અમદાવાદના શાસ્ત્રીનગરમાં ગોઝારો અકસ્માત: ડીપીએસની બસ નીચે કચડાઈ જતા મોપેડ ચાલકનું કમકમાટીભર્યું મોત

આજે બપોરે અમદાવાદના શાસ્ત્રીનગર વિસ્તારમાં એક માર્ગ અકસ્માત સર્જાયો હતો. ડાબી બાજુ ટર્ન લઈ રહેલી બોપલ ડીપીએસ (DPS) સ્કૂલની બસ સાથે પાછળથી આવતું એક મોપેડ ધડાકાભેર અથડાતાં યુવક બસના ટાયર નીચે આવી ગયો હતો. આ અકસ્માતમાં યુવકનું ઘટનાસ્થળે જ કમકમાટીભર્યું મોત નીપજ્યું હતું. અકસ્માત બાદ બસનો ડ્રાઇવર અને કંડક્ટર સ્કૂલના બાળકોને ઘટનાસ્થળે જ મૂકીને ફરાર થઈ ગયા હતા.

AMC ની કામગીરી અને મોટા ટર્નને કારણે સર્જાયો અકસ્માત

પ્રાપ્ત માહિતી અનુસાર, શુક્રવારે બપોરે 2:30 વાગ્યાની આસપાસ શાસ્ત્રીનગર ચાર રસ્તા પહેલા સાઉથ ઢોંસાવાળી ગલી સામે બોપલ ડીપીએસ સ્કૂલની બસ પસાર થઈ રહી હતી. રોડના વળાંક પાસે મ્યુનિસિપલ કોર્પોરેશનનું કામ ચાલુ હોવાથી ત્યાં બેરિકેડિંગ કરવામાં આવ્યા હતા. આ બેરિકેડ્સના કારણે બસ ચાલકને ડાબી બાજુ મોટો ટર્ન લેવો પડ્યો હતો. આ જ સમયે પાછળથી પૂરપાટ ઝડપે આવી રહેલો એક્ટિવા ચાલક અચાનક બસ સાથે અથડાયો હતો અને બસના પાછળના વ્હીલ નીચે ઘૂસી ગયો હતો.

યુવરાજ નામના યુવકનું ઘટનાસ્થળે જ મોત, ડ્રાઈવર ફરાર

બસનું વ્હીલ યુવકના માથા પર ફરી વળતા તેનું ઘટનાસ્થળે જ પ્રાણપંખેરું ઉડી ગયું હતું. અકસ્માત એટલો ભયંકર હતો કે રસ્તા પર લોહીનો 3 થી 4 ફૂટ લાંબો લિસોટો પડી ગયો હતો. ગંભીર અકસ્માત સર્જાયા બાદ ડરના માર્યા બસનો ડ્રાઈવર અને કંડક્ટર બસમાં સવાર વિદ્યાર્થીઓને રઝળતા મૂકીને ત્યાંથી નાસી છૂટ્યા હતા. બનાવને પગલે આસપાસના લોકોના ટોળેટોળા એકઠા થઈ ગયા હતા અને તાત્કાલિક પોલીસને જાણ કરવામાં આવી હતી. પ્રાથમિક તપાસમાં મૃતક યુવકની ઓળખ યુવરાજ તરીકે થઈ છે.

પોલીસની કાર્યવાહી અને આગળની તપાસ

બનાવની જાણ થતાં બી ડિવિઝન ટ્રાફિક પોલીસનો કાફલો તાત્કાલિક ઘટનાસ્થળે દોડી આવ્યો હતો. આ અંગે બી ડિવિઝન ટ્રાફિક પોલીસ સ્ટેશનના પીઆઇ આર. એસ. પટેલે જણાવ્યું હતું કે, બપોરે 2:30 વાગ્યા આસપાસ શાસ્ત્રીનગર ચાર રસ્તા પહેલા સાઉથ ઢોંસાવાળી ગલી સામે ડીપીએસ સ્કૂલ બસ અને એક્ટિવા ચાલક વચ્ચે અકસ્માત થયો હતો. એક્ટિવા ચાલકનું નામ યુવરાજ હોવાનું જાણવા મળ્યું છે અને તેનું સ્થળ પર જ મૃત્યુ થયું છે. હાલ આ અંગેની કાયદેસરની કાર્યવાહી ચાલુ છે.