અમદાવાદ: વિશાલા-નારોલ રોડ પર દોડતી BMW બની ગઈ 'અગ્નિરથ': કારમાં અચાનક લાગી ભીષણ આગ, ડ્રાઇવરનો આબાદ બચાવ!

અમદાવાદ શહેરમાં ટ્રાફિકથી ધમધમતા વિશાલા-નારોલ રોડ પર આજે એક લક્ઝરી કારમાં અચાનક આગ લાગવાની સનસનાટીભરી ઘટના સામે આવી છે. ધોળા દિવસે જાહેર રસ્તા પર ચાલુ લક્ઝરી કારમાં આગ ફાટી નીકળતાં રોડ પરથી પસાર થતા અન્ય વાહનચાલકો અને સ્થાનિક લોકોમાં ભારે અફરાતફરી અને ભયનો માહોલ જોવા મળ્યો હતો. મળતી પ્રાથમિક વિગતો અનુસાર, એક BMW બ્રાન્ડની મોંઘીદાટ લક્ઝરી કાર વિશાલા-નારોલ હાઇવે પરથી પસાર થઈ રહી હતી, તે દરમિયાન અચાનક કારમાંથી ધુમાડો નીકળવાનું શરૂ થયું હતું અને જોતજોતામાં આખી કાર આગની લપેટમાં આવી ગઈ હતી.

આગ એટલી ઝડપથી ફેલાઈ હતી કે મિનિટોમાં જ કરોડોની કિંમતની લક્ઝરી કાર સળગીને ખાખ થઈ ગઈ હતી.આ ભયાનક ઘટનામાં સદનસીબે એક મોટા સમાચાર એ છે કે કારના ડ્રાઈવર સમયસૂચકતા વાપરીને તુરંત જ કારમાંથી બહાર નીકળી ગયા હતા. જેના કારણે ચાલકનો આબાદ બચાવ થયો છે અને આ અકસ્માતમાં કોઈ જાનહાનિ નોંધાઈ નથી, જે એક મોટી રાહતના સમાચાર છે. ઘટનાની જાણ સ્થાનિક લોકો દ્વારા તુરંત જ ફાયર કંટ્રોલ રૂમને કરવામાં આવી હતી. માહિતી મળતાની સાથે જ અમદાવાદ ફાયર બ્રિગેડની ટીમો ઘટનાસ્થળે દોડી આવી હતી.

ફાયર ફાઈટરોએ તાત્કાલિક પાણીનો મારો ચલાવીને કારમાં લાગેલી આગ પર સંપૂર્ણ કાબૂ મેળવ્યો હતો. જો કે, ત્યાં સુધીમાં કારને મોટું નુકસાન થઈ ચૂક્યું હતું. હાલના તબક્કે શોર્ટ સર્કિટ અથવા અન્ય કોઈ તકનીકી ખામીના કારણે લક્ઝરી કારમાં આગ લાગી હોવાનું અનુમાન સેવાઈ રહ્યું છે, પરંતુ આગ લાગવાનું ચોક્કસ અને સત્તાવાર કારણ હજુ સુધી જાણી શકાયું નથી. ટ્રાફિક પોલીસે ઘટનાસ્થળે પહોંચીને રોડ પરનો વાહનવ્યવહાર સામાન્ય કરાવવાની કામગીરી હાથ ધરી હતી.