મુંબઈ-અમદાવાદ બુલેટ ટ્રેન પ્રોજેક્ટ: સાબરમતી ખાતે 1640 ટનના સૌથી ભારે પોર્ટલ બીમનું સફળ લોન્ચિંગ

ગુજરાતમાં આકાર લઈ રહેલા અત્યંત મહત્વાકાંક્ષી મુંબઈ-અમદાવાદ બુલેટ ટ્રેન પ્રોજેક્ટની કામગીરીએ વધુ એક ઐતિહાસિક સિદ્ધિ હાંસલ કરી છે. અમદાવાદના સાબરમતી ખાતે સૌથી ભારે અને અંતિમ પ્રીકાસ્ટ-પ્રિસ્ટ્રેસ્ડ પોર્ટલ બીમનું સફળતાપૂર્વક લોન્ચિંગ કરવામાં આવ્યું છે. આ સાથે જ અમદાવાદમાં રેલવે લાઇન ઉપરના તમામ 13 ભારે પોર્ટલ બીમનું ઇન્સ્ટોલેશન કાર્ય સંપન્ન થઈ ગયું છે.

18 કિલોમીટર લાંબો એલિવેટેડ વાયાડક્ટ અને 13 પોર્ટલ બીમ

બુલેટ ટ્રેન પ્રોજેક્ટ અંતર્ગત અમદાવાદમાં 18 કિલોમીટર લાંબો એલિવેટેડ વાયાડક્ટ તૈયાર કરવામાં આવી રહ્યો છે. આ વાયાડક્ટ હાલની વ્યસ્ત રેલવે લાઇનોની ઉપરથી પસાર થાય છે. આ રેલવે ક્રોસિંગને સુરક્ષિત રીતે પાર કરવા માટે ખાસ 13 ભારે પોર્ટલ બીમની ડિઝાઇન તૈયાર કરવામાં આવી હતી. જેમાં મુંબઈ-અમદાવાદ મુખ્ય રેલવે લાઇન પર મણિનગર ખાતે 5 અને વટવા ખાતે 7 પોર્ટલ બીમ, જ્યારે અમદાવાદ-દિલ્હી મુખ્ય લાઇન પર સાબરમતી ખાતે 1 પોર્ટલ બીમનું સફળતાપૂર્વક સ્થાપન કરવામાં આવ્યું છે.

1640 મેટ્રિક ટન વજન ધરાવતો બીમ માત્ર 3 કલાકમાં લોન્ચ કરાયો

સાબરમતી ખાતે લોન્ચ કરવામાં આવેલો આ અંતિમ પોર્ટલ બીમ પ્રોજેક્ટમાં વપરાયેલા સૌથી મોટા અને ભારે બીમ પૈકીનો એક છે. આ પ્રીકાસ્ટ કોંક્રિટ પોર્ટલ બીમનું વજન અંદાજે 1640 મેટ્રિક ટન છે. તેની લંબાઈ 34.5 મીટર અને ક્રોસ-સેક્શન 5.5 મીટર × 4.5 મીટર છે. આટલા વિશાળ બીમને 2200 મેટ્રિક ટન ક્ષમતા ધરાવતી રાક્ષસી ક્રોલર ક્રેનની મદદથી માત્ર 3 કલાકના ટૂંકા ગાળામાં જ સફળતાપૂર્વક લોન્ચ કરી દેવામાં આવ્યો હતો.

રેલવે વ્યવહારને કોઈ જ વિક્ષેપ વિના ઝીણવટભર્યું આયોજન

કામગીરીનું સ્થળ અત્યંત મર્યાદિત હોવા છતાં નેશનલ હાઈ સ્પીડ રેલ કોર્પોરેશનના એન્જિનિયરો દ્વારા અત્યંત ઝીણવટપૂર્વકનું આયોજન કરવામાં આવ્યું હતું. ભારતીય રેલવે સાથેના ઉત્તમ સંકલન અને કડક સુરક્ષા ધોરણોના પાલનને કારણે, આ બીમ લોન્ચિંગની જટિલ પ્રક્રિયા દરમિયાન રેલવેની નિયમિત ટ્રેન સેવાઓને સહેજ પણ વિક્ષેપ પડ્યો ન હતો અને ટ્રેનો રાબેતા મુજબ ચાલુ રહી હતી.