અમદાવાદને કરોડોની ભેટ: કેન્દ્રીય ગૃહમંત્રી અમિત શાહના હસ્તે રૂ. 405 કરોડના વિકાસકાર્યોનું લોકાર્પણ - ખાતમુહૂર્ત

અમદાવાદ શહેર અને ગાંધીનગર લોકસભા મતક્ષેત્રના સર્વગ્રાહી વિકાસને નવી ઊંચાઈઓ પર લઈ જવાના સંકલ્પ સાથે કેન્દ્રીય ગૃહ અને સહકારીતા મંત્રી અમિત શાહ દ્વારા અમદાવાદમાં રૂ.405 કરોડના વિવિધ પ્રજાલક્ષી અને માળખાકીય વિકાસ કાર્યોના લોકાર્પણ અને ખાતમુહૂર્ત કરવામાં આવ્યા છે. આ અંતર્ગત અમદાવાદ મ્યુનિસિપલ કોર્પોરેશન અમદાવાદ અર્બન ડેવલપમેન્ટ ઓથોરિટીઅને માર્ગ-મકાન વિભાગ હેઠળ આવતા વિવિધ મહત્વકાંક્ષી પ્રકલ્પોનું ઇ-લોકાર્પણ અને ખાતમુહૂર્ત સંપન્ન થયું છે. આ ભવ્ય ડિજિટલ કાર્યક્રમમાં મુખ્યત્વે પર્યાવરણની જાળવણી અને પ્રદૂષણ મુક્ત ગ્રીન સિટીના નિર્માણ માટે ઓક્સિજન પાર્ક’ અને નાગરિકોની પરિવહન સુવિધાને વધુ આધુનિક બનાવવા માટે JBM કંપનીની 80 નવી એર કન્ડિશન્ડ ઇલેક્ટ્રિક BRTS બસોનું લોકાર્પણ આકર્ષણનું કેન્દ્ર બન્યું હતું.

ગ્રીન અમદાવાદ અભિયાન: 101 ઓક્સિજન પાર્ક અને 22.71 લાખથી વધુ વૃક્ષારોપણ

અમદાવાદ શહેરને ગ્લોબલ વોર્મિંગની અસરો સામે સુરક્ષિત કરવા અને નાગરિકોને શુદ્ધ હવા મળી રહે તે માટે કેન્દ્રીય ગૃહમંત્રીએ ઓક્સિજન પાર્ક યોજના ખુલ્લી મૂકી છે. આ અંતર્ગત સમગ્ર શહેરી વિસ્તારમાં મોટા પાયે ગ્રીન બેલ્ટ તૈયાર કરવાનું આયોજન છે અમદાવાદ શહેર વિસ્તારમાં અલગ-અલગ જગ્યાએ કુલ ૨૨,૭૧,૪૨૨ જેટલા છોડ અને વૃક્ષોનું વાવેતર કરીને એક નવો વિક્રમ સ્થાપિત કરવામાં આવશે.કેન્દ્રીય ગૃહમંત્રીના પોતાના સંસદીય મતક્ષેત્ર એવા ગાંધીનગર લોકસભા વિસ્તારમાં ૬૧ ઓક્સિજન પાર્ક તૈયાર કરવામાં આવ્યા છે. આ પાર્કમાં 6,44,522 ચોરસમીટર વિસ્તારને આવરી લઈને અંદાજે ૧૫,૯૬,૩૦૦ છોડનું વાવેતર કરીને આખા વિસ્તારને હરિયાળો બનાવવામાં આવશે.

કોર્પોરેટ સોશિયલ રિસ્પોન્સિબિલિટી અને જનભાગીદારી

કેન્દ્રીય ગૃહમંત્રીએ ભારપૂર્વક જણાવ્યું હતું કે કેવળ વૃક્ષો વાવવા પૂરતું નથી, પરંતુ તેમનું યોગ્ય જતન અને ઉછેર થાય તે પણ એટલું જ અનિવાર્ય છે. આ ઉમદા હેતુ માટે કોર્પોરેટ જગત અને પ્રતિષ્ઠિત સંસ્થાઓને આ ગ્રીન અભિયાનમાં જોડવામાં આવી છે.આ અગ્રણી એજન્સીઓ અને કોર્પોરેટ ગૃહોને આ ઓક્સિજન પાર્કના વૃક્ષોના ઉછેર, ખાતર, પાણી અને સુરક્ષા સહિતના સંપૂર્ણ જતનની જવાબદારી સોંપવામાં આવી છે. ઇ-લોકાર્પણ કાર્યક્રમ પૂર્ણ થયા બાદ કેન્દ્રીય ગૃહમંત્રી અમિત શાહે પોતે ગોતા-ગોધવી કેનાલ, ભાડજ, સરખેજ અને વાડજ જેવા મહત્વના વિસ્તારોની રૂબરૂ મુલાકાત લીધી હતી અને સ્વહસ્તે વૃક્ષારોપણ કરીને આ મહાઅભિયાનનો પ્રારંભ કરાવ્યો હતો.

ઇન્ફ્રાસ્ટ્રક્ચર અને પ્રજાલક્ષી સુવિધાઓનું વિસ્તરણ

AMC, ઔડા અને માર્ગ-મકાન વિભાગ દ્વારા આયોજિત આ કાર્યક્રમોમાં માત્ર પર્યાવરણ જ નહીં પરંતુ રોડ-રસ્તા, ઓવરબ્રિજ, પીવાના પાણી અને ડ્રેનેજ લાઈન જેવા પાયાના માળખાકીય કાર્યોના પણ ખાતમુહૂર્ત કરવામાં આવ્યા છે. આ સુવિધાઓ આગામી સમયમાં સેટેલાઇટ વિસ્તારો અને નવા ભળેલા વિસ્તારોના ટ્રાફિક તથા માળખાકીય પ્રશ્નોને હલ કરશે. કેન્દ્રીય ગૃહમંત્રી અમિત શાહે આ અવસરે સંબોધન કરતાં જણાવ્યું હતું કે, વડાપ્રધાન નરેન્દ્ર મોદીના નેતૃત્વમાં ડબલ એન્જિન સરકાર દેશના તમામ શહેરોને સ્માર્ટ અને ગ્રીન બનાવવાની દિશામાં અવિરત કામ કરી રહી છે. અમદાવાદ આજે ઇન્ફ્રાસ્ટ્રક્ચરની સાથે સાથે પર્યાવરણ સંતુલન જાળવવામાં પણ દેશનું અગ્રણી મોડેલ બની રહ્યું છે. 405 કરોડના આ વિવિધ પ્રોજેક્ટ્સ અમદાવાદની જનતાના જીવનધોરણને વધુ સુખદાયી, સ્વસ્થ અને આધુનિક બનાવશે.