અંજારના ગાંધી ફળિયામાં પોલીસનો દરોડો: રહેણાંક મકાનમાંથી વિદેશી દારૂ ઝડપાયો, અલગ-અલગ બ્રાન્ડની 75 બોટલો મળી આવી

અંજાર શહેરમાં પ્રોહિબિશનના કાયદાનો કડક અમલ કરાવતા પોલીસે ગાંધી ફળિયા વિસ્તારમાં આવેલા એક રહેણાંક મકાનમાં દરોડો પાડીને વિદેશી દારૂનો જથ્થો ઝડપી પાડ્યો છે. પોલીસે 23,030 રૂપિયાની કિંમતની 75 બોટલો જપ્ત કરી એક શખ્સ સામે ગુનો નોંધી કાયદેસરની કાર્યવાહી હાથ ધરી છે. આ કાર્યવાહીથી શહેરમાં ગેરકાયદે વેપાર કરતા તત્વોમાં ચકચાર મચી જવા પામી છે.

બાતમીના આધારે રહેણાંક મકાનમાં દરોડો

સરહદી રેન્જ ભુજના આઈજી ચિરાગ કોરડીયા અને પૂર્વ કચ્છના એસપી સાગર બાગમારની સૂચનાથી અંજાર વિભાગના ડીવાયએસપી મુકેશ ચૌધરીના માર્ગદર્શન હેઠળ દારૂબંધીની ઝુંબેશ ચલાવવામાં આવી રહી છે. આ દરમિયાન અંજાર પોલીસ સ્ટેશનના પીઆઈ એચ.એ. જાડેજા અને તેમની ટીમને ચોક્કસ બાતમી મળી હતી કે, ગાંધી ફળિયામાં આવેલા ત્રિકમરાય એપાર્ટમેન્ટમાં રહેતો યશ સોની પોતાના ઘરમાં વિદેશી દારૂનો જથ્થો રાખીને તેનું ગેરકાયદેસર વેચાણ કરે છે. આ સચોટ માહિતીના આધારે પોલીસે તુરંત જ મકાનમાં દરોડો પાડ્યો હતો.

અલગ-અલગ બ્રાન્ડની 75 બોટલો મળી આવી

પોલીસની સઘન તપાસ દરમિયાન યશ સોનીના મકાનમાંથી વિવિધ બ્રાન્ડની વિદેશી દારૂની બોટલો મળી આવી હતી. જેમાં મેજિક મોમેન્ટ્સ જામુન, આઇકોનિક વ્હાઇટ ગ્રેઇન વિસ્કી અને સ્ટર્લિંગ રિઝર્વ ક્લાસિક બ્લેન્ડેડ વિસ્કીની કુલ 75 બોટલોનો સમાવેશ થાય છે. પોલીસે આ તમામ દારૂનો જથ્થો કબ્જે લીધો હતો, જેની કુલ અંદાજિત કિંમત 23,030 રૂપિયા થવા જાય છે.

પ્રોહિબિશન એક્ટ હેઠળ ગુનો નોંધી સઘન તપાસ શરૂ

આ સમગ્ર બનાવ અંગે અંજાર પોલીસે આરોપી યશ સોની સામે ગુજરાત પ્રોહિબિશન એક્ટની વિવિધ કલમો હેઠળ ગુનો દાખલ કર્યો છે. હાલમાં પોલીસે આરોપી આ દારૂનો જથ્થો ક્યાંથી લાવ્યો હતો, તેની સપ્લાય ચેઈન શું હતી અને આ ગેરકાયદેસર નેટવર્કમાં અન્ય કોઈ વ્યક્તિઓ જોડાયેલા છે કે કેમ, તે દિશામાં તપાસના ચક્રો ગતિમાન કર્યા છે.