ભાવનગરમાં અષાઢી બીજે નીકળશે 41મી ભવ્ય રથયાત્રા: રાજવી પરિવાર સોનાની ઝાડુથી કરશે 'છેડાપોરા' વિધિ

ભાવનગર શહેરમાં આગામી 16 જુલાઈના રોજ અષાઢ સુદ બીજના પવિત્ર પર્વે ભગવાન શ્રી જગન્નાથજીની 41મી ઐતિહાસિક રથયાત્રાનું ભવ્યાતિભવ્ય આયોજન કરવામાં આવ્યું છે. છેલ્લા 40 વર્ષથી અવિરત ચાલતી આ પરંપરામાં આ વર્ષે પણ ભાવનગરના રાજવી પરિવાર દ્વારા સોનાની ઝાડુથી 'છેડાપોરા' વિધિ સંપન્ન કરી રથયાત્રાનું દબદબાભેર પ્રસ્થાન કરાવવામાં આવશે.

શાસ્ત્રોક્ત પૂજાવિધિ અને ગાર્ડ ઓફ ઓનર સાથે થશે શુભારંભ 

સ્વ. ભીખુભાઈ ભટ્ટ પ્રેરિત અને શ્રી જગન્નાથજી રથયાત્રા મહોત્સવ સમિતિ ટ્રસ્ટ દ્વારા આયોજિત આ રથયાત્રા 16 જુલાઈ, ગુરુવારે સવારે 8 કલાકે સુભાષનગર સ્થિત નિજ મંદિરેથી નીકળશે. સંતો, મહંતો અને મહામંડલેશ્વરશ્રીઓની ઉપસ્થિતિમાં ભાવનગરના મહારાજા વિજયરાજસિંહજી અને યુવરાજ જયવીરસિંહજી સોનાની ઝાડુથી 'છેડાપોરા' વિધિ કરશે. ત્યારબાદ માજી સૈનિક સંગઠન દ્વારા ગાર્ડ ઓફ ઓનર આપીને રથયાત્રાને નગરચર્યા માટે પ્રસ્થાન કરાવવામાં આવશે.

રથયાત્રાનું આકર્ષણ: 3 ટન ચણાનો પ્રસાદ અને 50 ટ્રકો 

આ વર્ષે રથયાત્રામાં 1 હાથી, 8 ઘોડા, 50 ટ્રક, 20 ટ્રેક્ટર, 15 છકડા અને 2 જીપ સહિતના વાહનો જોડાશે. ભક્તો માટે વિશેષ 3 ટન ચણાના પ્રસાદની વ્યવસ્થા કરવામાં આવી છે. નોંધનીય છે કે, વૈશ્વિક સ્તરે ઇંધણની સમસ્યાને ધ્યાનમાં રાખીને સમિતિએ આ વર્ષે વાહનોની સંખ્યામાં સ્વૈચ્છિક ઘટાડો કરી રાષ્ટ્રભાવનાનું ઉત્તમ ઉદાહરણ પૂરું પાડ્યું છે. સમગ્ર રૂટ પર વેપારીઓ અને સંસ્થાઓ દ્વારા ધજા-પતાકા અને સ્વાગત કમાનો ઊભી કરવામાં આવી રહી છે.

200 કાર્યકર્તાઓનું માઇક્રોપ્લાનિંગ અને ડિજિટલ દર્શન

રથયાત્રા સમિતિના કાર્યકારી અધ્યક્ષ પાર્થભાઈ ગોંડલિયાના જણાવ્યા મુજબ, 20 જેટલા વિવિધ વિભાગોમાં 200 થી વધુ કાર્યકર્તાઓ દ્વારા રથયાત્રાનું ઝીણવટભર્યું આયોજન કરાયું છે. જે ભક્તો પ્રત્યક્ષ જોડાઈ શકે તેમ નથી, તેમના માટે યુટ્યુબ, ફેસબુક અને સમિતિની વેબસાઇટ પર લાઈવ પ્રસારણની વ્યવસ્થા પણ કરવામાં આવી છે.

સ્વચ્છતા અભિયાન અને ચુસ્ત પોલીસ બંદોબસ્ત 

રથયાત્રા સુભાષનગરથી શરૂ થઈને મહિલા કોલેજ, રૂપાણી સર્કલ, ઘોઘા જકાતનાકા, કાળાનાળા, નિલમબાગ ચોક, જશોનાથ ચોક સહિતના રાજમાર્ગો પર ફરી મોડી સાંજે પરત ફરશે. યાત્રા દરમિયાન ABVP ના યુવાનો દ્વારા 'સ્ટુડન્ટ ફોર સેવા' અંતર્ગત વિશેષ સફાઈ અભિયાન હાથ ધરવામાં આવશે. લાખોની જનમેદનીને ધ્યાનમાં રાખીને વહીવટી અને પોલીસ તંત્ર દ્વારા સમગ્ર રૂટ પર સુરક્ષાનો અત્યંત ચુસ્ત બંદોબસ્ત ગોઠવી દેવામાં આવ્યો છે.