ગુજરાત પોલીસ ભરતી: લોકરક્ષક દળ લેખિત પરીક્ષાના ગુણ જાહેર, જાણો રીચેકીંગ કરાવવાની પ્રોસેસ

ગુજરાત પોલીસ ભરતી બોર્ડ દ્વારા લોકરક્ષક કેડર ભરતી પ્રક્રિયા હેઠળ લેવાયેલી લેખિત પરીક્ષામાં હાજર રહેલા ઉમેદવારોના ગુણ સત્તાવાર રીતે જાહેર કરવામાં આવ્યા છે. બોર્ડ દ્વારા જાહેર કરાયેલા નોટિફિકેશન મુજબ, જે ઉમેદવારો પોતાના ગુણથી અસંતુષ્ટ છે તેઓ નિર્ધારિત ફી ભરીને આગામી 26 જુલાઈ સુધીમાં તેમની OMR શીટનું રીચેકીંગ કરાવી શકશે.

14 જૂને લેવાઈ હતી લેખિત પરીક્ષા, ફાઇનલ આન્સર કી જાહેર 

ભરતી બોર્ડની જાહેરાત (GPRB/202526/1) અનુસાર, લોકરક્ષક કેડરની લેખિત પરીક્ષા ગત 14 જૂન, 2026 ના રોજ લેવામાં આવી હતી. આ પરીક્ષાની ફાઇનલ આન્સર કી 8 જુલાઈના રોજ બોર્ડની વેબસાઇટ પર મૂકવામાં આવી હતી. હવે, 14 જૂને લેવાયેલી આ પરીક્ષામાં ઉપસ્થિત રહેલા તમામ ઉમેદવારો ઓનલાઈન લિંક મારફતે પોતાના ગુણ જોઈ શકશે.

OMR રીચેકીંગ પ્રક્રિયા અને નિયમો 

લોકરક્ષક કેડર પરીક્ષા નિયમો (2024 ના નિયમ 200 મુજબ) ઉમેદવારોને લેખિત પરીક્ષાના ગુણની ચકાસણી એટલે કે રીચેકીંગ કરાવવા માટે 15 દિવસની સમયમર્યાદા આપવામાં આવી છે. જે ઉમેદવારો પોતાની OMR શીટનું રીચેકીંગ કરાવવા ઈચ્છતા હોય તેમણે નીચે મુજબની પ્રક્રિયા અનુસરવાની રહેશે.

રીચેકીંગ ફી પેટે રૂપિયા 500 નો "CHAIRMAN, GUJARAT POLICE RECRUITMENT BOARD" ના નામનો, ગાંધીનગર ખાતે પેયેબલ (Payable at GANDHINAGAR), રાષ્ટ્રીયકૃત બેંકનો ડિમાન્ડ ડ્રાફ્ટ (DD) કઢાવવાનો રહેશે.

એક અરજી લખવાની રહેશે જેમાં ઉમેદવારે પોતાનું નામ, કન્ફર્મેશન નંબર, રોલ નંબર, પ્રશ્નપુસ્તિકા કોડ અને મોબાઈલ નંબર અવશ્ય દર્શાવવાનો રહેશે. આ અરજી અને ડિમાન્ડ ડ્રાફ્ટ સાથે કોલ લેટરની ઝેરોક્ષ નકલ બીડવાની રહેશે. આ સંપૂર્ણ અરજી રૂબરૂમાં અથવા સ્પીડ પોસ્ટ/કુરિયર મારફતે 26 જુલાઈ, 2026 સુધીમાં પહોંચાડવાની રહેશે.

અરજી મોકલવાનું સરનામું: 

ગુજરાત પોલીસ ભરતી બોર્ડની કચેરી, બંગલા નંબર: ગ-12, સરિતા ઉદ્યાનની નજીક, સેક્ટર-9, ગાંધીનગર-382007.

અધૂરી માહિતી કે 26 જુલાઈ બાદ આવેલી અરજી રદ ગણાશે 

ભરતી બોર્ડ દ્વારા સ્પષ્ટ કરવામાં આવ્યું છે કે જો અરજીમાં અધૂરી માહિતી હશે અથવા ડિમાન્ડ ડ્રાફ્ટ ખોટી માહિતી વાળો હશે તો તેવી અરજી ધ્યાને લેવામાં આવશે નહીં. આ ઉપરાંત, 26 જુલાઈ બાદ મળેલી કે અન્ય કોઈ રીતે આવેલી અરજીઓ પણ સ્વીકારવામાં આવશે નહીં.

CCTV ફૂટેજની ચકાસણી ચાલુ, ગેરરીતિ કરનારની ઉમેદવારી રદ થશે 

ખાસ નોંધ તરીકે બોર્ડે જણાવ્યું છે કે લેખિત પરીક્ષા દરમિયાન દરેક વર્ગખંડમાં લગાવેલા CCTV કેમેરાના રેકોર્ડિંગની ચકાસણીની કામગીરી હાલ ચાલી રહી છે. આ ફૂટેજમાં કે સમગ્ર ભરતી પ્રક્રિયા દરમિયાન કોઈ પણ તબક્કે જો કોઈ ઉમેદવાર ગેરરીતિ આચરતો માલૂમ પડશે અથવા પરીક્ષાના નિયમો વિરુદ્ધ જશે, તો તેની ઉમેદવારી તાત્કાલિક ધોરણે રદ કરવામાં આવશે. વધુમાં, સરકાર કે નામદાર કોર્ટ દ્વારા આવનારા તમામ ચુકાદાઓ કે નિર્ણયો તમામ ઉમેદવારોને બંધનકર્તા રહેશે.