ગ્રીન સાણંદ તરફ કદમ:: 30 હજાર વૃક્ષો વાવવાના દ્રઢ નિર્ધાર સાથે સાણંદ ઇન્ડસ્ટ્રીઝ એસોસિએશને કર્યું વૃક્ષારોપણ

પર્યાવરણીય ટકાઉપણું અને હરિયાળા ભવિષ્ય પ્રત્યેની પોતાની પ્રતિબદ્ધતાને વધુ મજબૂત કરતા, સાણંદ ઇન્ડસ્ટ્રીઝ એસોસિએશન દ્વારા ઇકો પાર્ક, GIDC, સાણંદ ખાતે એક ભવ્ય અને અભૂતપૂર્વ મેગા પ્લાન્ટેશન ડ્રાઇવ (વૃક્ષારોપણ ઝુંબેશ) નું સફળતાપૂર્વક આયોજન કરવામાં આવ્યું હતું. આ વિશેષ પર્યાવરણીય પહેલ અંતર્ગત ઇકો પાર્ક વિસ્તારમાં આશરે 30,000 જેટલા રોપાઓનું વાવેતર કરવાનો સંકલ્પ સાકાર કરવામાં આવ્યો છે.આ ભગીરથ કાર્યનું આયોજન ‘આત્મન ફાઉન્ડેશન ફોર ઇનોવેશન્સ’ ની ભાગીદારીમાં અને ‘ઇન્ગરસોલ રેન્ડ (ઇન્ડિયા) લિમિટેડ’ ના કોર્પોરેટ સોશિયલ રિસ્પોન્સિબિલિટી કાર્યક્રમ હેઠળ આર્થિક અને સામાજિક સમર્થન સાથે કરવામાં આવ્યું હતું.

આ ગરિમામય કાર્યક્રમની શરૂઆત SIA ની CSR કમિટીના ચેરમેન ચેતન ઠક્કર દ્વારા સ્વાગત પ્રવચન સાથે થઈ હતી. તેમણે પોતાના સંબોધનમાં ઉદ્યોગોની આસપાસ એક ટકાઉ અને પ્રકૃતિ-મૈત્રીપૂર્ણ ઔદ્યોગિક ઇકોસિસ્ટમ વિકસાવવા માટે સામૂહિક જવાબદારીના મહત્વ પર વિશેષ ભાર મૂક્યો હતો. ત્યારબાદ, SIA ના પ્રમુખ અજિત શાહ, સચિવ શરદભાઈ અને SIA ઇન્ફ્રાસ્ટ્રક્ચર કમિટીના ચેરમેન સંજય મિશ્રા દ્વારા ઉપસ્થિત તમામ આમંત્રિત મહાનુભાવોનું હાર્દિક સ્વાગત અને સન્માન કરવામાં આવ્યું હતું.

પર્યાવરણની જાળવણી અને ટકાઉ વિકાસમાં ઉદ્યોગોના પ્રદાનને બિરદાવવા માટે કાર્યક્રમમાં વિશેષ સન્માન સમારોહ યોજાયો હતો. ગુજરાત પ્રદૂષણ નિયંત્રણ બોર્ડના અધ્યક્ષ આર. બી. બારડે, ઇન્ગરસોલ રેન્ડ (ઇન્ડિયા) લિમિટેડના CSS ના મેનેજિંગ ડિરેક્ટર સુનિલ ખંડુજાને તેમની કંપનીના ઉલ્લેખનીય પર્યાવરણીય યોગદાન અને સક્રિય CSR પ્રવૃત્તિઓ માટે પ્રતિષ્ઠિત 'ગ્રીન એવોર્ડ' એનાયત કર્યો હતો. આ ઉપરાંત, બીના શાહ દ્વારા GPCB ના પ્રાદેશિક અધિકારી ટી. એલ. પટેલનું વિશેષ સન્માન કરવામાં આવ્યું હતું.

કાર્યક્રમ દરમિયાન ઉદ્યોગ જગત, શૈક્ષણિક ક્ષેત્ર અને સરકારી વિભાગના અગ્રણીઓએ ટકાઉ વિકાસ અંગે પોતાના મંતવ્યો રજૂ કર્યા હતા. ઇકો પાર્કના ભવિષ્ય અને વિઝનને દર્શાવતી એક ટૂંકી પ્રેરણાદાયી ફિલ્મ પણ ઉપસ્થિત તમામ લોકો સમક્ષ પ્રદર્શિત કરવામાં આવી હતી. ફિલ્મ બાદ રાષ્ટ્રભક્તિના સુર સાથે 'વંદે માતરમ' નું ગાન કરવામાં આવ્યું હતું અને ત્યારબાદ તમામ મહાનુભાવો દ્વારા ઔપચારિક વૃક્ષારોપણ કરીને આ અભિયાનને ખુલ્લું મૂકવામાં આવ્યું હતું.