અમરેલી: આગરીયા ગામમાં સાવજોએ મચાવ્યો આતંક, શ્વાન અને આખલાનો શિકાર કરવા પાછળ દોડ્યા પણ ખાલી હાથે પાછા ફર્યા!

અમરેલી જિલ્લાના રાજુલા તાલુકામાં વન્યજીવો માનવ વસવાટ તરફ આવી ચડવાની ઘટનાઓ સતત વધી રહી છે. રાજુલાના મોટા આગરીયા ગામમાં મોડી રાત્રે શિકારની શોધમાં એકસાથે 3 સિંહો ઘૂસી આવ્યા હતા. સિંહો ગામની બજારોમાં શિકાર માટે આંટાફેરા મારતા હોવાના અને તેમની સામે જીવ બચાવવા ભાગતા પશુઓના ફિલ્મી દ્રશ્યો ગામમાં લાગેલા CCTV કેમેરામાં લાઈવ કેદ થયા છે.

જીવ બચાવવા આખલો અને શ્વાન ભાગ્યા

ગામની બજારમાં અચાનક સિંહોની એન્ટ્રી થતાં જ ત્યાં હાજર પશુઓમાં અફરાતફરી મચી ગઈ હતી. રસ્તા પર ઉભેલા શ્વાન અને એક આખલો સિંહોને જોઈને જીવ બચાવવા માટે ગામની બહાર દૂર સુધી ભાગ્યા હતા. સિંહોએ પણ આ પશુઓનો શિકાર કરવા માટે તેમની પાછળ જોરદાર દોટ મૂકી હતી. સિંહોથી બચવા માટે આખલો અને શ્વાન દોડીને મુખ્ય રોડ પર ચડી ગયા હતા.

શ્વાન અને સિંહ વચ્ચે મિનિટો સુધી હિંમતનો જંગ

CCTV ફૂટેજમાં જોવા મળ્યા મુજબ, એક શ્વાન સિંહની બિલકુલ નજીક આવી ગયો હતો. સિંહને સામે જોઈને શ્વાનનો જીવ તાળવે ચોંટ્યો હતો અને તેણે ડરના માર્યા જોરજોરથી ભસવાનું શરૂ કરી દીધું હતું. જોકે, આવી કટોકટીની પળે પણ શ્વાને હિંમત હાર્યા વગર કેટલીક સેકન્ડ સુધી સિંહનો સામનો કર્યો હતો અને અંતે તે ત્યાંથી સફળતાપૂર્વક ભાગી છૂટ્યો હતો. સિંહના પંજામાંથી શ્વાનનો આબાદ બચાવ થયો હતો.