પાટણમાં પ્રેમિકા સાથે લગ્ન માટે પત્નીને કેનાલમાં ફેંકી હત્યા કરી: પતિએ મિત્ર સાથે રચ્યું કાવતરું

પાટણ તાલુકાના ચંદ્રુમણા નર્મદા કેનાલ પાસે એક ચોંકાવનારી ઘટના બની છે. જેમાં પતિએ અન્ય મહિલા સાથેના પ્રેમ સંબંધમાં અડચણરૂપ બનતી પત્નીને પોતાના મિત્ર સાથે મળીને કેનાલમાં ફેંકી દઈ નિર્દયતાથી હત્યા કરી હતી. એટલું જ નહીં, ગુનાને છુપાવવા માટે પત્નીએ આત્મહત્યા કરી હોવાનું નાટક પણ રચ્યું હતું. જોકે, આખરે પતિએ જ સાળા સમક્ષ ગુનાની કબૂલાત કરતા સમગ્ર કાવતરાનો પર્દાફાશ થયો છે.

પ્રેમ સંબંધ અને વારંવારના ઝઘડાઓ 

મૂળ સુદ્રોસણના વતની અને હાલ કંબોઈની સીમમાં રહેતા સકતાજી ભેમાજી ઠાકોરને છેલ્લા દોઢ વર્ષથી અન્ય એક મહિલા સાથે પ્રેમ સંબંધ ચાલતો હતો. આ બાબતની જાણ તેમની પત્ની મંજુલાબેનને થતાં બંને પતિ-પત્ની વચ્ચે અવારનવાર ઉગ્ર ઝઘડા થતા હતા. પોતાની પ્રેમિકા સાથે લગ્ન કરવાની ઈચ્છા પૂરી કરવા માટે સકતાજીએ પોતાના મિત્ર કિશનજી રમેશજી ઠાકોર સાથે મળીને પત્નીની હત્યા કરવાનું પૂર્વ આયોજિત કાવતરું ઘડી કાઢ્યું હતું.

કેનાલમાં કોઈ પડ્યાનું નાટક કરી હત્યાને અંજામ આપ્યો 

પોલીસ ફરિયાદ મુજબ, તારીખ 01-07-2026 ના રોજ સકતાજી પોતાની ઇકો કારમાં દૂધી વેચવા પાટણ ગયો હતો. રાત્રે પરત ફરતી વખતે અંદાજે 12:30 થી 12:45 વાગ્યાના અરસામાં તેણે મિત્ર કિશનજીને ચંદ્રુમણા કેનાલના પુલ પર બોલાવ્યો હતો. યોજના મુજબ કિશનજીએ કેનાલમાં કોઈ પડી ગયું હોવાની બૂમાબૂમ કરી નાટક કર્યું હતું. આ સાંભળીને મંજુલાબેન જોવા માટે કારમાંથી નીચે ઉતર્યા, ત્યારે જ બંને આરોપીઓએ તેમના પગ પકડીને તેમને કેનાલના ધસમસતા પાણીમાં ફેંકી દીધા હતા.

આત્મહત્યાની ખોટી વાર્તા અને આખરે કબૂલાત 

તારીખ 02-07-2026 ની વહેલી સવારે હત્યાને અંજામ આપ્યા બાદ સકતાજીએ પરિવારજનોમાં ભ્રમ ફેલાવ્યો હતો કે મંજુલાબેને જાતે જ કેનાલમાં કૂદીને આત્મહત્યા કરી લીધી છે. જોકે, પાપ છાપરે ચઢીને પોકારે તેમ તારીખ 10-07-2026 ની મધરાત્રે આશરે 01:00 વાગ્યે સકતાજીએ પોતાના સાળા રતાજી નારણજી ઠાકોર સમક્ષ સમગ્ર કાવતરાની સચ્ચાઈ કબૂલી લીધી હતી.

બહેનની હત્યા થઈ હોવાની હકીકત સામે આવતા મૃતકના ભાઈ રતાજી ઠાકોરે પાટણ તાલુકા પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે પતિ સકતાજી ઠાકોર અને તેના મિત્ર કિશનજી ઠાકોર વિરુદ્ધ હત્યાનો ગુનો નોંધ્યો છે. હાલ પોલીસે આરોપીઓને ઝડપી પાડવા અને હત્યામાં વપરાયેલી કાર સહિતના પુરાવાઓ એકત્રિત કરી વધુ સઘન તપાસ હાથ ધરી છે.