ગુજરાતમાં આગામી 7 દિવસ હળવાથી મધ્યમ વરસાદની આગાહી: 11 અને 12 જુલાઈએ માછીમારોને દરિયો ન ખેડવા સૂચના

હવામાન વિભાગ દ્વારા ગુજરાત રાજ્ય માટે આગામી 16 જુલાઈ સુધીની નવી વરસાદી આગાહી જાહેર કરવામાં આવી છે. જે મુજબ આગામી 7 દિવસ સુધી રાજ્યના અલગ-અલગ વિસ્તારોમાં હળવોથી મધ્યમ વરસાદ પડવાની સંભાવના છે. દરિયાકાંઠે ભારે પવન ફૂંકાવાની શક્યતા હોવાથી આગામી 11 અને 12 જુલાઈના રોજ માછીમારોને દરિયો ન ખેડવા માટે ખાસ ચેતવણી આપવામાં આવી છે.

દક્ષિણ ગુજરાત અને સૌરાષ્ટ્રમાં વરસાદી માહોલ રહેશે

હવામાન વિભાગની આગાહી અનુસાર, આજે અને આવતીકાલે સમગ્ર ગુજરાતમાં વરસાદી વાતાવરણ છવાયેલું રહેશે. ત્યારબાદ 12 થી 16 જુલાઈ દરમિયાન મુખ્યત્વે દક્ષિણ ગુજરાત અને સૌરાષ્ટ્રના દક્ષિણ ભાગના જિલ્લાઓમાં હળવાથી મધ્યમ વરસાદની શક્યતા છે. બીજી તરફ, અમદાવાદ શહેરમાં મુખ્યત્વે વાદળછાયું વાતાવરણ જોવા મળશે અને પશ્ચિમ દિશામાંથી પવન ફૂંકાવાની ગતિવિધિ જળવાઈ રહેશે.

'સ્ટીપ પ્રેશર ગ્રેડિયન્ટ'ના કારણે માછીમારો માટે એલર્ટ

દરિયાકાંઠાના વિસ્તારોમાં મુખ્યત્વે દક્ષિણ-પશ્ચિમ દિશામાંથી પવન ફૂંકાશે. સામાન્ય રીતે પવનની ગતિ 15 થી 20 નોટ્સ રહેશે, જે વધીને 25 નોટ્સ સુધી પહોંચી શકે છે. જોકે, દરિયામાં સર્જાયેલા 'સ્ટીપ પ્રેશર ગ્રેડિયન્ટ'ની સ્થિતિને ધ્યાનમાં રાખીને 11 અને 12 જુલાઈ માટે માછીમારોને એલર્ટ કરાયા છે. આ બે દિવસોમાં દરિયામાં 45 થી 55 કિલોમીટર પ્રતિ કલાકની ઝડપે તીવ્ર પવન ફૂંકાઈ શકે છે, જે મહત્તમ 65 કિમી પ્રતિ કલાક સુધી પહોંચવાની સંભાવના હોવાથી માછીમારોને દરિયામાં ન જવા તાકીદ કરાઈ છે.

રાજ્યમાં હાલ સરેરાશ કરતાં 13% ઓછો વરસાદ

ચોમાસાની વર્તમાન સ્થિતિના આંકડા પર નજર કરીએ તો, રાજ્યમાં અત્યાર સુધીમાં સરેરાશ 162.5 mm વરસાદ નોંધાયો છે, જે સામાન્ય રીતે 187.2 mm હોવો જોઈએ. આમ, હાલમાં સામાન્ય કરતાં 13% ઓછો વરસાદ નોંધાયો છે. હવામાન નિષ્ણાતોના જણાવ્યા મુજબ, હાલમાં ગુજરાત પર કોઈ મોટી વેધર સિસ્ટમ સક્રિય નથી. અગાઉ સક્રિય થયેલી લો-પ્રેશર સિસ્ટમ હાલ ઉત્તર પ્રદેશના મધ્ય અને ઉત્તરીય ભાગો તરફ ફંટાઈ ગઈ છે, જ્યારે ટ્રફ લાઈન ગંગાનગર અને રોહતક થઈને પસાર થઈ રહી છે.