અમદાવાદમાં 149મી રથયાત્રાની તૈયારીઓ પૂર્ણ: હર્ષ સંઘવીએ કર્યું રૂટ નિરીક્ષણ, 16.5 કિમીના રૂટ પર સઘન પોલીસ બંદોબસ્ત અને AI ટેકનોલોજી

ગૃહ રાજ્યમંત્રી હર્ષ સંઘવીએ અમદાવાદમાં યોજાનારી 149મી જગન્નાથજી રથયાત્રાની તમામ તૈયારીઓ પૂર્ણ થઈ હોવાની સત્તાવાર જાહેરાત કરી છે. રથયાત્રાના 16.5 કિલોમીટર લાંબા રૂટ પર પોલીસ, મિલિટરી અને પેરામિલિટરી ફોર્સ ખડેપગે તૈનાત રહેશે. આ વર્ષે સુરક્ષા વ્યવસ્થાને વધુ સઘન બનાવવા માટે આર્ટિફિશિયલ ઈન્ટેલિજન્સ (AI) ટેકનોલોજી અને ડ્રોનનો વિશેષ ઉપયોગ કરવામાં આવી રહ્યો છે.

નેત્રોત્સવ અને રૂટનું ઝીણવટભર્યું નિરીક્ષણ 

ગૃહ રાજ્યમંત્રી હર્ષ સંઘવીએ આજે ભગવાન જગન્નાથના નેત્રોત્સવ અને ધ્વજારોહણ કાર્યક્રમમાં વિશેષ હાજરી આપી હતી. ભગવાન જગન્નાથના ચરણોમાં નમન કરી આરતી કર્યા બાદ તેમણે ઉચ્ચ પોલીસ અધિકારીઓ સાથે રથયાત્રાના સમગ્ર રૂટનું નિરીક્ષણ કર્યું હતું. આ તકે તેમણે જણાવ્યું હતું કે, વહીવટી તંત્રે દિવસ-રાત એક કરીને તમામ તૈયારીઓ પૂર્ણ કરી લીધી છે. રૂટ નિરીક્ષણ દરમિયાન તમામ સમાજના લોકો દ્વારા કરવામાં આવેલા ભવ્ય સ્વાગત બદલ તેમણે આભાર વ્યક્ત કર્યો હતો.

16 રેન્જમાં વહેંચાયો રૂટ, 65000 થી વધુ ફેસ રેકગ્નિશન ડેટા 

સુરક્ષા વ્યવસ્થાની વિગતો આપતા મંત્રીએ જણાવ્યું કે, ગજરાજથી લઈને રથ સુધીની યાત્રા 2.5 થી 3.5 કિમી લાંબી હોય છે અને કુલ રૂટ 16.5 કિમીનો છે. આ સમગ્ર રૂટને 16 રેન્જમાં વહેંચવામાં આવ્યો છે. સુરક્ષા માટે 10 IG, 42 DCP, 88 ACP અને 800 થી વધુ PI ને જવાબદારી સોંપાઈ છે. આ ઉપરાંત મિલિટરી અને પેરામિલિટરી ફોર્સની પણ મદદ લેવાઈ છે. શહેરમાં 59 નાકા પોઈન્ટ્સ કાર્યરત રહેશે. સ્માર્ટ પોલીસિંગ અંતર્ગત 65000 થી વધુ ફેસ રેકગ્નિશન ડેટાનો ઉપયોગ કરવામાં આવશે અને 100 થી વધુ ડ્રોન મારફતે સમગ્ર રૂટ પર સતત સર્વેલન્સ રખાશે.

પોલીસની સામાજિક પહેલ અને નાગરિકોને અપીલ 

ગુજરાત અને અમદાવાદ પોલીસે માત્ર કાયદો અને વ્યવસ્થા જાળવવા પૂરતું સીમિત ન રહેતા સામાજિક એકતા માટે 'એકતા રેલી' અને ક્રિકેટ ટુર્નામેન્ટ જેવા હકારાત્મક આયોજનો કર્યા છે. મૂંગા પ્રાણીઓની સંવેદનશીલતાને ધ્યાનમાં રાખીને ગજરાજ (હાથીઓ) પર ડેસિબલ મીટર લગાવવામાં આવ્યા છે. ગજરાજ પસાર ન થાય ત્યાં સુધી રૂટ પર DJ ન વગાડવા માટે લોકોને ખાસ અપીલ કરવામાં આવી છે.

રથયાત્રાના પવિત્ર દિવસે વહેલી સવારે 4 વાગ્યે કેન્દ્રીય ગૃહમંત્રી અમિત શાહ મંગળા આરતી કરશે અને ત્યારબાદ સવારે 7 વાગ્યે મુખ્યમંત્રી ભૂપેન્દ્ર પટેલ પહિંદ વિધિ કરીને રથયાત્રાને પ્રસ્થાન કરાવશે. તંત્ર દ્વારા નાગરિકોને ખાસ અપીલ કરવામાં આવી છે કે રથયાત્રા નિહાળવા માટે કોઈ પણ જર્જરિત કે ભયજનક ઈમારતો પાસે ઉભા રહેવાનું ટાળવું જેથી કોઈ અનિચ્છનીય દુર્ઘટના ન ઘટે.