સરકારી આવાસ પર કબજો હવે નહીં ચાલે :: AMCનો કડક એક્શન પ્લાન, EWS આવાસમાં ગેરકાયદે કબજો કરનાર સામે પ્રથમ વખત FIR

અમદાવાદ મ્યુનિસિપલ કોર્પોરેશન (AMC) દ્વારા શહેરમાં સરકારી આવાસ યોજનાઓમાં થતા ગેરકાયદેસર કબજાઓ સામે હવે કડક વલણ અપનાવવામાં આવ્યું છે. AMCના ઇતિહાસમાં પ્રથમ વખત આર્થિક રીતે નબળા વર્ગ (EWS) માટે બનાવવામાં આવેલા આવાસમાં ગેરકાયદેસર રીતે કબજો કરનાર વ્યક્તિ સામે પોલીસ ફરિયાદ નોંધાવવામાં આવી છે. સેટેલાઇટ પોલીસ સ્ટેશનમાં નોંધાયેલી આ FIR બાદ કોર્પોરેશને સ્પષ્ટ સંદેશ આપ્યો છે કે સરકારી મિલકત પર કોઈપણ પ્રકારનો અનધિકૃત કબજો કે સીલ તોડવાની પ્રવૃત્તિ હવે સહન કરવામાં આવશે નહીં.

જીવા ડોસાના છાપરા વિસ્તારમાં ગેરકાયદેસર કબજાનો મામલો

અમદાવાદના ટી.પી. સ્કીમ નંબર 21 (આંબાવાડી), ફાઇનલ પ્લોટ નંબર 232 ખાતે આવેલા જીવા ડોસાના છાપરા વિસ્તારમાં આવેલી ધી જય જોગમાયા કો.ઓ.હા.સો.લી.ના EWS આવાસોમાં આ સમગ્ર મામલો સામે આવ્યો હતો. AMC હાઉસિંગ EWS આવાસના ચેરમેન દર્શન શાહના જણાવ્યા મુજબ, આ વિસ્તારમાં આવેલા કેટલાક આવાસ લાંબા સમયથી ખાલી પડ્યા હતા. આ ખાલી રહેલા આવાસોમાં ચાર અલગ અલગ વ્યક્તિઓ દ્વારા કોઈપણ મંજૂરી વિના ગેરકાયદેસર રીતે પ્રવેશ કરી કબજો જમાવવામાં આવ્યો હતો.

આ બાબતની જાણ થતાં જ AMCના એસ્ટેટ વિભાગ અને હાઉસિંગ પ્રોજેક્ટ વિભાગ દ્વારા સંયુક્ત રીતે કાર્યવાહી હાથ ધરવામાં આવી હતી. અધિકારીઓએ સ્થળ પર પહોંચી તમામ ગેરકાયદેસર કબજેદારોને આવાસમાંથી દૂર કર્યા હતા. કાર્યવાહી બાદ ત્રણ વ્યક્તિઓ ફરીથી આવાસમાં પરત ફર્યા નહોતા, પરંતુ એક વ્યક્તિ દ્વારા વારંવાર ગેરકાયદેસર રીતે ફરી આવાસમાં પ્રવેશ કરવાનો પ્રયાસ કરવામાં આવ્યો હતો.

વારંવાર સીલ તોડીને આવાસમાં પ્રવેશ કરાયો

કોર્પોરેશન દ્વારા સંબંધિત આવાસને ખાલી કરાવી પ્રથમ વખત સીલ કરવામાં આવ્યું હતું. પરંતુ થોડા સમય બાદ આરોપીએ સીલ તોડી ફરીથી આવાસમાં પ્રવેશ કર્યો હતો. ત્યારબાદ AMCના અધિકારીઓએ વધુ કડક પગલું ભરતા આવાસને ફરીથી સીલ કર્યો હતો અને દરવાજા પર પ્લાયવુડ લગાવી સંપૂર્ણ રીતે પ્રવેશ બંધ કરી દીધો હતો.

તેમ છતાં આરોપીએ નિયમોનો ભંગ કરીને પ્લાયવુડ તોડી ફરી એક વખત આવાસમાં ગેરકાયદેસર રીતે પ્રવેશ કર્યો હતો. કોર્પોરેશનની મિલકતમાં વારંવાર બિનઅધિકૃત પ્રવેશ અને સીલ તોડવાની ઘટનાને ગંભીરતાથી લેવામાં આવી હતી.

ચેતવણી બાદ પણ નિયમોનો ભંગ ચાલુ રહ્યો

AMCના એસ્ટેટ વિભાગ દ્વારા આવાસ પર સત્તાવાર નોટિસ લગાવવામાં આવી હતી. જેમાં સ્પષ્ટ જણાવાયું હતું કે એસ્ટેટ ઓફિસરની પૂર્વ મંજૂરી વગર કોઈપણ વ્યક્તિએ સીલ કરાયેલા આવાસમાં પ્રવેશ કરવો નહીં. જો કોઈ વ્યક્તિ નિયમોનું ઉલ્લંઘન કરશે તો તેની સામે કાયદેસરની કાર્યવાહી કરવામાં આવશે.

આ ચેતવણી છતાં આરોપી દ્વારા વારંવાર નિયમોનો ભંગ કરવામાં આવ્યો હતો. કોર્પોરેશનની મિલકતમાં અનધિકૃત પ્રવેશ, સીલ તોડવી અને કબજો જાળવી રાખવાની ઘટનાને પગલે AMCએ હવે પોલીસ ફરિયાદ કરવાનો નિર્ણય લીધો હતો.

સેટેલાઇટ પોલીસ સ્ટેશનમાં FIR નોંધાઈ

AMCના એસ્ટેટ વિભાગ અને હાઉસિંગ પ્રોજેક્ટ વિભાગ દ્વારા અંતે સેટેલાઇટ પોલીસ સ્ટેશનમાં સત્તાવાર ફરિયાદ નોંધાવવામાં આવી હતી. પોલીસે ફરિયાદના આધારે ગુનો દાખલ કરીને આગળની કાયદેસરની કાર્યવાહી શરૂ કરી છે. સાથે જ સંબંધિત આવાસમાંથી માલસામાન જપ્ત કરવામાં આવ્યો છે અને આવાસને ફરીથી સીલ કરીને સુરક્ષિત કરવામાં આવ્યું છે.

EWS આવાસમાં ગેરકાયદે કબજા સામે ઝીરો ટોલરન્સ નીતિ

AMC દ્વારા જણાવવામાં આવ્યું છે કે EWS આવાસ યોજના અંતર્ગત બનાવવામાં આવેલા મકાનો માત્ર પાત્ર લાભાર્થીઓ માટે જ છે. કોઈપણ વ્યક્તિ દ્વારા ગેરકાયદેસર રીતે કબજો જમાવવો, સરકારી મિલકતને નુકસાન પહોંચાડવું અથવા સીલ તોડવાનો પ્રયાસ કરવો ગંભીર ગુનો ગણાશે.

AMCના ઇતિહાસમાં પ્રથમ વખત EWS આવાસના ગેરકાયદેસર કબજેદાર સામે નોંધાયેલી આ FIRને કોર્પોરેશનની કડક નીતિનું ઉદાહરણ માનવામાં આવી રહ્યું છે. આવનારા સમયમાં પણ સરકારી આવાસો અને મિલકતોને ગેરકાયદેસર કબજાથી મુક્ત રાખવા માટે આવી કાર્યવાહી ચાલુ રાખવામાં આવશે તેવો સંદેશ AMC દ્વારા આપવામાં આવ્યો છે.