250 કરોડના સાયબર ફ્રોડનો પર્દાફાશ: 'ઓપરેશન મ્યુઅલ હન્ટ 2.0' માં 19 આરોપીઓ ઝડપાયા, દુબઈથી ચાલતું હતું નેટવર્ક

ગાંધીનગર સ્થિત સાયબર સેન્ટર ઓફ એક્સેલન્સ દ્વારા હાથ ધરવામાં આવેલા 'ઓપરેશન મ્યુઅલ હન્ટ 2.0' અંતર્ગત રૂપિયા 250 કરોડથી વધુના સાયબર ફ્રોડનો મોટો પર્દાફાશ કરવામાં આવ્યો છે. આ ઓપરેશનમાં રાજ્યના વડોદરા, ભાવનગર, સુરત, પાટણ અને ગાંધીનગરમાંથી કુલ 19 આરોપીઓની ધરપકડ કરવામાં આવી છે. આ ગેંગના તાર દેશના 21 રાજ્યોમાં નોંધાયેલા 146 સાયબર ગુનાઓ સાથે જોડાયેલા હોવાનું સામે આવ્યું છે.

દુબઈથી ચાલતું નેટવર્ક અને બલ્ક બેંકિંગનો ઉપયોગ 

પોલીસ તપાસમાં સામે આવ્યું છે કે આ સાયબર સિન્ડિકેટના કેટલાક મુખ્ય સૂત્રધારો દુબઈથી સમગ્ર નેટવર્કનું સંચાલન કરતા હતા. સુરતના મોટા વરાછા અને જહાંગીરપુરા વિસ્તારમાં ઓફિસો ખોલીને આ કૌભાંડ ચલાવવામાં આવતું હતું. આરોપીઓ નકલી અને ભાડે મેળવેલા બેંક ખાતાઓનો ઉપયોગ કરીને બલ્ક મોડ બેંકિંગ સુવિધા દ્વારા કરોડો રૂપિયા ટ્રાન્સફર કરતા હતા. મહેસાણા અને ગાંધીનગરમાંથી 6 આરોપીઓ પકડાયા છે, જેમાં એક જ આરોપીના બેંક ખાતામાં 161 કરોડ રૂપિયાથી વધુના શંકાસ્પદ ટ્રાન્ઝેક્શન નોંધાયા છે.

છેતરપિંડીની મોડસ ઓપરેન્ડી: APK ફાઇલ અને લાલચ 

સાયબર ઠગો લોકોને ઓનલાઈન ટ્રેડિંગ, ઇન્વેસ્ટમેન્ટ અને UPI સંબંધિત આકર્ષક ઓફરો આપીને ફસાવતા હતા. સાયબર સેન્ટર ઓફ એક્સેલન્સના એસપી ડૉ. રાજદીપસિંહ ઝાલાના જણાવ્યા અનુસાર, આરોપીઓ કમિશનની લાલચ આપીને લોકો પાસેથી આધાર કાર્ડ, PAN કાર્ડ, ચેકબુક અને ઇન્ટરનેટ બેંકિંગની વિગતો મેળવી લેતા હતા. ત્યારબાદ તેઓ ખાતાધારકોના મોબાઇલમાં એક ખાસ APK ફાઇલ ઇન્સ્ટોલ કરાવી OTP સહિતની સિસ્ટમ પર કંટ્રોલ મેળવી લેતા હતા અને ખાતાઓનો ઉપયોગ સાયબર ફ્રોડ માટે કરતા હતા.

MBA નો વિદ્યાર્થી અને હત્યાનો વોન્ટેડ આરોપી પણ સામેલ 

આ કૌભાંડમાં વડોદરાની પારુલ યુનિવર્સિટીમાં MBA નો અભ્યાસ કરતો એક વિદ્યાર્થી પણ ઝડપાયો છે. તેણે પોતાના મિત્રો અને ઓળખીતાઓના નામે 10 થી વધુ બેંક ખાતાઓ ખોલાવીને 7.40 કરોડ રૂપિયાનું ફ્રોડ કર્યું હતું. આ વિદ્યાર્થી સામે દેશભરમાં 28 ફરિયાદો નોંધાયેલી છે. આ ઉપરાંત વડોદરામાં પકડાયેલા 4 આરોપીઓ દ્વારા 46 કરોડ રૂપિયાની છેતરપિંડી આચરવામાં આવી છે. પોલીસ તપાસમાં ખુલ્યું છે કે આ 4 પૈકીનો એક આરોપી અગાઉ હત્યાના ગુનામાં પણ વોન્ટેડ છે.

પકડાયેલા આરોપીઓ સમગ્ર સાયબર સિન્ડિકેટ માટે મદદગાર તરીકે કામ કરતા હતા. આગામી સમયમાં પોલીસ આ તપાસ દેશના અન્ય રાજ્યો સુધી લંબાવશે. દુબઈ બેઠા નેટવર્ક ચલાવતા મુખ્ય માસ્ટરમાઇન્ડ અને અન્ય સંડોવાયેલા શખ્સો સુધી પહોંચવા માટે પોલીસ દ્વારા વધુ કડક તપાસ અને કાયદાકીય કાર્યવાહી હાથ ધરવામાં આવશે.

બાઈટ - ડૉ. રાજદીપસિંહ ઝાલા, એસ.પી, સાયબર સેન્ટર ઓફ એક્સેલન્સ