દિલ તો બચ્ચા હૈ જી....: અમદાવાદ પોલીસ કમિશનર અનુપમસિંહ ગેહલોતના કડક મિજાજ પાછળ દેખાયું કોમળ હૃદય, બાળકોને ચોકલેટ વહેંચીને જીત્યા દિલ!

અમદાવાદ શહેરના કાયદો, વ્યવસ્થા અને ગુનેગારો સામે કડક હાથે કામ લેવા માટે જાણીતા શહેર પોલીસ કમિશનર અનુપમસિંહ ગેહલોતનો એક અત્યંત માનવીય અને ભાવુક અંદાજ સામે આવ્યો છે. સામાન્ય રીતે પોલીસના કડક મિજાજ અને કડક શિસ્તથી પરિચિત નાગરિકોને આજે પોલીસ કમિશનરના નરમ અને કોમળ હૃદયના દર્શન થયા હતા, જ્યારે તેમણે નાના બાળકો વચ્ચે જઈને તેમને ચોકલેટ વહેંચીને સૌના દિલ જીતી લીધા હતા. અમદાવાદ પોલીસના વડા તરીકે કડક વહીવટ અને ગુનાખોરી ડામવા માટે સતત સક્રિય રહેતા અનુપમસિંહ ગેહલોત મુલાકાત દરમિયાન નાના બાળકોને મળ્યા હતા.

પોલીસના ગણવેશ અને હોદ્દાના પ્રભાવ વચ્ચે તેમણે બાળકો સાથે અત્યંત સાહજિકતાથી સંવાદ સાધ્યો હતો. બાળકોનો પોલીસ પ્રત્યેનો ડર દૂર થાય અને તેમનામાં મિત્રતાની ભાવના કેળવાય તેવા આશયથી કમિશનરે સ્વહસ્તે બાળકોને ચોકલેટનું વિતરણ કર્યું હતું.પોલીસ કમિશનર જેવા ઉચ્ચ હોદ્દા પર હોવા છતાં, બાળકો સાથે લુડો, હસતા મુખે વાતો કરવી અને ચોકલેટ આપીને વહાલ પ્રગટ કરવાનો તેમનો આ વીડિયો અને ફોટો સોશિયલ મીડિયા તેમજ સ્થાનિક સ્તરે ભારે પ્રશંસા પામી રહ્યા છે.

પોલીસ કમિશનરના આ સંવેદનશીલ પગલાં પાછળનો મુખ્ય હેતુ એ છે કે સમાજમાં, ખાસ કરીને નવી પેઢી અને બાળકોના મનમાં પોલીસની છબી માત્ર દંડ આપનારી કે ડરાવનારી સંસ્થા તરીકેની ન રહે, પરંતુ એક રક્ષક અને મિત્ર તરીકેની બને. 'ફ્રેન્ડલી પોલીસિંગ' ના આ વલણથી બાળકોમાં પણ સુરક્ષાની ભાવના મજબૂત બને છે. વાલીઓ અને ઉપસ્થિત નાગરિકોએ પણ પોલીસ કમિશનરશ્રીના આ પ્રેમાળ અને સંવેદનશીલ હૃદયના વખાણ કર્યા હતા અને જણાવ્યું હતું કે આવા ઉચ્ચ અધિકારીઓ જ્યારે સામાન્ય પ્રજા અને બાળકો સાથે આટલી આત્મીયતાથી જોડાય છે, ત્યારે પોલીસ અને પ્રજા વચ્ચેનો સંબંધ વધુ મજબૂત બને છે.