સરખેજ-ધોળકા રોડ પરનો લોડિંગ ટ્રક અને આઇસર વચ્ચે અકસ્માત: આઇસર ચાલકનો મૃતદેહ ટ્રકની બોડી કાપીને બહાર કાઢ્યો

અમદાવાદ શહેર નજીક આવેલા સરખેજ-ધોળકા હાઇવે પર આજે વહેલી સવારે એક લોડિંગ ટ્રક અને ઈંટો ભરેલા આઇસર વચ્ચે ગંભીર અકસ્માત સર્જાયો હતો. આ દુર્ઘટનામાં આઇસર ચાલકનું ઘટનાસ્થળે જ મોત નીપજ્યું હતું, જ્યારે લોડિંગ ટ્રકના ડ્રાઇવરને ઈજાઓ પહોંચતા સારવાર માટે હોસ્પિટલ ખસેડવામાં આવ્યો છે.

બાકરોલ પાસે સવારે 7:30 વાગ્યે સર્જાઈ દુર્ઘટના

પ્રાપ્ત વિગતો અનુસાર, આજ રોજ વહેલી સવારે અંદાજે 7:30 વાગ્યાના સુમારે અમદાવાદના સરખેજ-ધોળકા રોડ પર આવેલા બાકરોલ ગામ નજીકથી એક ઈંટો ભરેલું આઇસર પસાર થઈ રહ્યું હતું. આ સમયે એક લોડિંગ ટ્રક અને આઇસર વચ્ચે ધડાકાભેર ટક્કર થઈ હતી. અકસ્માત એટલો ભયાવહ હતો કે બંને વાહનોના આગળના ભાગનો કચ્ચરઘાણ વળી ગયો હતો. આ ટક્કરમાં આઇસર ચાલકને ગંભીર ઈજાઓ પહોંચતા તેનું ઘટનાસ્થળે જ કમનસીબ મોત નીપજ્યું હતું.

ફાયર બ્રિગેડે પતરાં કાપીને મૃતદેહ બહાર કાઢ્યો

બંને ભારે વાહનો વચ્ચેની ટક્કર એટલી પ્રચંડ હતી કે આઇસર ચાલકનો મૃતદેહ ટ્રકની આગળની બાજુ ખરાબ રીતે ફસાઈ ગયો હતો. ઘટનાની ગંભીરતાને જોતા ફાયર બ્રિગેડની ટીમ તાત્કાલિક સ્થળ પર દોડી ગઈ હતી. ફાયરના જવાનોએ ભારે જહેમત ઉઠાવીને આધુનિક સાધનો વડે વાહનની બોડી અને કેબિનના પતરાં કાપીને મહામહેનતે મૃતદેહને બહાર કાઢ્યો હતો. આ ઉપરાંત, અકસ્માતમાં લોડિંગ ટ્રકના ડ્રાઇવરને પણ ઈજાઓ પહોંચી હોવાથી તેને તાત્કાલિક સારવાર અર્થે નજીકની હોસ્પિટલમાં ખસેડવામાં આવ્યો છે.

ગ્રામ્ય પોલીસનો કાફલો ઘટનાસ્થળે

હાઇવે પર વહેલી સવારે થયેલા આ ગોઝારા અકસ્માતની જાણ થતાં જ ગ્રામ્ય પોલીસનો કાફલો પણ તાત્કાલિક ઘટનાસ્થળે પહોંચી ગયો હતો. પોલીસે ટ્રાફિક નિયંત્રિત કરીને હાઇવે પર વાહનવ્યવહાર પૂર્વવત કરાવ્યો હતો. હાલ પોલીસે મૃતદેહનો કબજો મેળવીને પોસ્ટમોર્ટમ માટે મોકલી આપ્યો છે. આ અકસ્માત કયા કારણોસર અને કોની બેદરકારીથી સર્જાયો, તે દિશામાં પોલીસે ગુનો નોંધીને વધુ કાનૂની તપાસ હાથ ધરી છે.