ગિરનાર પર્વત પર કાળજુ કંપાવતી ઘટના:: ગિરનાર પર્વત પર કાળજુ કંપાવતી ઘટના: સીડીઓ પર સિંહે બાળક પર કર્યો જીવલેણ હુમલો, જંગલમાં ખેંચી જઈને મારી નાખ્યું

ગિરનારના પવિત્ર પર્વત પર ભક્તિના માર્ગે નીકળેલા એક પરિવાર પર કુદરતે આભ તૂટી પડ્યું હોય તેવી કરુણ ઘટના સામે આવી છે. ખેડા જિલ્લાના મહેમદાવાદ તાલુકાના મોડજ ગામથી આવેલા પ્રવાસી પરિવાર માટે ગિરનારની યાત્રા જીવનનો સૌથી દુઃખદ અનુભવ બની ગઈ. 12 વર્ષનો મયુરસિંહ મહેન્દ્રસિંહ પોતાના કાકાનો હાથ પકડીને અત્યંત શ્રદ્ધા સાથે ગિરનારના પગથિયાં ચડી રહ્યો હતો, પરંતુ કોઈને કલ્પના પણ નહોતી કે કાળ અંધારામાં છુપાઈને બેઠો છે. ગેટથી માંડ 50 પગથિયાં ચડ્યા હશે ત્યાં જ અંધારાનો લાભ લઈને એક સિંહે અચાનક તરાપ મારી હતી. સિંહે એટલી ઝડપ અને આક્રમકતાથી હુમલો કર્યો કે મયુરસિંહને કાકાના હાથમાંથી ખેંચીને તે સીધો ગાઢ જંગલમાં અદ્રશ્ય થઈ ગયો હતો. ક્ષણભરમાં બનેલી આ ઘટનાથી આસપાસના વિસ્તારમાં ગમગીની અને ભયનું મોજું ફરી વળ્યું હતું.

વન વિસ્તારમાં શોધખોળ અને હૃદયદ્રાવક પરિણામ
ઘટનાની જાણ થતા જ પરિવારના સભ્યો અને અન્ય યાત્રાળુઓમાં ભારે દોડધામ અને ચીસાચીસ મચી ગઈ હતી. ઘટનાના પગલે તંત્ર સફાળું જાગ્યું અને પોલીસ તેમજ વન વિભાગનો કાફલો તાત્કાલિક સ્થળ પર દોડી આવ્યો હતો. વન વિભાગની ટીમો દ્વારા જંગલ વિસ્તારમાં સઘન શોધખોળ હાથ ધરવામાં આવી હતી, પરંતુ જે પરિણામ સામે આવ્યું તે અત્યંત હૃદયદ્રાવક હતું. જંગલના અવાવરુ વિસ્તારમાંથી મયુરસિંહના બૂટ, કપડાં અને શરીરના કેટલાક અવશેષો મળી આવ્યા હતા. 12 વર્ષના માસૂમ બાળકની આ રીતે થયેલી હત્યાએ સમગ્ર પંથકને હચમચાવી દીધો છે. સ્થાનિક લોકોમાં ભારે રોષ જોવા મળી રહ્યો છે, કારણ કે છેલ્લા ૨૫ દિવસમાં આ વિસ્તારમાં વન્યજીવ હુમલાની આ ૬ઠ્ઠી ઘટના છે.

તંત્રની બેદરકારી અને સુરક્ષા સામે સવાલો
બાળકના કાકા અનિલકુમારસિંહ નટવરસિંહે વહીવટી તંત્રની કામગીરી સામે ગંભીર આક્ષેપો કર્યા છે. તેમણે જણાવ્યું હતું કે, ગિરનારના મુખ્ય પગથિયાં પર લાઈટની કોઈ યોગ્ય વ્યવસ્થા નથી, જેના કારણે અંધારામાં વન્યજીવની હાજરીનો કોઈ અંદાજ આવતો નથી. જો ત્યાં પૂરતી રોશની હોત તો કદાચ મયુરસિંહનો જીવ બચાવી શકાયો હોત. તેમણે માંગ કરી છે કે તંત્રએ તાત્કાલિક અસરથી પગથિયાં પર લાઈટની વ્યવસ્થા કરવી જોઈએ અને સુરક્ષા માટે ચોક્કસ અંતરે ફોરેસ્ટ ઓફિસરને તહેનાત કરવા જોઈએ. ઘટનાના બે કલાક સુધી આરએફઓ સ્થળ પર ન પહોંચ્યા હોવાના આક્ષેપો પણ કરવામાં આવ્યા છે. હાલ વન વિભાગે સિંહને પકડવા માટે અલગ-અલગ પાંજરા ગોઠવ્યા છે અને શ્રદ્ધાળુઓની સુરક્ષા માટે મુખ્ય સીડીનો રસ્તો બંધ કરીને જટાશંકર પાસેની જૂની સીડીનો ઉપયોગ કરવા સૂચના આપવામાં આવી છે.