અમદાવાદ :: 149મી રથયાત્રા પહેલાં સાયબર ક્રાઇમની ચાંપતી નજર, સોશિયલ મીડિયા પર ઉશ્કેરણીજનક પોસ્ટ કરનાર સામે થશે કડક કાર્યવાહી

અમદાવાદમાં આવતીકાલે યોજાનારી ભગવાન જગન્નાથજીની 149મી રથયાત્રાને લઈને શહેર પોલીસ દ્વારા સુરક્ષા વ્યવસ્થા સાથે સાથે સોશિયલ મીડિયા પર પણ ખાસ નજર રાખવામાં આવી રહી છે. અમદાવાદ સાયબર ક્રાઇમ બ્રાન્ચ દ્વારા રથયાત્રા દરમિયાન કોઈપણ પ્રકારની અફવા, ઉશ્કેરણીજનક પોસ્ટ કે ધાર્મિક લાગણી દુભાવતી સામગ્રી ફેલાવવામાં ન આવે તે માટે સતત મોનિટરિંગ શરૂ કરવામાં આવ્યું છે.

DCP ડો. લવિના સિન્હા, સાયબર ક્રાઇમ અમદાવાદએ જણાવ્યું હતું કે રથયાત્રાને ધ્યાનમાં રાખીને અમદાવાદ પોલીસની સાયબર ક્રાઇમ બ્રાન્ચ સોશિયલ મીડિયાના તમામ પ્લેટફોર્મ પર ચાંપતી નજર રાખી રહી છે. આ કામગીરી માટે સાયબર ક્રાઇમની 3 વિશેષ ટીમો કાર્યરત કરવામાં આવી છે. આ ઉપરાંત મોટી સંખ્યામાં પોલીસ કર્મચારીઓ દિવસ-રાત 24 કલાક સોશિયલ મીડિયા મોનિટરિંગની કામગીરીમાં તૈનાત છે.

ધાર્મિક લાગણી દુભાવતી પોસ્ટ સામે તાત્કાલિક કાર્યવાહી

સાયબર ક્રાઇમ બ્રાન્ચ દ્વારા સોશિયલ મીડિયા પ્લેટફોર્મ જેમ કે ફેસબુક, ઇન્સ્ટાગ્રામ, વોટ્સએપ, એક્સ સહિતના વિવિધ માધ્યમો પર સતત વોચ રાખવામાં આવી રહી છે. કોઈપણ વ્યક્તિ દ્વારા ધાર્મિક લાગણી દુભાવતી, સમાજમાં તણાવ ઉભો કરતી અથવા ઉશ્કેરણીજનક પોસ્ટ, વીડિયો કે કોમેન્ટ કરવામાં આવશે તો તેની સામે કાયદેસરની કડક કાર્યવાહી કરવામાં આવશે.

પોલીસ દ્વારા નાગરિકોને અપીલ કરવામાં આવી છે કે રથયાત્રા જેવા ધાર્મિક અને પરંપરાગત આયોજન દરમિયાન કોઈપણ પ્રકારની ખોટી માહિતી કે અફવા ફેલાવવી નહીં. સોશિયલ મીડિયા પર કોઈ પોસ્ટ શેર કરતા પહેલા તેની ખરાઈ કરવી જરૂરી છે. કારણ કે ખોટી માહિતી ફેલાવવી, ઉશ્કેરણીજનક લખાણ કરવું અથવા આવા ગ્રુપ સાથે જોડાવું પણ ગુનાહિત પ્રવૃત્તિમાં આવે છે.

શાંતિપૂર્ણ રથયાત્રા માટે લોકોનો સહયોગ જરૂરી

અમદાવાદ સાયબર ક્રાઇમ બ્રાન્ચ દ્વારા જણાવાયું છે કે રથયાત્રા શાંતિપૂર્ણ વાતાવરણમાં, ભક્તિભાવ અને ઉત્સાહ સાથે પૂર્ણ થાય તે માટે પોલીસ તમામ જરૂરી પગલાં લઈ રહી છે. જોકે આ સમગ્ર પ્રક્રિયામાં નાગરિકોનો સહયોગ પણ એટલો જ મહત્વનો છે.

પોલીસે લોકોને અપીલ કરી છે કે જો કોઈ વ્યક્તિને સોશિયલ મીડિયા પર શંકાસ્પદ પોસ્ટ, અફવા ફેલાવતું કન્ટેન્ટ અથવા કોઈ વિવાદાસ્પદ ગ્રુપ અંગે માહિતી મળે તો તાત્કાલિક અમદાવાદ સાયબર ક્રાઇમ બ્રાન્ચને જાણ કરવામાં આવે. જેથી સમયસર કાર્યવાહી કરી શકાય અને રથયાત્રાનો માહોલ શાંતિપૂર્ણ જળવાઈ રહે.