અમદાવાદ રિવરફ્રન્ટ પર જન્મદિવસની જોખમી ઉજવણી!: ચાલતી કારની ખુલ્લી ડીક્કી સાથે પત્નીને સરપ્રાઇઝ, વીડિયો વાઇરલ

અમદાવાદના સાબરમતી રિવરફ્રન્ટ પર સહેલાણીઓ માટે ફરવા માટેનું મનપસંદ સ્થળ છે, પરંતુ હાલમાં જ સોશિયલ મીડિયા પર વાયરલ થયેલા એક વીડિયોએ સુરક્ષા અને જવાબદારી અંગે ગંભીર સવાલો ઉભા કર્યા છે. આ વીડિયોમાં એક દંપતી દ્વારા કરવામાં આવેલી જન્મદિવસની ઉજવણીનો વીડિયો સામે આવ્યો છે, જેમાં ઉત્સાહની આડમાં ટ્રાફિકના નિયમોની અને લોકોની સુરક્ષાની સરેઆમ અવગણના કરવામાં આવી છે. ઘટનાની વિગતો મુજબ, રસ્તા પર દોડતી એક કારની પાછળની ડીકી જાણીજોઈને ખુલ્લી રાખવામાં આવી હતી. આ કારની અંદર ફુગ્ગાઓ અને જન્મદિવસની શુભેચ્છાઓ લખેલા બોર્ડ દ્વારા ડેકોરેશન કરવામાં આવ્યું હતું, જે પત્નીને સરપ્રાઇઝ આપવા માટે તૈયાર કરવામાં આવ્યું હતું. કારની પાછળ એક એક્ટિવા પર દંપતી સવાર હતું અને આ રીતે રસ્તા પર સ્ટંટ કરીને આ દંપતી પોતાની ખુશી જાહેર કરી રહ્યું હતું.

ટ્રાફિકના નિયમો મુજબ ચાલુ વાહનની ડીકી ખુલ્લી રાખીને રસ્તા પર વાહન ચલાવવું એ ગેરકાયદેસર છે અને તે અન્ય વાહન ચાલકો માટે ગંભીર જોખમ ઉભું કરી શકે છે. સાબરમતી રિવરફ્રન્ટ જેવા વ્યસ્ત રોડ પર આવી રીતે બેદરકારીપૂર્વક વાહન ચલાવવાથી અકસ્માતની શક્યતાઓ વધી જાય છે. વીડિયોમાં સ્પષ્ટ જોઈ શકાય છે કે દંપતીએ આ જોખમી પ્રક્રિયા બાદ કારને રસ્તાની એક બાજુ પર રાખીને એક્ટિવા ઉપર જ કેક કાપીને જન્મદિવસની ઉજવણી કરી હતી. રસ્તાની વચ્ચે કે જાહેર સ્થળો પર આ પ્રકારની ઉજવણી કરવી ટ્રાફિકને અવરોધે છે અને આસપાસથી પસાર થતા અન્ય નાગરિકો માટે પણ અગવડતાનું કારણ બને છે.

સોશિયલ મીડિયા પર વાયરલ થયેલા આ વીડિયોને લઈને નેટીઝન્સમાં પણ આક્રોશ જોવા મળી રહ્યો છે. લોકોએ ટીકા કરતા જણાવ્યું છે કે પોતાની વ્યક્તિગત ખુશી કે જન્મદિવસની ઉજવણી કરવા માટે જાહેર રોડનો ઉપયોગ કરીને અન્યના જીવને જોખમમાં મૂકવો તે કેટલે અંશે યોગ્ય છે? પોલીસ તંત્ર દ્વારા વારંવાર ટ્રાફિકના નિયમોનું પાલન કરવા અને રસ્તા પર શિસ્ત જાળવવા માટે અપીલ કરવામાં આવે છે, તેમ છતાં આવી ઘટનાઓ દર્શાવે છે કે કેટલાક લોકો હજુ પણ નિયમોને ગંભીરતાથી લેતા નથી. જન્મદિવસ જેવી વ્યક્તિગત ઘટનાઓને ઉજવવા માટે અનેક સુરક્ષિત સ્થળો ઉપલબ્ધ હોય છે, પરંતુ સોશિયલ મીડિયા પર પ્રખ્યાત થવાની હોડમાં લોકો આવા જીવલેણ સ્ટંટ કરવા પ્રેરાઈ રહ્યા છે. અમદાવાદ પોલીસ દ્વારા હવે આવા વાયરલ વીડિયોના આધારે તપાસ કરી કાયદેસરની કાર્યવાહી કરવામાં આવશે કે કેમ તે જોવું રહ્યું, પરંતુ આ ઘટનાએ ફરી એકવાર જાહેર માર્ગો પરની શિસ્ત અને જવાબદારી વિશે જાગૃતિ લાવવાની જરૂરિયાત પર ભાર મૂક્યો છે. પોતાની કે બીજાની સલામતીને જોખમમાં મૂકીને કરવામાં આવતી આવી ઉજવણી કોઈ પણ સંજોગોમાં પ્રશંસનીય નથી, બલ્કે તે કાયદાકીય દંડ અને ગંભીર અકસ્માતને આમંત્રણ આપનારી ઘટના છે.