જુનાગઢ: પ્રેમમાં પડ્યો ભંગાણ ને કારનો વારો કાઢ્યો! પ્રેમીની ગાડી પર યુવતીએ પથ્થરો મારી કચ્ચરઘાણ વાળ્યો, વીડિયો વાઈરલ

જૂનાગઢ શહેરના અત્યંત વ્યસ્ત ગણાતા તળાવ દરવાજા વિસ્તારમાં આજે ભરબજારે એક યુવતીએ હાઈવોલ્ટેજ ડ્રામા સર્જતાં ચકચાર મચી ગઈ છે. પ્રેમ પ્રકરણમાં ખાર ખાઈને બેઠેલી એક યુવતીએ તેના પૂર્વ પ્રેમીની પાર્ક કરેલી કાર પર લાકડીઓ અને પથ્થરો વડે સરેઆમ હુમલો કરી દીધો હતો. રોષે ભરાયેલી યુવતીએ જોતજોતામાં કારના કાચ તોડીને ભૂકો બોલાવી દીધો હતો. ધોળે દિવસે બનેલી આ ઘટનાનો વીડિયો સોશિયલ મીડિયા પર જોરદાર વાયરલ થઈ રહ્યો છે.

ભૂતકાળની અદાવત અને પોલીસ ફરિયાદો  

મળતી માહિતી મુજબ, આ તોડફોડ પાછળ જૂના પ્રેમ સંબંધની અદાવત જવાબદાર હોવાનું સામે આવ્યું છે. આ યુવક અને યુવતી વચ્ચે ભૂતકાળમાં પ્રેમ સંબંધ હતો, જે સમય જતાં કડવાશમાં પરિણમ્યો હતો. અગાઉ આ જ વિવાદને લઈને યુવતીએ યુવક સામે પોલીસ સ્ટેશનમાં ફરિયાદ નોંધાવી હતી, જેની સામે યુવકે પણ યુવતી પર ગંભીર આક્ષેપો સાથે બ્લેકમેઈલિંગની વળતી ફરિયાદ દાખલ કરાવી હતી. આ જૂના વિવાદની આગ આજે ફરી ભભૂકી ઉઠી હતી.

ભરબજારે સર્જાયો ભારે હોબાળો

તળાવ દરવાજા પાસે પૂર્વ પ્રેમીની ગાડી પાર્ક કરેલી જોઈ યુવતી પોતાનો ગુસ્સો કાબૂમાં રાખી શકી નહોતી. તે અચાનક લાકડી અને પથ્થરો લઈને ગાડી પર તૂટી પડી હતી. યુવતીનો આવો રૌદ્ર અવતાર જોઈને રસ્તે ચાલતા રાહદારીઓ અને સ્થાનિક વેપારીઓ સ્તબ્ધ થઈ ગયા હતા. ઘટનાને પગલે બજારમાં લોકોના ટોળેટોળાં એકઠા થઈ ગયા હતા, જેને કારણે થોડીવાર માટે વાહનવ્યવહાર પણ ખોરવાઈ ગયો હતો.

પોલીસ ઘટનાસ્થળે, કાયદેસરની કાર્યવાહી શરૂ

જાહેરમાં હોબાળા અને તોડફોડની ઘટનાની જાણ થતાં જ સ્થાનિક પોલીસનો કાફલો તાત્કાલિક ઘટનાસ્થળે દોડી ગયો હતો અને પરિસ્થિતિ પર કાબૂ મેળવ્યો હતો. પોલીસે સોશિયલ મીડિયા પર વાયરલ થયેલા વીડિયો અને સ્થળ પર હાજર સ્થાનિક લોકોના નિવેદનોના આધારે કાયદેસરની કાર્યવાહી હાથ ધરી છે. ધોળે દિવસે કાયદો અને વ્યવસ્થા હાથમાં લેનારી આ યુવતી સામે પોલીસ હવે કેવા કડક પગલાં ભરે છે તેના પર સૌની નજર મંડાયેલી છે.