કળયુગી દીકરી: "10 કરોડની જમીન તારા નામે કરી દઈશ, બસ મમ્મીને પતાવી દે..." સરકારી નોકરી માટે પુત્રીએ જ સોપારી આપી માતાની હત્યા કરાવી!

રાજસ્થાનના જયપુર સ્થિત એરપોર્ટ કોલોની વિસ્તારમાં ગત 4 જુલાઈના રોજ બનેલી એક શંકાસ્પદ હિટ એન્ડ રનની ઘટનામાં જયપુર પોલીસે ચોંકાવનારો પર્દાફાશ કર્યો છે. પ્રથમ દ્રષ્ટિએ સામાન્ય અકસ્માત લાગતી આ ઘટના વાસ્તવમાં સરકારી નોકરી અને કરોડો રૂપિયાની જમીન પચાવી પાડવા માટે એક સગી દીકરીએ જ તેના સગા સંબંધીઓ અને સોપારી કિલરો સાથે મળીને રચેલું એક ભયાનક અને ક્રૂર મર્ડર પ્લાનિંગ હોવાનું પોલીસ તપાસમાં બહાર આવ્યું છે. પોલીસે આ કેસમાં મુખ્ય સૂત્રધાર પુત્રી આયુષી શર્મા સહિતના આરોપીઓની ધરપકડ કરી લીધી છે.

ષડયંત્રની પૃષ્ઠભૂમિ અને મિલકતની લાલચ

પોલીસના જણાવ્યા અનુસાર, અઢી વર્ષ પહેલા જયપુર કોર્ટના કર્મચારી વિજય શર્માએ એરપોર્ટ કોલોનીમાં ઘર બનાવ્યું હતું, જ્યાં તેઓ પત્ની નિરજ શર્મા, દીકરી આયુષી અને એક માનસિક રીતે બીમાર દીકરા સાથે રહેતા હતા. એક વર્ષ પહેલા વિજય શર્માનું બ્રેન હેમરેજથી અવસાન થતાં અનુકંપાના ધોરણે સરકારી નોકરી મેળવવા માટે ૧૨મું પાસ દીકરી આયુષી શર્મા મક્કમ હતી. જો કે, પારિવારિક ચર્ચા અને મામાની સલાહ બાદ, આખી જિંદગી અને બીમાર દીકરાની જવાબદારીને ધ્યાને રાખી માતા નિરજ શર્મા આ નોકરી લેવા તૈયાર થયા હતા.

અગાઉનો નિષ્ફળ પ્રયાસ અને તાંત્રિક વિદ્યાનો ભય

હત્યાને અકસ્માતમાં ખપાવવા માટે મોહન શર્માએ ભરતપુરના હેમંત શર્માનો સંપર્ક કર્યો હતો. એક મહિના પહેલા હેમંતે થાર ગાડી વડે નિરજ શર્માને કચડવાનો પ્રયાસ કર્યો હતો, પરંતુ તે બચી ગયા હતા. આ ઘટનાથી શંકા જતાં નિરજ શર્માએ ઘરમાંથી બહાર નીકળવાનું બંધ કર્યું, આખા ઘરમાં લોખંડની જાળીઓ ફિટ કરાવી અને સુરક્ષા માટે ૪ સીસીટીવી કેમેરા લગાવડાવ્યા હતા. નિરજ શર્માને ઘરમાંથી બહાર કાઢવા માટે આયુષીએ ઘરની બહાર લીંબુ-મરચા અને લાલ રંગ ફેંકી તાંત્રિક વિદ્યાનો ડર ફેલાવવાનો પણ અધમ પ્રયાસ કર્યો હતો.

₹7 લાખની સોપારી અને ફિલ્મી ઢબે હત્યા

આયુષીને માતાને મારવાની ઉતાવળ હોવાથી, મોહન શર્માએ ફરી હેમંત શર્માનો સંપર્ક કર્યો, જેણે હત્યાના બદલામાં ₹7 લાખની સોપારી માંગી હતી. હેમંતે ભરતપુરથી ₹૩૫,૦૦ણું ભાડું ચૂકવી હરિયાણા પાસિંગની સ્કોર્પિયો કાર મેળવી હતી. આ કામ આકાશ શર્મા અને અરવિંદ શર્માને સોંપાયું હતું, જ્યારે નિરજ શર્માની હિલચાલ પર નજર રાખવા રોહિત અને મોહિત શર્મા નામના શખ્સોને રેકી માટે હાયર કરાયા હતા. પોલીસના જણાવ્યા અનુસાર, આરોપી આયુષીને સગી જનનીની હત્યા કરાવવા બદલ સહેજ પણ પસ્તાવો નથી. હાલમાં પોલીસ આ કેસમાં કાયદેસરની કલમો હેઠળ ગુનો નોંધી, ફરાર થયેલા પિતરાઈ ભાઈ બલરામ અને અન્ય સાગરીતોને ઝડપી પાડવા માટે ચક્રો ગતિમાન કર્યા છે.