Dharmdarshan: ઘરમાં સુકાઈ ગયેલી તુલસી પણ બદલી શકે છે તમારું ભાગ્ય, ફેંકવાને બદલે અજમાવો આ 4 ચમત્કારી વાસ્તુ ઉપાય

હિન્દુ ધર્મમાં તુલસીના છોડને અત્યંત પવિત્ર માનવામાં આવે છે અને લગભગ તમામ ઘરોમાં આ છોડ ચોક્કસ જોવા મળે છે. એવી માન્યતા છે કે તુલસીના છોડની નિયમિત પૂજા કરવાથી ઘરમાં હંમેશા માતા લક્ષ્મીનો વાસ રહે છે.

આ છોડને ઘરમાં રાખવા માટે એક ચોક્કસ દિશા નક્કી કરવામાં આવી છે અને તેના માટે કેટલાક વાસ્તુ નિયમોનું પાલન કરવું જરૂરી ગણાય છે. ઘરમાં આવેલો લીલોછમ તુલસીનો છોડ સૌભાગ્યને આકર્ષિત કરે છે, જ્યારે તેનું અચાનક સુકાઈ જવું એ અશુભ ઘટનાનો સંકેત પણ હોઈ શકે છે.

ઘણી વખત કોઈ ચોક્કસ કારણ વગર તુલસી સુકાઈ જાય છે અને લોકો વાસ્તુ નિયમોને નજરઅંદાજ કરીને તેને ફેંકી દે છે. જો તમારા ઘરમાં પણ તુલસીનો છોડ સુકાઈ જાય, તો તેને ક્યારેય પણ કચરામાં ન ફેંકવો જોઈએ. ચાલો જાણીએ કે સુકાયેલી તુલસીનું શું કરવું જોઈએ.

તુલસીના સુકાયેલા છોડનું શું કરવું?

જો તુલસીનો છોડ સુકાઈ જાય તો તેને ક્યારેય પણ કચરામાં ન ફેંકવો જોઈએ. જો છોડ એટલો બધો સુકાઈ ગયો હોય કે તે ફરી લીલો ન થઈ શકે, તો શુક્રવારના દિવસે તેને કુંડામાંથી સાવધાનીપૂર્વક બહાર કાઢો અને કોઈ પવિત્ર નદી કે તળાવમાં વિસર્જિત કરી દો. ભૂલથી પણ રવિવારના દિવસે સુકાયેલી તુલસીને કુંડામાંથી બહાર ન કાઢવી.

સુકાયેલી મંજરીથી કરો આ ઉપાય

તુલસીના છોડની સુકાયેલી મંજરીને અલગ કરી લો અને તેને લાલ કપડામાં બાંધીને ઘરની તિજોરીમાં રાખો. આનાથી ધન આકર્ષિત થાય છે અને ઘરની આર્થિક સ્થિતિ મજબૂત બને છે. આ સિવાય તમે સુકાયેલી મંજરીને કોઈ ખાલી કુંડામાં વાવી દો, ચોમાસાની ઋતુમાં તેમાંથી નવો છોડ ઊગી નીકળશે. ઘરમાં મંજરીમાંથી નવો છોડ ઊગવો અત્યંત શુભ માનવામાં આવે છે.

સુકાયેલા લાકડાંનો હવનમાં ઉપયોગ કરો

જો ઘરમાં તુલસીનો છોડ સુકાઈ ગયો હોય, તો તેના સુકાયેલા લાકડાંને કોઈ સ્વચ્છ જગ્યાએ સાચવીને રાખો. ઘરમાં જ્યારે પણ પૂજા કે હવન થાય, ત્યારે તેમાં તુલસીના થોડા લાકડાં અવશ્ય ઉમેરો. આનાથી ઘરમાં સકારાત્મક ઊર્જા આવે છે અને ઘરનું વાતાવરણ પવિત્ર રહે છે.

કુંડામાં નવો છોડ વાવવો જરૂરી

જો તુલસીનો છોડ સુકાઈ જાય તો તે જ કુંડામાં તુલસીનો નવો છોડ વાવવો જોઈએ. જો તમે પૂનમ, શ્રાવણ મહિનો કે ગુરુવારના દિવસે ઘરમાં તુલસીનો નવો છોડ વાવશો તો તે ખૂબ જ શુભ ગણાશે અને જીવનમાં સમૃદ્ધિના યોગ બનશે.

આ સિવાય એ વાતનું પણ ખાસ ધ્યાન રાખો કે તુલસીનો છોડ કોઈ ખોટી દિશામાં તો નહોતો રાખ્યો ને! જો એવું હોય તો નવો છોડ હંમેશા ઘરની ઉત્તર-પૂર્વ (ઈશાન) દિશામાં જ મૂકવો જોઈએ.