11 આવશ્યક સુવિધાઓ માટે 5 વર્ષ સુધી વિનામૂલ્યે અપાશે સરકારી જમીન: રાજ્યની 9 નવી મહાનગરપાલિકાઓ માટે સરકારનો ઐતિહાસિક નિર્ણય

ગુજરાતના મુખ્યમંત્રી ભૂપેન્દ્ર પટેલે રાજ્યમાં નવી રચાયેલી 9 મહાનગરપાલિકાઓના સર્વાંગી વિકાસ માટે એક મહત્વપૂર્ણ નિર્ણય લીધો છે. આ નિર્ણય અનુસાર, નવી મહાનગરપાલિકાઓને નાગરિકો માટે ઝડપી અને ગુણવત્તાસભર પ્રાથમિક સુવિધાઓ ઊભી કરવા આગામી 5 વર્ષ સુધી 11 જેટલા વિવિધ પ્રોજેક્ટ્સ માટે સરકારી જમીન સંપૂર્ણપણે વિનામૂલ્યે ફાળવવામાં આવશે.

9 નવી મહાનગરપાલિકાઓને મળશે સીધો લાભ

રાજ્ય સરકાર દ્વારા અગાઉ નગરપાલિકાઓને અપાતા આ લાભમાં હવે નવી 9 મહાનગરપાલિકાઓનો પણ સમાવેશ કરવામાં આવ્યો છે. જેમાં વાપી, મહેસાણા, પોરબંદર, મોરબી, ગાંધીધામ, નડિયાદ, આણંદ, નવસારી અને સુરેન્દ્રનગરનો સમાવેશ થાય છે. આ તમામ અગાઉ 'અ' વર્ગની નગરપાલિકાઓ હતી, જેનું અપગ્રેડેશન થતાં હાલ તેમનો ટ્રાન્ઝિશન ફેઈઝ ચાલી રહ્યો છે. નવી મહાનગરપાલિકાઓની હદમાં પણ મોટા વિસ્તારો ઉમેરાયા હોવાથી નાગરિક સુવિધાઓ પહોંચાડવા આ નિર્ણય લેવાયો છે.

કયા 11 પ્રોજેક્ટ્સ માટે મળશે મફત જમીન?

મુખ્યમંત્રીના આ નિર્ણય અંતર્ગત કુલ 11 મહત્વના જાહેર પ્રોજેક્ટ્સ માટે વિનામૂલ્યે જમીન ઉપલબ્ધ કરાવવામાં આવશે. જેમાં નગર સેવા સદન (કચેરી મકાન), ફાયર સ્ટેશન, સુએઝ ટ્રીટમેન્ટ પ્લાન્ટ (STP), વૉટર ટ્રીટમેન્ટ પ્લાન્ટ (WTP), ભૂગર્ભ ગટર (ડ્રેનેજ), પંપિંગ સ્ટેશન, પાણી પુરવઠાના કામો, સૉલિડ અને લિક્વિડ વેસ્ટ મેનેજમેન્ટ પ્લાન્ટ, વરસાદી પાણીના નિકાલ માટેની સ્ટોર્મ વૉટર ડ્રેનેજની કામગીરી, બાલવાડી (આંગણવાડી) તેમજ ટાઉન હૉલ, કોમ્યુનિટી હૉલ અને કન્વેન્શન સેન્ટર જેવા આવશ્યક પ્રોજેક્ટ્સનો સમાવેશ થાય છે.

જમીન ફાળવણીની પ્રક્રિયા વધુ સરળ બની

નવી મહાનગરપાલિકાઓમાં સર્વાંગી વિકાસના કામો અટવાય નહીં અને તેને ઝડપથી પૂરા કરી શકાય તે હેતુસર રાજ્ય સરકારે જિલ્લા કક્ષાએ જ જમીન ફાળવણીની પ્રક્રિયાને વધુ સરળ અને પારદર્શક બનાવવાનો અભિગમ અપનાવ્યો છે. જેથી વહીવટી પ્રક્રિયામાં લાગતો સમય બચાવી શકાશે.