Dharmdarshan: હરિયાળી અમાસ પર નાન્દીમુખ શ્રાદ્ધ કરવું કેમ ગણાય છે શુભ? જાણો તેનું મહત્વ અને વિધિ

હિન્દુ ધર્મમાં પિતૃઓની આત્માની શાંતિ અને પિતૃદોષના નિવારણ માટે શ્રાદ્ધ કર્મનું અત્યંત વિશેષ મહત્વ રહેલું છે. કોઈપણ અમાસની તિથિએ પૂર્વજોના નિમિત્તે તર્પણ અને શ્રાદ્ધ કરવાથી તેમની આત્માને મુક્તિ મળે છે. અષાઢ/શ્રાવણ મહિનામાં આવતી 'હરિયાળી અમાસ' ના દિવસે એક ખાસ પ્રકારનું શ્રાદ્ધ કરવાની સલાહ આપવામાં આવે છે, જેને નાન્દીમુખ શ્રાદ્ધ કહેવામાં આવે છે.

આ એક એવું વિશેષ શ્રાદ્ધ છે, જેનાથી પિતૃઓ પ્રસન્ન થઈને વંશજોને સુખ-સમૃદ્ધિના આશીર્વાદ આપે છે. ચાલો જાણીએ હરિયાળી અમાસ પર નાન્દીમુખ શ્રાદ્ધનું મહત્વ અને તેની વિધિ.

નાન્દીમુખ શ્રાદ્ધ શા માટે કરવામાં આવે છે?

કોઈપણ શુભ કે માંગલિક કાર્ય શરૂ કરતા પહેલાં નાન્દીમુખ શ્રાદ્ધ કરવું જરૂરી ગણાય છે. 'નંદી' નો અર્થ 'આનંદ' અને 'મુખ' નો અર્થ 'આરંભ' થાય છે.

સામાન્ય મૃત્યુ બાદ કરાતા શ્રાદ્ધ કરતાં આ શ્રાદ્ધ અલગ હોય છે. આ શ્રાદ્ધનો મુખ્ય ઉદ્દેશ્ય આવનારા કાર્યોની સિદ્ધિ માટે પૂર્વજોનું આહ્વાન કરવાનો છે, જેથી પિતૃઓની કૃપાથી તમામ કાર્યો વિના વિઘ્ને પૂર્ણ થાય અને સફળતા મળે.

હરિયાળી અમાસ પર નાન્દીમુખ શ્રાદ્ધનું મહત્વ

• પિતૃદોષમાંથી મુક્તિ: હરિયાળી અમાસના પવિત્ર દિવસે નાન્દીમુખ શ્રાદ્ધ કરવાથી પેઢીઓથી ચાલ્યા આવતા પિતૃદોષોમાંથી મુક્તિ મળે છે.

• વિઘ્નોનો નાશ: આ શ્રાદ્ધ કરવાથી ઘરમાં આવતી તમામ નકારાત્મક ઊર્જા અને પરેશાનીઓ દૂર થાય છે.

• પૂર્વજોના આશીર્વાદ: હરિયાળી અમાસ પિતૃઓની મુક્તિ માટે શ્રેષ્ઠ દિવસ હોવાથી આ દિવસે નાન્દીમુખ શ્રાદ્ધ કરવાથી પૂર્વજો અત્યંત પ્રસન્ન થાય છે.

કેવી રીતે કરવામાં આવે છે નાન્દીમુખ શ્રાદ્ધ?

૧. નાન્દીમુખ શ્રાદ્ધમાં સૌથી પહેલાં માતૃકા પૂજન અને વસોર્ધારા કરમકાંડ કરવામાં આવે છે.
૨. ત્યારબાદ પવિત્રીકરણ, આચમન, શિખા બંધન, આસન શુદ્ધિ, પ્રાણાયામ, પંચગવ્ય નિર્માણ અને સંકલ્પ લેવામાં આવે છે.
૩. શિવપુરાણ અનુસાર, આ શ્રાદ્ધમાં પિંડદાન, બ્રાહ્મણ ભોજન અને આશીર્વાદ લેવાની વિધિ સંપન્ન કરાય છે.
૪. આ શ્રાદ્ધ દરમિયાન ભગવાન વિષ્ણુનું સ્મરણ કરીને પૂર્વજો પ્રત્યે આદર અને શ્રદ્ધા વ્યક્ત કરવામાં આવે છે.