અમદાવાદ :: જગન્નાથ મંદિર ખાતે 149મી રથયાત્રા પૂર્વે ભવ્ય ભંડારો યોજાયો, સાધુ-સંતો સહિત હજારો ભક્તોએ લીધો પ્રસાદનો લાભ

અમદાવાદના ઐતિહાસિક અને આસ્થાના કેન્દ્ર સમાન જગન્નાથજી મંદિર ખાતે 149મી રથયાત્રા મહોત્સવને લઈને ભક્તિમય માહોલ સર્જાયો છે. જગન્નાથપુરી બાદ દેશભરમાં જે રથયાત્રાની સૌથી વધુ આતુરતાથી રાહ જોવાય છે તેવી અમદાવાદની ભવ્ય રથયાત્રાનો ત્રિ-દિવસીય કાર્યક્રમ મંદિર પ્રશાસન દ્વારા જાહેર કરવામાં આવ્યો છે. આ વર્ષે 14 જુલાઈથી વિવિધ ધાર્મિક, વૈદિક અને પરંપરાગત વિધિઓ સાથે રથયાત્રા મહોત્સવનો પ્રારંભ થયો છે. અષાઢી બીજના પાવન દિવસે એટલે કે 16 જુલાઈ, ગુરુવારે સવારે 7:00 કલાકે ભગવાન જગન્નાથજી, બહેન સુભદ્રાજી અને ભાઈ બળદેવજી ભક્તોને દર્શન આપવા નગરચર્યાએ નીકળશે. આ પ્રસંગે દેશભરના વિવિધ સ્થળોથી આવેલા સાધુ-સંતો, મહંતો અને વૈરાગી મહારાજો માટે મંદિર તરફથી વિશેષ ભંડારાનું આયોજન કરવામાં આવ્યું હતું. 

નેત્રોત્સવ વિધિ સાથે મંદિરના કપાટ ખુલ્યા, ભક્તોએ કર્યા દિવ્ય દર્શન
રથયાત્રા મહોત્સવના પ્રથમ દિવસે વહેલી સવારે 6:00 કલાકે ભગવાન જગન્નાથજી, સુભદ્રાજી અને બળદેવજીની મૂર્તિઓને ગર્ભગૃહમાં આવેલી પવિત્ર રત્નવેદી પર શાસ્ત્રોક્ત વિધિ અનુસાર પ્રતિષ્ઠિત કરવામાં આવી હતી. ત્યારબાદ પરંપરા મુજબ મહત્વપૂર્ણ ગણાતી નેત્રોત્સવ વિધિ સંપન્ન કરવામાં આવી હતી. આ ધાર્મિક વિધિ બાદ મંદિર પર ધ્વજારોહણ કરવામાં આવ્યું હતું અને ભગવાનના દર્શન માટે મંદિરના કપાટ ખોલવામાં આવ્યા હતા. કપાટ ખુલતાની સાથે જ મોટી સંખ્યામાં ભક્તો દર્શન માટે ઉમટી પડ્યા હતા અને સમગ્ર મંદિર પરિસર જય જગન્નાથના નાદથી ગુંજી ઉઠ્યું હતું.

હર્ષ સંઘવીએ મહાઆરતી કરી, સાધુ-સંતો માટે ભવ્ય ભંડારાનું આયોજન
જગન્નાથ મંદિર ખાતે યોજાયેલી ધાર્મિક વિધિમાં હર્ષ સંઘવીએ ખાસ ઉપસ્થિતિ નોંધાવી હતી અને ભગવાન જગન્નાથજીની મહાઆરતી કરી હતી. આ પ્રસંગે દેશભરના વિવિધ સ્થળોથી આવેલા સાધુ-સંતો, મહંતો અને વૈરાગી મહારાજો માટે મંદિર તરફથી વિશેષ ભંડારાનું આયોજન કરવામાં આવ્યું હતું. સંતોને ભોજન પ્રસાદ સાથે વસ્ત્રદાન અને દક્ષિણા સ્વરૂપે રોકડ ભેટ પણ અર્પણ કરવામાં આવી હતી.

ભક્તો માટે મહાપ્રસાદની વિશેષ વ્યવસ્થા, વિવિધ વાનગીઓ પીરસાઈ
રથયાત્રાના પાવન પ્રસંગે દર્શનાર્થે આવતા ભાવિક ભક્તો માટે પણ મંદિર દ્વારા વિશાળ ભોજન પ્રસાદની વ્યવસ્થા કરવામાં આવી હતી. ભક્તોને માલપૂવા, દૂધપાક, પુરી, ચણા શાક, બટાકા શાક, મિક્ષ ભજીયા, ભાત અને કઢી સહિતની વિવિધ વાનગીઓ મહાપ્રસાદ રૂપે પીરસવામાં આવી હતી. ભોજન પ્રસાદના આયોજનમાં મોટી સંખ્યામાં સેવકો જોડાયા હતા અને ભક્તોએ પ્રસાદનો લાભ લઈ ધન્યતા અનુભવી હતી.

અષાઢી બીજના દિવસે ભવ્ય રથયાત્રા માટે તૈયારીઓ પૂર્ણ
149મી રથયાત્રાને લઈને મંદિર પ્રશાસન, સેવકો અને તંત્ર દ્વારા તમામ તૈયારીઓને આખરી ઓપ આપવામાં આવી રહ્યો છે. અષાઢી બીજના દિવસે ભગવાન જગન્નાથજીના રથના દર્શન કરવા લાખો ભક્તો શહેરના માર્ગો પર ઉમટી પડશે. પરંપરા, આસ્થા અને ભક્તિનો અદભૂત સંગમ સર્જતી અમદાવાદની રથયાત્રા ફરી એકવાર ભક્તોને આધ્યાત્મિક અનુભૂતિ કરાવશે.