરિસ્થિતિ વચ્ચે વોર્ડ નંબર 4ના ભારતીય જનતા પાર્ટીના મહિલા કોર્પોરેટર હંસાબેન ગજેરા જ્યારે સ્થાનિક લોકોની સમસ્યાઓ સાંભળવા અને પરિસ્થિતિની સમીક્ષા કરવા કાપોદ્રા ખાતે પહોંચ્યા ત્યારે વાતાવરણ તંગ બની ગયું હતું. વિસ્તારની મહિલાઓએ એકત્રિત થઈને કોર્પોરેટરનો ભારે હુરિયો બોલાવ્યો હતો અને તેમનો ઉધડો લીધો હતો.

સ્થાનિક મહિલાઓએ કોર્પોરેટર હંસા ગજેરા પર આક્ષેપોનો મારો ચલાવતા ઉગ્ર શબ્દોમાં કહ્યું હતું કે, "જ્યારે ચૂંટણીમાં મતો જોઈતા હતા ત્યારે તમે એક-એક દિવસમાં 10- 10 વાર સોસાયટીઓમાં આંટા મારતા હતા અને મોટા-મોટા વાયદાઓ કરતા હતા. પરંતુ આજે જ્યારે અમે અતિશય મુશ્કેલીના સમયમાંથી પસાર થઈ રહ્યા છીએ, ત્યારે તમે મોઢું બતાવવા પણ આવતા નથી." લોકોના આ પ્રચંડ અને અણધાર્યા આક્રોશ સામે કોર્પોરેટર હંસા ગજેરા સંપૂર્ણપણે બચાવ મુદ્રામાં આવી ગયા હતા અને તેમણે લોકોને જરા શાંતિ રાખવા અને સંયમ જાળવવા વિનંતી કરી હતી.

કોર્પોરેટર દ્વારા શાંતિ રાખવાની અપીલ કરાતા સ્થાનિક લોકો વધુ ભડક્યા હતા અને બોલાચાલી ઉગ્ર બનતા મામલો ગંભીર રીતે બિચક્યો હતો. જનતાના સતત ઘેરાવ અને તીખા સવાલો સામે છેલ્લે કોર્પોરેટર હંસા ગજેરા પણ પોતાની ધીરજ ખોઈ બેઠા હતા. તેમણે ભારે લાચારી અને કટાક્ષભર્યા લહેકામાં લોકોને કહી દીધું કે, "મારે તો એમાં કંઈ અંદર ઉતરવાનું નથી, નકર તો હું અત્યારે જ કાઢી દઉં બધું હાલો." કોર્પોરેટરના આ નિવેદન બાદ સ્થાનિકોમાં નારાજગી વધુ જોવા મળી હતી.